U Ver Shighe u Henen Bibilo Vee?

KEN inyom i i bee la, Anmgbianev mba shin Tine gema shighe u nyôron mkombo u tiônnongo la, sha u nan se shighe gbanger gbanger u henen Bibilo hen tsombor. Aluer u ngu orya yô, nenge wer hanma shighe yô u ngu henen Bibilo vea kwase wou man mbayev ou sha gbenda u a wase ve yô. Nom man kwase mba ve lu a mar ga yô, ve tôô ian ne ve henen Bibilo imôngo. Anmgbianev mba nomso man mba kasev mba ve lu kwav yô, vea fatyô u henen Bibilo sha tseeneke ve sha ian ne.

Ior kpishi wuese ian i ve zough a mi i henen Bibilo aikighe sha mserakaa u he ne. U tesen ikyav yô, ortamen ugen u i yer un ér Kevin yô yange nger ér: “Se mba a iwuese kpishi sha mserakaa ne, nahan ishember i ‘m sugh u’ la je kpa ia fatyô u pasen er i lu se mba ken tiônnongo ken ishima vough ga. Se mbatamen se tema se lam sha kwagh ne, er se yaren tom a shighe u yange i henen Takerada u Henen hen Tiônnongo aikighe, u Anmgbianev mba shin Tine ve kaa er se henen Bibilo a tsombor wase ne, sha er se er nahan vough yô.”

Anmgbian u kwase ugen, iti na ér Jodi, u nom na a lu ortamen la yange nger wenér: “Se mba a ônov mba kasev utar, u môm ngu anyom 15, ugen di 11, ugen la di ngu anyom 2. Se sember yemen hen tiônnongo u i lamen iliam i sha ave yô. Ka i tôô se shighe shi se nôngo kwagh kpoghuloo ve se wa iyol sha mbamkombo cica cii ye. Er i ser shighe Hegen ne yô, se seer zuan a ian aikighe i veren ishima sha mcivir u hen tsombor wase!”

Anmgbian ugen, iti na ér John, un vea kwase na JoAnn, mba eren tom u ikpur pania, ve nger ér: “Yange se henen kwagh hen tsombor tsere tse tsere. Ityom igen i se lu a mi u eren ken tiônnongo atô kposo kposo la, na yô ashighe kpishi se hingir u keren a ker gbenda u se kar sha mi ve se fatyô u henen kwagh hen tsombor hen atô u ityom shon yô. Aluer se yar tom a shighe ne sha inja yô, se kav er mserakaa u he ne a lu iyua i kundun iyol i Yehova a ne se yô.”

Anmgbian ugen u a hembe anyom 25, shi a lu kwav yô, iti na ér Tony, a tsua u henen kwagh sha tseeneke na sha hanma Tomahar aikighe. Ka a yar tom a ayange agen ken sati sha u wan iyol sha mbamkombo mba tiônnongo. Nahan kpa Tony kaa ér, “M hembe veren ashe a iyange i Tomahar.” Sha ci u nyi? Tony kaa ér: “Aikighe la ka a lum shighe u injaa u lun vea Yehova. Ka m tôô ahwa ahar sha u henen kwagh sha atineakaa a aa taver ikyaryan yam vea Yehova yô. Er m lu a shighe u henen Bibilo veseghee yô, ka m hide m gbidye kwar sha avur a m er la.” Nahan kanyi i dugh kere? “Kwaghwan u Yehova ngu hemban shiishi mo ken ishima hegen cii.” Tony ngu a ma ikyav kpa? A kaa wener: “M ôr kwagh u ijende i Yonatan vea Davidi la ken takerada u Insight. M hen kwagh kpishi sha ieren i Yonatan i tangen iyol ga la. Ikyav na la wasem, m hemba fan or u nan lu ijende i mimi yô. Ka m shi veren ashe u seer fan akaa a injaa ne hanma Tomahar aikighe!”

Akperan nga ga, mba civir Yehova cii vea zua a iwasen kpishi, aluer ve yar tom a shighe u injaa u i ne ve ne sha u henen Bibilo shi civir Yehova hen tsombor yô.