U Fatyô u Za Eren Tom hen Ijiir i Kwagh a Hembe Gban sha Mbapasenkwagh u Tartor la Kpa?

“Yange se lu ken mkpeyol ke tar u Amerika, kpa ishima lu zan se iyol ser, alaghga tsô uma u ior mba ken tar ne ve lu a mi u zendan inyaregh ityô la una hii u benden a vese kua ônov asev uhar. Mo man kwase wam yange se vande eren tom mishen, nahan se soo u hiden shi lun uma u akuma akuma, nahan lun saan saan.”

YANGE mba ker ken inyom i 1991 la yô, Ralph man Pam hii u ngeren afishi a branci kposo kposo, pasen ve er i sar ve u za eren tom hen ijiir i kwagh a hembe gban sha mbapasenkwagh u Tartor yô. Afishi a branci a ken tar u Mexico nger ve washika, kaa a ve ér kwagh gba sha mbapasenkwagh u Tartor tsung, mba vea fatyô u pasen ior mba lamen zwa Buter mba ken tar la kwagh yô. Afishi a branci kaa a ve jighilii ér, iyiav mbi ken ishule la mbi “via kuma u sundan.” (Yoh. 4:35) Ica i gba ga maa Ralp man Pam kua ônov vev uhar gba wan iyol i yemen ken tar u Mexico. Hen shighe la wan ve u môm lu anyom 8, ugen la di lu anyom 12.

Haregh u Vesen

Ralph kaa ér: “Cii man se undu tar u Amerika yô, anmgbianev asev mba nomso man mba kasev lu wan se kwagh, kaan a vese ér: ‘Doo u moughon yemen ken tar ugen ga!’ Mbagenev di lu kaan a vese ér ‘Aluer ne za gba angev yô ne er nena?’ Mbagen di lu kaan ér ‘Er nan ve ne soo u moughon za pasen ior mba lamen zwa Buter kwagha? Mimi una doo ior mba lamen zwa Buter mba hen ijiir la ishima ga!’ Nahan kpa, se hide ijime ga. Kera kpa se gba teman tsô maa se mough gagher ser se yem tar ugen ga. Lu kwagh u se lu henen sha mi anyom imôngo yô. Nahan se gba anzô a vesen, aa a tôô se shighe u kimbin ga, kpa se lu koson inyaregh shi se tema se lam sha mbamtaver mba alaghga se tagher a mi la acin imôngo.”

Kwagh u Ralph man tsombor na hii eren yô, ve za hen afishi a branci a ken tar u Mexico la. Anmgbianev mba shin afishi a branci tese ve foto u tesen ajiir a ken tar la jimin cii, maa ve kaa a ve ér, “Ka haregh wen je ne!” Tsombor ne maa za haa afo hen gar u San Miguel de Allende, u ior mba ken ityar igen lu her kpishi yô. Gar ne gba ica a Mexico City je kuma er ukilomita 240 nahan. Yange ve va nyôr, anyom nga kar atar yô, i ver tiônnongo u zwa Buter ken gar la, lu a mbapasenkwagh 19. Lu tiônnongo u hiihii u eren mkombo ken zwa Buter ken tar u Mexico je la. Nahan kpa tom lu a lu ve inyar her tsô.

Í ker ahaba ér, marnya mba tar u Amerika mba kuman er miliôn môm nahan yem twev ken tar u Mexico. Heela tseegh ga, mbatomov mba vesen mba ken Mexico man mbayev makeranta mba ve lamen zwa Buter mba kpishi. Ralph kaa ér: “Yange se er msen ser mbapasenkwagh  ve seer van. Ka se ver iyou i tsan i môm sha ci u hanma anmgbian u nomso shin u kwase u nana va hen haregh wase u va ‘nengen er tar u Mexico u lu yô, sha er a lu pe vea fatyô u va eren tom ker’ yô.”​—⁠Num. 13:⁠2.

Ve Pande Akaa ken Uma Ve sha er Vea Seer Tomshiren Ve Yô

Ica i gba ga maa anmgbianev mba nomso man mbakasev, mba ve soo u seer tomshiren ve gba van. Mbagen ken ve yô lu Bill vea kwase na Kathy; ve mough ken tar u Amerika. Ve vande eren tom sha ajiir a kwagh a hembe gban sha mbapasenkwagh je kuma anyom 25. Yange ve lu keren gbenda u vea hen zwa Spanish yô, kpa mba moughon mba yemen ken gar u Ajijic, hen kpe Ber u Chapala yô, ve gema ishima ve; gar ne lu ijiir i mba den tom mba ken tar u Amerika lu her kpishi yô. Bill kaa ér: “Se mba yemen hen gar u Ajijic yô, se hemba eren tom u keren ior mba lamen zwa Buter, mba sar ve u fan mimi la cii.” Ken atô u anyom ahar a Bill man Kathy za hen gar ne la, saan ve iyol u nengen er i ver tiônnongo u he hen ijiir ne yô; lu tiônnongo u sha uhar u eren mkombo ken zwa Buter ken tar u Mexico je la.

Ken man Joanne ken tar u Kanada kpa soo u panden akaa ken uma ve sha er vea hemba zuan a shighe u eren tom u Tartor yô. Ve kpa ve mough ve yem ken tar u Mexico vea wan ve u kwase, mba yer un ér Britanny. Ken kaa ér: “Yange i kuma ayange imôngo kpa se zua a mngerem ma tseen ga, shi usu u latriki shin telefon kpa lu ga, nahan tôô se shighe kpishi u varen a ijiir la.” Nahan kpa ve zua a iember ken tom u pasen kwagh la. Ica i gba ga maa i tsua Ken ér a lu diakon, shi anyom nga kar ahar yô, i na un ortamen. Sha hiihii la, taver Britanny, wan ve u kwase la kpishi u lun hen tiônnongo u i eren mkombo ken zwa Buter, agumaior kpa a lu her kpuaa tseegh la. Kpa yange hiin u eren tom u maan Ayou a Tartor yô, a zua a azende a dedoo kpishi ken tar la cii.

Patrick vea kwase na Roxanne, ken kpentar u Texas, ken tar u Amerika kpa yange mba va ongo ér ijiir i pasen kwagh ngi ikyua a ior mba lamen zwa Buter yô, doo ve je gande. Patrick kaa ér: “Yange se za hen gar u Monterrey, ikyua a tar u Mexico yô, se nenge ser Yehova yila se ér se za wase tom hen ijiir la.” Ken atô u ayange ataan tseegh, ve tee ya ve ken Texas maa ve yem ken gar la. Uma yange taver ve ken tar u Mexico kpishi, kpa ve zua a iember; sha ci u ken atô u anyom ahar tseegh ve wase annongo u lun a mbapasenkwagh iorov 17 vese hingir tiônnongo u lun a mbapasenkwagh iorov 40.

Jeff vea kwase na Deb kpa ka ior mbagen mba ve pande akaa ken uma ve sha er vea seer tomshiren ve yô. Yange ve tee ya ve u injaa ken tar u Amerika ve za nyôr hen anyou u cuku ken gar u Cancún, hen kpezegemnger, sha ityoughkitaregh ki tar u Mexico. Kera yô, yange ve zaan mbamkohol ikyua a ya ve shi iyou i mkohol shon lu a ijiir i ndôhôr ahumbe shi ve tema kundu kundu kpaa. Kpa hegen yô, ka i gba u vea nyôr kwaghhendan a kuma ahwa anigheni cii ve vea za nyôr hen ijiir i mkohol i i hembe lun ikyua a ve, pe i eren mkohol ken zwa Buter la ye. Shi Iyou i mkohol shon ngi a haav kpa gema ngi ivegher ken akpe na. Nahan kpa, saan ve iyol kpishi sha ci u ve wase u veren tiônnongo ken gar u Cancún, u lun a mbapasenkwagh 50.

Anmgbianev mba nomso man mba kasev  mba ken tar u Mexico kpa hii u wasen tom u pasen ior mba lamen zwa Buter kwagh. U tesen ikyav yô, Rubén vea tsombor na yange mba ongo ér i ver tiônnongo u ken zwa Buter u hiihii ken gar u San Miguel de Allende, shi haregh u tiônnongo shon ka tar u Mexico jimin cii yô, ve kpa ve tsua ér vea wase tom ne. Yange gba u vea hen zwa Buter shi vea fa gado u ior mbagenev shi gba u vea zenden zende u kuman ukilomita 800 hanma sati sha u zan mbamkombo. Rubén kaa ér: “Yange saan se iyol kpishi u pasen ior mba ken ityar igen kwagh, mba ve lu ken tar u Mexico anyom imôngo, shi ve ongo loho u dedoo ken zwa ve sha kwa u hiihii la. Mbagen yange ve sugh se a mliam ashe.” Rubén vea tsombor na yange mba wasen tiônnongo u ken gar u San Miguel de Allende la cii yô, ve gba za eren tom u pania ken gar u Guanajuato, ken atô u Mexico; ve wase u veren tiônnongo u Eren mkombo ken zwa Buter her, lu a mbapasenkwagh 30. Nyian ne, mba pasen kwagh vea annongo ugen u i eren mbamkombo ken zwa Buter ken gar u Irapuato, u a lu ikyua a Guanajuato la.

Se Pase Ior mba i Taver u Aren a Ve la Kwagh

Dugh ior mba ken ityar igen mba ve lu ken tar u Mexico sha kpa, marnya mba Mexico mba kpishi mba ve lamen zwa Buter yô. Ashighe kpishi ka i taver u pasen ior mban kwagh sha ci u mba ya sha ajiir a uzegembaiorov, ape or ka nana va sha hunda kpa i lu mbatomov vev ve va bugh hunda yô. Orya ka nana lagh a va sha hunda je kpa, nan soo u ungwan loho wase ga, sha ci u nan hen ér Mbashiada mba Yehova ka annongo u bo. Nahan kpa, Mbashiada mba ken ityar igen yange vea va u pasen amba a ior la kwagh yô, mbagenev ve kegh ato.

 Nenge ase ikyav sha kwagh u Gloria, u a lu ken gar u Querétaro, ken atô u tar u Mexico la. A kaa ér: “Mbashiada mba lamen zwa Spanish yange ve vande van hen a mo kpa m kegh ato a ve ga. Nahan kpa, mo man tsombor wam se mba va lun ken mzeyol yô, m ule kpishi, maa m er msen hen Aôndo, m zamber a na mer a tesem gbenda u sôron mzeyol shon. Ica i gba ga maa kwase ugen u lamen zwa Buter va hen ya wam. A pine ér ma or u lamen zwa Buter nan ngu hen ya wase je kpa? Er lu kwase u ken tar ugen yô, sarem u fan kwagh na kpishi, nahan m kaa a na mer m lamen zwa Buter. Er kwase ne lu lamen yô, m lu kaan ken ishima mer, ‘Kanyi jim i ve a kwase u ken tar u Amerika ne hen ningir wama?’ Kpa er m vande eren msen hen Aôndo mer a wasem yô, m tôô mer alaghga tsô ka msen wam la je Aôndo a ongo a tindi kwase ne hen a mo ye.” Gloria lumun ér i hen Bibilo a na, man er tsombor na hendan a na kpishi nahan kpa, a za hemen fele fele a kar eren batisema. Nyian ne Gloria ngu pania u keke, shi ngu civir Yehova vea nom na man wan na.

Mba Ve Seer Tomshiren Mbara Zua a Injar

Tom u eren hen ijiir i kwagh a hembe gban sha mbapasenkwagh la ngu a mbamtaver, kpa ngu a injar vese. Ralph u se er kwagh na ken mhii u ngeren ne la kaa ér: “Se hen Bibilo a ior mba ken tar u Ingila man China man Jamaica man Sweden, kua uityaghermbaiorov mba ken tar u Ghana. Ior mbagenev mba se hen kwagh a ve yô mba eren tom u pasen kwagh hanma shighe la hegen. Ken anyom a karen ne cii, tsombor wase nenge er i ver atôônanongo a eren mkombo ken zwa Buter ataankarahar yô. Ônov asev mba uhar mbara cii hii u eren tom pania a vese imôngo, hegen mba eren tom shin Betel ken tar u Amerika.”

Atôônanongo kua iniongo i kiriki i i eren mbamkombo ken zwa Buter yô ngi ken tar u Mexico hegen je kuma 88. Lu nyi i na ve tom ne za hemen kpishi nahana? Ior mba lamen zwa Buter mba ken tar u Mexico kpishi lu a vande lamen a Mbashiada mba Yehova ga. Mbagenev yange ve ungwa loho ne, sha ci u ve tagher a ahendan a vea lu ken tar ve ve ma a yange ve u ungwan la ga. Mbagenev di yange ve kegh ato sha ci u ve de tom nahan ve hemba lun a shighe u henen Bibilo. Heela tseegh ga, mbapasenkwagh mba ken atôônanongo a i eren mkombo ken zwa Buter mba ve lu eren tom u pania mbara hemba ngeen, kwagh ne seer gbashima u ior lu a mi la, shi atôônanongo shon lu vesen seer a seer kpaa.

Averen Nga sha ci Wou

Sha mimi yô, kape ior kpishi sha tar cii vea ungwa loho u Tartor ken zwa ve ve vea kegh ato tsembelee je la. Ka kwagh u taver se ishima kpishi u nengen er anmgbianev mba nomso man mba kasev mba tseen asema, mba ganden man agumaior man mba lun kwav kua noov man kasev ve we iyol ve kegh a kegh u za eren tom hen ijiir i kwagh a hembe gban sha mbapasenkwagh u Tartor nahan. Sha kpôô yô, ka ve wa ishima a mbamtaver kpishi, kpa ka vea va zua a mbaasemaamimi mba vea ngohol mimi u ken Bibilo yô, iember i ve zough a mi la i gema i imbishi mbamtaver vev mbara. U fatyô u sôron akaa ou veren vough vough sha er u zua a ian i za eren tom hen ijiir i kwagh a hembe gban sha mbapasenkwagh u Tartor ken tar wou shin ken tar ugen kpa? * (Luka 14:​28-30; 1 Kor. 16:⁠9) Lu a vangertiôr wer u zua a averen kpishi.

[Ngeren u shin kpe]

[Ngeren u kiriki u a lu sha peeji 21]

Ior Soo u Fan Kwagh u Mba Den Tom Mba Lun Saan Saan Mban

Kwase ugen, mba yer un ér Beryl, yange mough ken tar u Ingila a yem ken tar u Kanada. A er tom u nengen sha ikyômpeni i vesen kpishi ken tar u Kanada. Shi kwase ne yange fa nyinya i hendan kpishi, nahan i tsua un ér a tile sha ityough ki tar u Kanada ken anumbe a vesen agen a yange i er ken inyom i 1980 yô. Yange den tom yô, za lu ken gar u Chapala, ken tar u Mexico, nahan hanma shighe yô, un man nom na ve za ya kwagh hen ijiir i teen kwaghyan igen. Nahan hanma shighe u una nenge ior mba lamen zwa Buter mba den tom vea lu saan saan yô, a za sugh ve shi a pine ve kwagh u ve lu eren ken tar u Mexico yô. Hanma kwa yô ior mban ve nôngo u lun Mbashiada mba Yehova. Tsô Beryl vea nom na kaa ér, aluer u fan Aôndo ne or msaanyol shi ngu a na uma u nan a lu a inja yô, ve kpa ve soo u fan un. Mba ze mbamkombo mba tiônnongo iwer imôngo yô, Beryl lumun ér i hen Bibilo a na. Beryl er tom pania u keke anyom imôngo.

[Ngeren u kiriki u a lu sha peeji 22 la]

“Mba Va Wasen Se Nahan Doo Se Kpen Kpen”

Anmgbianev mba ken ityar i kwagh a hembe gban sha mbapasenkwagh u Tartor la ka ve wuese anmgbianev mba ve undu ajiir a ve sha u va pasen kwagh ken tar ve la kpen kpen. Afishi a branci agen ken Caribbean yange nger ér: “Aluer anmgbianev uderi imôngo mba ve mough ken ityar igen ve lu va eren tom heen ne yem yô, kwagh la una bende a mtil u atôônanongo kpishi. Mba va wasen se nahan doo se kpen kpen.”

Mkaanem ma Aôndo kaa ér “kasev mba ve yôôn loho u dedoo ka ikyum i vesen.” (Ps. 68:11) Sha nahan yô, anmgbianev mba kasev mba lun kwav kpishi mba eren tom u pasen kwagh ken ityar igen kpa kpiligh se iyol ga. Anmgbianev mba kasev mba ve ne ayol a ve mban mba se a iwasen kpishi je. Afishi a branci agen ken tar u Yuropa kaa ér: “Mbapasenkwagh mba kasev mba ken atôônanongo ase kpishi, man ashighe agen je yô ka ve hemba ngeen kpaa. Ve kpishi ka mba ve sember fan mimi yô, kpa upania mbakasev mba lun kwav mba ve dugh ken ityar igen la ka ve wase kpishi sha u tsaase mbahev mban. Sha mimi yô, anmgbianev mba kasev mba ve dugh ken ityar igen ne mba se a iwasen kpen kpen!”

Ka i lu anmgbianev mba kasev mba ve lu za pasen loho u Tartor ken ityar igen ne ken ishima nena? Angelica, anmgbian u kwase ugen u hemban anyom 30; u a lu kwav shi a er tom pania ken tar ugen anyom imôngo yô, kaa ér: “Ka m shi eren tom môm ayange ayange, m nôngon gbeev sha igbenda i lun a amgbiôr kpishi shi m shi nengen a ior kpishi, mba ve lu yan ican yô, nahan kwagh ne a vihim kpishi. Kpa i gema i saan mo iyol er m lu wasen ior ken tomshiren wam yô. Shi iwuese i anmgbianev mba ken tar la ve wuese mo la taver mo ishima kpishi; hanma shighe yô, ka ve shi sughun mo er m ve sha u va wasen ve yô. Anmgbian u kwase ugen yange kaa a mo ér, ikyav i m ver sha u undun tar wam ica za eren tom pania ken tar na la taver un ishima u eren tom u pasen kwagh hanma shighe la.”

Sue, pania ugen u a poso anyom 50 yô kaa wener: “Mbamtaver yô, u tagher a mi keng a bunde ga, kpa averen a u gema u zua a mi la aa hemba mbamtaver mba shon. Tom u pasen loho u dedoo la doo je zua ga. Er m hembe duen kwaghpasen vea agumaukase yô, ka m ôron ve akaa a m hen ken Bibilo kua ken ityakerada yase, sha u tesen ve er se hemba mbamzeyol yô. Ashighe kpishi ka ve kaa a mo ér, m ver ve ikyav i dedoo, gadia m wa ishima a mbamzeyol kpishi ken tom pania u m lu eren u anyom imôngo, shin er m lu kwav ne, nahan kwagh la tese ér ve kpa vea fatyô u hemban mbamtaver ken uma ve. M wase anmgbianev mba kasev mban nahan doom ken ishima kpen kpen.”

[Foto u tesen ijiir u sha peeji 20]

(Wea soo u nengen a foto u tesen ijiir la yô, nenge ken takerada)

MEXICO

Guanajuato

Irapuato

Chapala

Ajijic

Lake Chapala

Monterrey

San Miguel de Allende

Querétaro

MEXICO CITY

Cancún

[Foto u sha peeji 23]

Saan mbagenev iyol u pasen mbavannya mba ve lu a vande ungwan loho u dedoo ga la kwagh