Mbampin mba Mbaôron Takerada Ne Ve Pin La

Bibilo ôr kwagh u “ruamabera u Yashar” man “Ruamabera u Ityav mbi TER.” (Yos. 10:13; Num. 21:14) Ityakerada ne ngi ken Bibilo ga. Nahan yange i nger i sha iwasen i icighan jijingi kpa i va saa a saa shinii?

Se fatyô u kuren ikyaa ser yange i nger ityakerada i ihiar ne sha iwasen i icighan jijingi, kpa i va saa a saa ga. Mba icighan jijingi u Aôndo yange wase ve ve nger Bibilo la yange ve ter akaa a ken ityakerada igen kpaa. Alaghga ityakerada shon igen i yange ve ter la lu ityakerada i ken Bibilo, i yange í ôr kwagh u i sha gbenda u u taver se mba ôron Bibilo nyian u fan jighilii yô. U tesen ikyav yô, i ôr kwagh u “abaver a Samuel, ornengenakaa,” man “abaver a profeti Natan,” man “abaver a Gadi ornengenakaa” ken 1 Kroniku 29:29. Alaghga abaver a atar ne cii lu takerada u Samuel u hiihii man u sha uhar la gayô, lu takerada u Mbaajiriv.

Kwagh ugen yô, alaghga ati a ityakerada igenegh i mbangeren Bibilo yange ve ter i la yange i za kwagh môm a ati a ityakerada igen i ken Bibilo, kpa gema lu ityakerada i ken Bibilo jim jim ga. Se tese ikyav i kwagh ne sha ityakerada i sha ashighe a tsuaa la inyiin, ityakerada shon yô, ka, “ruamabera u abaver a utor mba Yuda” man “ruamabera u utor mba Yuda man mba Iserael” man “ruamabera u utor mba Iserael” kua “ruamabera u utor mba Iserael man mba Yuda.” Er ati a ityakerada i inyiin ne i ze kwagh môm a ati a ityakerada i ken Bibilo, er takerada u Utor u hiihii man Utor u sha uhar la nahan kpa, yange i nger i sha iwasen i icighan jijingi ga, shi ngi ken Bibilo kpaa ga. (1 Utor 14:29; 2 Kron. 16:11; 20:34; 27:7) A shi nan kpa ityakerada ne lu ityakerada i i ôr akaa a mbayiase, i i lu hen shighe u Yeremia man Esera ve nger ityakerada ve la yô.

Mbangeren Bibilo mbagenev yange ve ôr shin ve ter ityakerada i mbayiase igenegh i yange i nger i sha iwasen i icighan jijingi ga yô. U tesen ikyav yô, Eseter 10:2 ôr kwagh u “abaver a utor mba Media man Pershia.” Luka kpa, shighe u lu ngeren Ivangeli na la, “time sha akaa . . . cii doo doo, hii sha mhii u a zan zan, je.” A shi nan kpa yange ôr ityakerada i mbayiase, i i lu hen shighe na la; sha nahan yô, a zua a mfe a nger kwagh u tsombor u Yesu ken Ivangeli na sha ci wase. (Luka 1:3; 3:23-38) Er yange i nger ityakerada i Luka ôr la sha iwasen i icighan jijingi ga nahan kpa, Ivangeli i Luka nger iyolna la yô, lu sha iwasen i icighan jijingi. Man ivangeli la ngi se a iwasen nyian kpaa.

Nahan a shi nan kpa, “ruamabera u Yashar” man “Ruamabera u Ityav mbi TER,” u i ter ken mpin u hiin kwaghngeren ne la kpa lu uruamabera mba i nger ve sha iwasen i icighan jijingi ga yô. Sha nahan yô, Yehova na ian ér i wa i ken Bibilo ga. Mbafantakerada mbagenev kaa ér, akaa a i ter ken uruamabera mba uhar mban tese ér uruamabera mban lu icam i yange i wa sha kwagh u ityav mbi Mbaiserael nôngo vea mbaihyomov vev la. (2 Sam. 1:17-27) Zegetakerada ugen u pasen asemberakaa a ken Bibilo kaa ér, “alaghga tsô lu atsam a mbafan atsam tsema tsema, mba ken tar u Iserael yange ve wa la i nger ken uruamabera mba uhar mban ye.” Ior mbagenev mba Aôndo yange tsua ve ér ve lu uprofeti shin mbanengen akaa a ken hemen je kpa yange ve nger ityakerada igen, i ve nger i sha iwasen i icighan jijingi u Yehova ga yô, shi Yehova yange tsua u wan i ken Ruamabera, u a lu “a inja sha ityesen man sha mkôôm man sha myange” sha ayange a ase ne la ga.—2 Tim. 3:16; 2 Kron. 9:29; 12:15; 13:22.

Ka mimi, i ter ityakerada igen ken Bibilo i yange i lu a inja yô, nahan kpa, mayange je se kure ikyaa ser ka sha iwasen i icighan jijingi i nger ityakerada shon ga. Kpa Yehova Aôndo koso ityakerada i i lu a “kwaghôron u TER wase” la, man ia “lu her gbem sha won.” (Yes. 40:8) Ka akaa a Yehova a tsough ér i nger ken ityakerada i Bibilo i 66 la tseegh aa wase or nana “kuma nana̱ lu a agoyol sha ci u hanma tom u dedoo” ye.—2 Tim. 3:16, 17.