U Za Hemen U Tilen Sha Mimi Kpa?

“Zan zan me kpe je kpaa, me gbihi mimi wam ga.”—YOBU 27:5.

1, 2. Kanyi i doo u se maa, man se time sha mbampin mba nyi?

 TÔÔ ase wer, u ngu kenger sha foto u iyou i u soo u maan yô. Mkper u i kper foto shon la doo u kpishi. Doo u je ú ngu henen sha igbenda i iyou shon ia lu u a inja kua tsombor wou yô. Nahan kpa, saa u maa i kpôô kpôô shi u nyôr i shi u za hemen u sôron i ve foto u iyou la man kwagh u ú lu henen sha i la cii una lu u a inja ye.

² U se tilen sha mimi la kpa kape alaghga se nenge ser ka kwagh u dedoo u una lu se man mba doon se ishima a inja je la. Kpa aluer se ôr sha zwa tseegh ser se tile sha mimi yô, a lu se a inja keng ga, saa se maa mtil sha mimi wase u Orkristu la shi se za hemen u kuran un ve una lu se a inja ye. Ayou a maan taver ishe ken tar u ainge ne kpishi. (Luka 14:28, 29) Kape u maan mtil sha mimi la kpa i lu kwagh u taver je la, nahan kpa iniôngon yase la i saan gbilin ga. Sha nahan yô, de se time sha mbampin mba utar mban: Se er nan ve se lu ior mba tilen sha mimi? Se za hemen u tilen sha mimi wase u Mbakristu la nena? Shighe u or nan kera til sha mimi u nan ga yô, doo u nana er nyi?

Se Er Nan Ve Se Lu Ior Mba Tilen sha Mimi?

3, 4. (a) Ka sha igbenda i nyi Yehova a wasen se u tilen sha mimi? (b) Er Yesu a ver se ikyav nahan, se kpa se fatyô u tilen sha mimi nena?

³ Se hen ken kwaghhenen u ken ijime la ser, Yehova na se icivir sha ci u a na se ian i tesen ser, se mba ior mba tilen sha mimi. Kpa kwagh ka a er i doo yô, a undu se ken ikyaa ne se tseegh ga. Tesen se er se maa ieren i injaa ne yô, shi ne se icighan jijingi na mgbeghaa sha er una wase se se er sha akaa a a lu tesen se la yô. (Luka 11:13) Shi kor mba ve lu nôngon sha afatyô ve cii ér vea tile sha mimi la ken jijingi.—Anz. 2:7.

⁴ Yehova tesen se u lun ior mba tilen sha mimi nena? A er kwagh ne sha gbenda u hemban cii sha u tindin Wan na Yesu shin tar. Yesu yange lu wan u ungwan ter na sha mimi. A “hingir u ungwan kwagh zan zan ar ken ku.” (Fil. 2:8) Yesu ungwa imo i Ter na u sha la ken hanma kwagh cii, a lu shighe u i taver un u eren nahan je kpaa. A kaa a Yehova ér: “Ka ishima Yam ga, i̱ lu ishima You i̱ er ye.” (Luka 22:42) Nahan doo u hanmô wase nana pine iyol i nan ér, ‘Mo kpa m ongo kwagh nahan kpa?’ Aluer se mba nôngon  sha ishima i môm ser se ungwan kwagh yô, se lu ior mba tilen sha mimi. Hen ase sha ashighe a i lu hange hange u ungwan kwagh yô.

5, 6. (a) Davidi ôr er i lu hange hange u tilen sha mimi shighe u se lu tswen la nena? (b) Mbakristu mbaainge mba tagher a nyi shighe u ve lu ve tseegh laa?

⁵ Shighe u se lu se tseegh je kpa, doo u se ungwan Yehova. Alaghga sha ashighe a Davidi, orngeren pasalmi luun tswen la, a nenge er i lu hange hange u tilen sha mimi yô. (Ôr Pasalmi 101:2.) Er Davidi lu tor yô, ior luun vea na hanma shighe. Ashighe kpishi ior mba kuman uderi uderi shin udubu udubu ve lu vea na. (Nenge Pasalmi 26:12.) Yange lu hange hange u una tilen sha mimi sha ashighe la cii, sha ci u gba u tor nana veren ior ikyav i dedoo. (Dut. 17:18, 19) Nahan kpa, Davidi nenge ér shighe u alaghga una lu ‘ken iyou na’ tswen la je kpa, doo u una za hemen u tilen sha mimi. Man se di ye?

⁶ Davidi kaa ken Pasalmi 101:3 ér: “Me kera ver kwagh u dang sha ashe am mayange ga.” Ashighe nga kpishi a se fatyô u veren kwagh u dang sha ashe ase nyian yô, hemban je yô, shighe u se lu se tseegh yô. Ior kpishi mba ve yaren tom a Intanet yô, taver ve u lun iyol ishô sha kwagh ne. Taver u kenger ufoto mbabov man mba ijimbagh ga. Kpa aluer se kenger ufoto mbabov shin mba ijimbagh yô, se mba ungwan imo i Aôndo u yange mgbegha Davidi nger Mkaanem ma ma lu sha heen man kpa? Ufoto mba ijimbagh mba ngôôr vihin or ga, sha ci u ka ve kende asaren a bo a sha hua ken or shi ve vihi imoshima i or shi mba vihin avese kua mlu u ior mba ve nenge ufoto mba shon man mba i tee ufoto vev la kpaa cii.—Anz. 4:23; 2 Kor. 7:1; 1 Tes. 4:3-5.

7. Ka kwaghwan u nyi una wase se u tilen sha mimi shighe u se lu se tseegh laa?

⁷ Jighilii yô, or u civir Yehova môm kpa nan lun tswen ma shighe môm ga. Hanma shighe yô, Ter wase u sha la nengen akaa a se eren la cii sha dooshima. (Ôr Pasalmi 11:4.) Yehova ka una nenge wea hendan a ameen nahan, i doo un kpen kpen! Aluer u er nahan yô, u ngu eren sha icintan i i lu ken Mkaanem ma Yesu ma ma lu ken Mateu 5:28 la. Nahan yô, nôngo sha afatyô wou cii de nengen ufoto mba vea mee u u er kwagh u bo la ga. Mayange de te mtil sha mimi wou u injaa la kera sha u kenger shin ôron akaa a ijimbagh ga.

8, 9. (a) Ka mzeyol sha kwagh u mtil sha mimi u nyi Daniel man akar a na yange ve tagher a mi? (b) Agumaior a a lu Mbakristu nyian nga eren kwagh u doon Yehova man Mbakristu mbagenev nena?

⁸ Shighe u se lu vea mbananjighjighga la kpa se fatyô u tilen sha mimi sha u ungwan Yehova. Hen sha kwagh u Daniel man akar a na a atar la. Yange i yem a ve uikyangen ken Babilon shighe u ve lu agumaior la. Shighe u ve lu ken Babilon la, ve lu hen atô u ior mba ve lu a mfe sha kwagh u Yehova cuku tseegh, shin ve fa un ga kuaa yô.  Hen shighe la, i kighir Mbaheberu mba unyiin mbara ér ve ya akaa a Tindi u Aôndo a vende yô. Mbayev mbara yange vea soo yô, ma ve nenge ér vea ya akaa a Tindi u Aôndo a vende la je kpa a lu kwaghbo ga. Gadia mbamaren vev man uigyandenmbaiorov mba ken Mbayuda man upristi cii vea fatyô u nengen kwagh u ve agumaior a anyiin la ve lu eren ga. Ka an nana fa? Yehova una fa. Nahan er i lu kighir ve nahan kpa ve tile sha mimi, ve ungwa Yehova.—Dan. 1:3-9.

⁹ Ainge kpa, agumaior a a lu Mbashiada mba Yehova tar sha won cii nga dondon ikyav i Daniel man akar a na la, nahan nga tilen sha mimi sha kwagh u atindi a Aôndo a we Mbakristu la, nahan hendan a mkighir u mbakov. Ne agumaior ka nea venda u nyôron iyol ken mcimbim ma man dang dang man inyum i nôngon man ityuhwanev kua idya i eren man akaa a bo agen yô, ka Yehova je ka ne lu ungwan un ye. Ka nea eren akaa ne cii yô, ne lu tesen ner ne tile sha mimi. Kwagh ne ka a lu ne a iwasen, shi imba ieren ne ka i doo Yehova tsung shi ne doo Mbakristu mbagenev kpa ishima.—Ps. 110:3.

10. (a) Ka mnenge u idyaa u shami ga u nyi a ne agumaior agen a te mtil sha mimi ve kera? (b) Mtil sha mimi wasen se u eren nyi sha kwagh u idyaa?

¹⁰ Shighe u kwagh a zough se a ma kwase shin nomsoor kpa doo u se ungwa imo i Aôndo. Se fa doo doo er Mkaanem ma Aôndo ma vende idya i eren nahan. Kpa, or u ungwan kwagh je kpa ashighe agen nana hingir u haan iyol inya, nahan eren kwagh u bo. U tesen ikyav yô, agumaior agen ka a ndiar alegh a yavaor a mbagenev shin ve yaven a mbagenev shin ityô, gayô ve ngirigh alegh a yavaor a mbagenev. Nahan kpa, agumaior ne ka a hen ér ve mba eren kwaghbo ga, sha ci u ka ve hen ér ve mba “eren idya” jighilii ga. Agumaior la venda kwagh u Bibilo i kaa ér idya wa ambaakaa la cii ker la, man ka akaabo a a na a dugh or ken tiônnongo u Kristu kera yô. * Kpa kwagh u hemban vihin je yô, ka ve ta mtil sha mimi ve kera. Er se lu nôngon ser se tile sha mimi yô, se mba we ave sha akaa a a na ve se er kwaghbo ga. Se mba keren ser se mgbôghom a isholibo a mtsaha shio ga. Shi se mba hembe veren ishima sha mtsaha u se zua a mi shighe u se er isholibo la tseegh ga. Kpa, se mba hembe veren ishima u eren kwagh u doon Yehova, geman palegh u eren kwagh u vihin un. Er ma se keren ser se sôsom a isholibo la yô, ka se nôngo se gba ica a i̱; jim yô, ka se ‘yevese idya.’ (1 Kor. 6:18) Ieren ne ngi i tese ér se mba ior mba tilen sha mimi.

Se Za Hemen u Tilen sha Mimi Nena?

11. Ka kwagh u injaa u ungwan imo i Aôndo hanma shighe sha ci u nyi? Tese ikyav.

¹¹ Se mba maan mtil sha mimi sha u ungwan tindi, nahan aluer se za hemen u ungwan tindi yô, se za hemen u tilen sha mimi. Alaghga se nenge ser, u se ungwan imo i Aôndo icin i môm tseegh la ka ma kwagh ga, nahan kpa aluer se mba ungwan un hanma shighe cii yô, kwagh ne una wase se u tilen sha mimi. U tesen ikyav yô, ikyamegh i môm tseegh kia fatyô u lun se a inja  keng ga, kpa aluer se ver akam kpishi sha agen sha inja vough vough yô, se fatyô u maan iyou i doonashe. Kape ka sea ungwan tindi hanma shighe ve se za hemen u tilen sha mimi je la.—Luka 16:10.

12. Davidi ver se ikyav i tilen sha mimi shighe u i lu nzughul a na shi i lu eren kwagh a na sha mimi ga la nena?

¹² Mtil sha mimi wase ka a hemba duen tseer tseer shighe u se lu yan ican shin i lu nzughul a vese shin i er kwagh a vese sha mimi ga yô. Hen ase sha ikyav i Davidi i i er ken Bibilo ne. Shighe u lu wanyekwaor la, yange wa ishima a tôvacan sha ikyev i tor u gba u una tile sha ityough ki Yehova yô. Kpa Yehova venda Tor Saulu, nahan ishima vihi un a Davidi u Aôndo lumun un la. Nahan kpa, er Saulu lu Tor her yô, a gba zendan Davidi ijime a akumautya a Iserael. Yehova yange de kwagh ne za hemen anyom imôngo. Ishima yange i vihi Davidi a Aôndo? Shin kaa ér ityôkyaa ngi i wan ishima ga? Yange er nahan ga. Kpa za hemen u nan Saulu icivir ér ka or u Aôndo a shigh un mkurem yô, nahan shighe u ian due i ma wua Saulu je kpa venda u oron iyev.—1 Sam. 24:2-7.

13. Aluer mbagenev hii se shin ve er se kwagh u vihin nahan, se za hemen u tilen sha mimi nena?

¹³ Davidi ver se ikyav i vesen nyian kpen kpen! Ka uumace mba ve yen ve lu ken nongo u Aôndo, u u lu tar sha won cii ne ye, man ashighe agen or nana fatyô u nzughul a vese shin nana kera lu jighjigh ga je kpaa. Se mba sha shighe u or môm nana fatyô u vihin ior mba Yehova cica cii ga yô. (Yes. 54:17) Aluer ma or u civir Aôndo a vese imôngo nan nzughul a vese shin nan er se kwagh u vihin nahan se er nena? Aluer se wa kwagh ishima a or u se civir Aôndo imôngo yô, alaghga se va hingir u vihin mtil sha mimi wase. Ieren i mbagenev ka ityôkyaa i se gba num a Aôndo wase shin se undu mimi ga. (Ps. 119:165) Aluer se za hemen u wan ishima shighe u i lu tôvon se a ican yô, kwagh ne una wase se u tilen sha mimi.

14. Ka a sôr akaa ken nongo u Yehova shin sha ityesen i ken Bibilo nahan, mbacivir Aôndo sha mimi ve er nena?

¹⁴ Aluer se mba keren ngegh ngegh shin veren ishima sha mbamyen mba mbagenev ga yô, kwagh ne kpaa una wase se se za hemen u tilen sha mimi. Ieren ne tese ér se na Yehova jighjigh. Ngu hemban veren ior nav ainge cii. I gbe tar je mba a kende a mcivir u mimi sha imba ne ga. (Yes. 2:2-4) Aluer i gema gbenda u i vande tan iwanger sha ma ivur Bibilo shin gbenda u eren ma kwagh yô, se lumun nen gbenda u he la. Doo se kpishi er se lu nengen iwanger i ken jijingi ne i lu tan seer a seer nahan. (Anz. 4:18) Aluer taver se u kaven kwagh u i hidi i ser la yô, se sôn nen Yehova a wase se se kav kwagh shon. Nahan kpa, se za hemen u ungwan imo i Yehova shi tilen sha mimi her.

Aluer Or Nan Kera Tile sha Mimi Ga Di Ye?

15. Ka an tseegh nana fatyô u vihin mtil sha mimi wouwe?

¹⁵ Mpin la kôr ken ishima kpishi, shin ka nahan  ga? Er se vande henen ken kwaghhenen u a kar la nahan, mtil sha mimi ngu hange hange. A mtil sha mimi shio yô, se fatyô u yan ikyar vea Yehova shin lun a ishimaverenkeghen ga. Fa kwagh ne: Or ngu sha won môm tseegh u nana fatyô u vihin mtil sha mimi wou yô. Ka we iyol you. Yobu yange fa mimi u kwagh ne tsembelee. A kaa ér: “Zan zan me kpe je kpaa, me gbihi mimi wam ga.” (Yobu 27:5) Aluer u ngu ikyooso ikyooso a Yehova shi u kange ishima wer u tile sha mimi yô, mayange je u gbihi mimi wou ga.—Yak. 4:8.

16, 17. (a) Zum u or er isholibo i vesen yô, kanyi nana er ve a lu sha mi ga? (b) Kpa doo u nana er nyi?

¹⁶ Nahan kpa, mbagenev kan shio u tilen sha mimi. Mbakristu mbagenev nyian er asorabo a vihin tsung, di er sha shighe u mbaapostoli la kpa lu nahan. Aluer we kpa u er isholibo i vihin tsung yô, kwagh hemba u a hemba je shinii? Ka nahan keng ga. Nahan u fatyô u eren nyi? De se hii timen sha kwagh u i doo u ú er ga yô. Uumace ka ve soo u yeren mbamaren vev man Mbakristu mbagenev shin mbatamen asorabo a ve er la. Nahan kpa, Bibilo umbur se ér: “Or u nan cir akaabo a nan yô, nana zua a iveren ga, kpa u nan pase a, shi nan undu a yô, nana zua a mhôônom ma zungwen.” (Anz. 28:13) Mba ve yeren asorabo a ve yô, mba eren kwagh u vihin tsung, gadia kwagh môm ngu myer sha ishigh ki Aôndo ga. (Ôr Mbaheberu 4:13.) Mbagenev ka ve senge ér mba civir Yehova, kpa ve gema ve eren asorabo a vihin tsung. Mba ve eren nahan yô ve ta mtil sha mimi ve kera. Mba ve yeren asorabo a vesen a ve er la cii Yehova lumun mcivir ve la ga. Mcivir u sha imanger ne vihi Yehova ishima tsung.—Anz. 21:27; Yes. 1:11-16.

¹⁷ Aluer Orkristu er isholibo i vesen yô, Bibilo pase kwagh u i gbe u nana er la wang. Gba u nana ker iwasen hen mbatamen mba ken Kristu. Yehova ver mbatamen ér ve wase ma anmgbian u nan er isholiobo i vesen yô. (Ôr Yakobu 5:14.) Mayange de lumun wer, mciem ma a va tsaha u shin a kôôm we la ma yange u u keren gbenda u sôron angev mbu u gbe ken jijingi la ga. Orfankwagh nana lumun ér mnyoonom ma nura shin ipyaven ma yange nan u sôron angev mbu mbua va wua nan la ga.—Heb. 12:11.

18, 19. (a) Kwagh u Davidi la tese ér se fatyô u hiden tilen sha mimi nena? (b) U kange ishima u eren nyi sha kwagh u mtil sha mimi wouwe?

¹⁸ Ishimaveren ngi i den or u nan er isholibo la kwaghbo u nan je kpa? Aluer or kera tile sha mimi ga nahan, nana fatyô u shi hiden tilen sha mimi kpa? Hen ase sha ikyav i Davidi ne. Yange er zege isholibo. Yange tom kwase u orgen zan zan je yô, hingir u yaven a na, kpa kighir heela ga, shi tindi i za wua nom u kwase la. Or môm kpa nana fatyô u kaan ér Davidi lu or u civir Aôndo sha mimi hen shighe la ga, shin ka nahan ga? Nahan kpa, kwagh yange hemba a hemba Davidi jee? Yange gba u a kôôm Davidi taveraa, shi i er nahan kpaa. Kpa er gema ishima sha mimi yô, Yehova zungwe un mhôônom. Davidi hen kwagh sha mkôôm u i kôôm un la, nahan hide gba civir Aôndo sha mimi shi lu ungwan imo na shi za hemen u tilen sha mimi kpaa. Kwagh u Davidi la zua sha kwagh u i er ken Anzaakaa 24:16 ne, ér: “Orperapera ka nan gba kwa taankaruhar kpa nan mough, kpa iferor yô, ka nan gba ken bocan.” Lu nyi i due kere? Hen ase sha kwagh u Yehova ôr a Solomon sha kwagh u Davidi, zum u Davidi kpe kera la. (Ôr 1 Utor 9:4.) Aôndo ôr kwagh u Davidi ér ka or u mimi. Sha kpôô yô, Yehova una fatyô u wanger mbaasorabo, mba ve gem ishima la sha asorabo a vesen a ve er la.—Yes. 1:18.

¹⁹ Aluer u ngu ungwan imo i Aôndo sha ci u a doo u ishima yô, we kpa u lu or u mimi. Za hemen u tilen sha mimi, shi aluer u er isholibo i vesen yô, gema ishima sha mimi. Mtil sha mimi ka kwagh u injaa kpishi! Se cii, se kange nen ishima er Davidi nahan, ser: “Kpa mo yô, ka sha ishô yam m zenden ye; paam, zungwem mhôônom.”—Ps. 26:11.

[Footnote]

Ú Na Mlumun Wer Nyi?

• Kanyi ia wase ú u tilen sha mimi?

• U za hemen u tilen sha mimi nena?

• U er nan ve u hide u tile sha mimi?

[Study Questions]

[Box on page 8]

‘Ka Ieren I Dedoo Kpishi’

Kape kwase ugen er kwagh sha mimi man sha dooshima a kwase u lun iyav iwer itian, u a vande fan un ga la ve kwaseuya la ôr je la. Yange za u za yamen kwagh hen ijiir i teen kôfi, maa hungur anikpa u wan inyaregh ker. Inyaregh ki kuman ₦234,000 nahan yange ki lu ken anikpa ne, inyaregh kin ngee je hemba ki vanden zenden a mi yô. A kaa ken ipipaabaver i hen ijiir la ér: “Yange ishima zam iyol kpishi.” Nahan kpa, gumkwase ugen tôô anikpa shon maa gba keren or u i lu i nan la. Kpa er zua a or shon ga yô, a za na udasenda anikpa shon, nahan udasenda mbara za zua a kwaseuya la. Kwase ne tese iwuese na sha mkaanem man, a kaa ér: “Sha kpôô yô, ka ieren i dedoo kpishi.” Hii nan ve gumkwase la yange nôngo tsung ér una hide a inyaregh kiraa? Ipipaabaver la kaa ér, gumkwase ne ka môm ken Mbashiada mba Yehova, “nahan yange er kwagh ne sha ci u ieren i mimi i kwaghaôndo u a eren la.”

[Picture on page 9]

Agumaior aa fatyô u tilen sha mimi shighe u i lu karen a la

[Picture on page 10]

Davidi yange kan shio u tilen sha mimi shighe ugen la, kpa va hide tile sha mimi