Hen Kwagh sha Akaabo a Mbaiserael Er La

MBAISERAEL yange ve fa kwagh u Yehova soo ér ve er shighe u vea nyôr ken Tar u Ityendezwa la. Aôndo yange wa ve atindi sha ikyev i Mose ér: “Zenda nen mba ve tem ken tar la cii, shi hembe nen ieev vev mbi keren a ker cii, vihi nen ajiir a ve a taven sha la cii.”—Num. 33:52.

Yange gba u ior i Iserael ia ya ikyur a ior mba ken tar la ga shi vea er kasev ken á shin vea tôô wan ve u kwase vea na or u ken á kpaa ga. (Dut. 7:2, 3) Aôndo ta ior mba tsua mban icin ér: “Ver ishima, de ye ikyur a mba ve tem ken tar u, ú za nyôr ker la, ve̱ hôn u ga.” (Eks. 34:12) Nahan cii kpa, Iserael hemba Aôndo ato nahan ve gba ken to hônon u i ta ve icin sha mi la. Lu nyi i na Mbaiserael za nyôr ken zayol nee? Ka icintan i nyi se zua a mi sha kwagh u er ve nee?—1 Kor. 10:11.

Mbaiserael Ya Ikyar a Akuraior Agen Nahan Ve Hingir u Civir Akombo

Mbaiserael yange ve hemba akuraior a a vande lun ken Tar u Ityendezwa la ityav nahan ve ngohol ú. Nahan kpa, Mbaiserael ungwa imo i Aôndo sha hanma kwagh cii ga. Ve kera zenda mbaihyomov vev mbara kera ga. (Mbaj. 1:1–2:10) Kpa ve gema ve tema ken atô u “akuraior ataankarahar” a a lu ken tar la kpishi la, man er kwagh zuan Mbaiserael a akuraior ne hanma shighe yô ve hingir u yan ikyar a ve. (Dut. 7:1) Kwagh ne yange bende a Mbaiserael nena? Bibilo kaa ér: “Ve er ônov vev mba kasev, ve di kpaa ve na ior mbara ônov vev mba kasev, ve civir mbaaôndo vev kpaa. Mbaiserael er kwaghbo sha ishigh ki TER; TER, Aôndo ve, hungul ve, ve gema ve civir Ubaal man Mbaashetaroti.” (Mbaj. 3:5-7) Er Mbaiserael ya ikyar a akuraior a ken tar la yô ve hingir u vôson ayol a ve shi ve civir akombo a ve imôngo kpaa. Mbaiserael mba hingir u vôson kasev a ior mbara imôngo yô, ve kera zenda akuraior la ken tar la kera ga. Nahan mcivir u mimi vihi shi Mbaiserael ayol a ve kpa hingir u civir mbaaôndo mbaaiev.

Ior mba ken Tar u Ityendezwa mbara lu mbaihyomov mba Mbaiserael. Kpa  er Mbaiserael ya ikyar a ve yô, ve hemba lun ior mba bov cii sha ci u ve hôngor mhen u Mbaiserael shi ve vihi ikyar i ve ya a Aôndo la kpaa. Nenge ase gbenda ugen u alaghga yange ve vihi ikyaryan ve a Aôndo yô.

Ve Hingir Mbasulev, Ica Gbe Ga yô Ve Gba Civir Baal

Mbaiserael yange mba va nyer ken Tar u Ityendezwa yô, ve kera lu ior mba azende azende ga, nahan mbagenev kpishi ken a ve hingir mba eren tom sule. A shi nan kpa, gbenda u ve eren tom sule la lu kwagh môm a gbenda u Mbakanaan vanden eren la. Ikyav tese wang ér Mbaiserael yange ve dondo gbenda u Mbakanaan eren tom sule la tseegh ga. Er Mbaiserael ya ikyar a ior mba ken tar la yô, ve mer ve nahan Mbaiserael hingir u lumun jighjigh u nan u ior mbara sha kwagh u tom sule.

Mbakanaan yange ve civir Ubaal kpishi, mba ve henen ér ka mbaaôndo mba doon iyiav la. Er Mbaiserael lu eren tom sule shi sundan iyav nahan kpa ica i gbe ga yô ve hingir u civir mbaaôndo mba Mbakanaan ér ka ve ve ne iyiav mbi doon ye. Mbaiserael yange ve senge ér mba civir Yehova kpa ve lu mba vendan mimi jighilii.

Icintan sha ci Wase Nyian

Ikyav tese ér Mbaiserael yange ve wa ishima u civir Baal shi eren aferakaa a mba civir un eren la shighe u ve va kohol ior mba ken Tar u Ityendezwa la ga. Kpa er ve ya ikyar a ior mbara yô ve hingir u civir Baal. Nahan aluer se ya ikyar a ior mba ve civir Aôndo a vese imôngo ga shi aeren a ve kpa a kaha a ase shi atindiakaa a ve kpa a kaha a ase yô, doo u se ver ishima ser kwagh u yange er Mbaiserael la una er se ga he? Kpa ashighe agen a gba hange hange u se er kwagh a mbananjighjighga ken makeranta shin sha ijiirtom shin hen ya wase je kpaa. Nahan kpa, kwagh u yange er Mbaiserael la ka icintan hen a vese, sha ci u aluer se mba keren imba ikyaryan la yô se mba keren kwaghbo. Bibilo ôr kwagh u mimi ne ér: “Ujende mba bov mba vihin mbamlu mba dedoo.”—1 Kor. 15:33.

Se mba tagher a ikyaren nyian i i ze kwagh môm a i Mbaiserael yange ve tagher a mi la. Nyian kpa ior mba civir akaa kpishi. Akaa ne kua inyaregh man iemberyolough man iniongo i patii man mbahemenev mba ukwaghaôndo mbagenev kua ior mba hen tsombor je kpaa. Môm ken akaa a i ter sha heen ne aa fatyô u hingir kwagh u se hemban veren ishima sha mi. Aluer se ya ikyar a ior mba ve civir Yehova ga yô se kpa se vihi mlu wase u ken jijingi la.

Ieren i yavaor lu vegher u vesen u mcivir u Baal u yange na Mbaiserael kpishi hingir u za civir Baal yô. Kape uhôn mbagenev ka ve na ior mba Aôndo ve yem eren akaa a bo je la. Ikyav i tesen yô, or nana tema ken iyou i nan kpa nana fatyô u vihin imoshima i nan i dedoo la sha u kighir ikyo i kômputa, bughun ufoto mba ijimbagh sha Intanet. Nenge er aluer Orkristu za gba ken to u nengen ufoto mba ijimbagh sha Intanet ve a vihi sha wono.

“Mba i Saan Ve Iyol yô, Ka Mba Ve We Mbampase Nav Ikyo” La

Hanma or yô, nan ngu a ian i ungwan imo i Yehova sha u tsuan akar a nan shin ungwan ga. (Dut. 30:19, 20) Nahan doo u se pine ayol a ase ser: ‘Ka unô m eren anumbe shin m eren akaa a ve sha ian yam i memene? Mba nengen atindiakaa a Aôndo nena, man aeren a ve nga nena? Mba civir Yehova kpa? Aluer m ngu vea ve nahan vea taver mo ishima ér m lu Orkristu u injaa kpa?’

Orpasalmi wa icam ér: “Mba i saan ve iyol yô, ka mba gbenda ve u lu vough, ve zenden sha tindi u TER la. Mba i saan ve iyol yô, ka mba ve we mbampase Nav ikyo, ve keren Un a ishima ve cii la.” (Ps. 119:1, 2) Sha mimi yô, “hanma or u nan cie TER, shi nan zenden sha igbenda Na yô, saan nan iyol.” (Ps. 128:1) Shighe u se soo u kôron ijende a ma or yô, doo u se hen kwagh sha akaabo a yange tser Mbaiserael la, nahan se dondo kwaghwan u Yehova a ishima yase cii.—Anz. 13:20.

[Picture on page 26]

Aluer se ya ikyar a mba Yehova a doo ve ishima ga yô se va hingir u civir akombo