‘Za Nen, Za Gema Nen Ior Ve Hingir Mbahenen, Eren Nen Ve Batisema’
‘Za Nen, Za Gema Nen Ior Ve Hingir Mbahenen, Eren Nen Ve Batisema’
“Nahan yô, za nen, za gema nen akuraior cii a̱ hingir mbahenen, eren nen ve batisema . . . , tesen nen ve u kuran akaa a M we ne kwagh sha mi cii.”—MATEU 28:19, 20.
1. Ikyurior i Iserael yange i tsua ér ia er nyi hen kpe u Uwo u Sinai?
IKYURIOR i Iserael jimin cii kohol hen kpe u Uwo u Sinai er iceghzwa a Aôndo ér: “Akaa a TER A kaa cii, sé er.” Ve er iceghzwa ne anyom kar hegen kuma er 3,500 nahan. Hii hen shighe la je, Iserael hingir ikyurior i i tsegh iyol i i sha ci u Aôndo yô, ve hingir ‘kwagh u Aôndo iyol Na je.’ (Ekesodu 19:5, 8; 24:3) Shi ve lu veren ashe a shighe u vea nyôr ken tar u “atumbabua a dumbur ken u kua iyough kpaa,” hen ape Yehova una kuran ve sha ikyov ikyov la.—Levitiku 20:24.
2. Ka ikyar i nyi ior mba ainge vea fatyô u yan vea Aôndo?
2 Kpa orpasalmi Asav pase ér, Mbaiserael “wa ikyo sha ikyuryan i Aôndo ga, ve lumun u zenden sha atindi a Na kpaa ga.” (Pasalmi 78:10) Ve er sha iceghzwa i uter vev tsegha a Yehova la ga. Nahan ikyurior ne ta ikyar i icivirigh i ve ya vea Aôndo la kera. (Orpasenkwagh 5:4; Mateu 23:37, 38) Sha nahan yô, Aôndo gema ishima na ver ken “atôatyev sha u Una dugh nongo ken a ve sha ci u iti Na yô.” (Aerenakaa 15:14) Ken ayange a masejime ne di, ngu kohol ‘zegeikpelaior i ma or fetyô u ôron i iyenge ga yô, ve due ken hanma ikyurior man hanma nongo man hanma nongoior man hanma zwa kpaa.’ Ngi genger imo a ahan zwa kaan ér: “Myom ka u Aôndo wase u A tem sha ikyônough ki torough la man shi Waniyôngo kpaa.”—Mpase 7:9, 10.
3. Saa or a er nyi keng ve nana fatyô u yan ikyar vea Aôndo?
3 Saa or a tsegha iyol i nan sha ci u Yehova shi nana tese ikyav i iyoltseghan shon ken igbar sha u eren batisema ve nana ya ikyar vea Aôndo ye. Aluer or er nahan yô, nan ngu kuran tindi u Yesu a we mbahenen nav ér: “Za nen, za gema nen akuraior cii a̱ hingir mbahenen, eren nen ve batisema ken iti i Ter man Wan man Icighan Jijingi, tesen nen ve u kuran akaa a M we ne kwagh sha mi cii” la. (Mateu 28:19, 20) Mose yange ôr “Ruamabera u ikyuryan la,” Mbaiserael ungwa dedoo. (Ekesodu 24:3, 7, 8) Nahan ve fa kwagh u Yehova soo ér ve er yô, wanger ve. Nyian kpa doo u se vande zuan a mfe u vough u Aôndo, u a lu ken Mkaanem nam, Bibilo la cii ve se mase eren batisema ye.
4. Kanyi kwagh or a er ve nana kuma u a er nan batisema? (Nenge akwati u a lu sha heen ne.)
4 Yesu yange kaa a mbahenen nav ér ve gema ior ve hingir mbahenen shi ve tesen ve sha er jighjigh ve una taver gbang cii ve vea mase eren batisema ye. Yange wa mbahenen nav tindi ér ve za gema ior ve hingir mbahenen tseegh ga, a kaa a ve kpaa ér ve tese mbahev mbara ‘u kuran akaa a Un we ve kwagh sha mi cii.’ (Mateu 7:24, 25; Mbaefese 3:17–19) Sha nahan yô, mbagenev ka ve hen Bibilo iwer imôngo, gayô inyom jimin shin anyom ahar nahan sha er vea fa inja i batisema tsema tsema cii ve vea mase tsuan kwagh u vea er ye. Sha iyange i eren batisema la kpa, mba ve soo u eren batisema mbara ka ve na mlumun sha mbampin mba hange hange uhar, ve kaa ér een. Yesu yange kaa ér ‘ “Een” wase a̱ lu “een” heregh, man “Ei” wase kpaa, a̱ lu “Ei” heregh,’ nahan doo u se cii se hide se time sha inja i mbampin mba uhar mba ka i pine sha iyange i eren batisema la.—Mateu 5:37.
Mgemshima man Iyoltseghan
5. Ka akaa ahar a vesen a nyi a dugh tseer tseer ken mpin u batisema u hiihii laa?
5 Ken mpin u hiihii la ka i pine or u nan soo u eren batisema la aluer nan gema ishima sha asorabo a nan shi nan tsegha iyol i nan sha ci u Yehova sha u eren ishima na yô. Mpin ne ter akaa ahar a hange hange a i gbe u saa or a er keng ve nana na iyol i nan ér i er nan batisema yô, akaa shon yô ka mgemshima man iyoltseghan.
6, 7. (a) Hii nan ve i gbe u mba ve soo u eren batisema cii vea gema asema keng-ne? (b) Aluer or gema ishima yô, kanyi igen i gbe u shi nana eree?
6 Hii nan ve i gbe u saa or a vande geman ishima cii ve nana er batisema? Apostoli Paulu na mlumun ér: “Ngise se cii kpaa se lu . . . ken asaren a ayol a ase.” (Mbaefese 2:3) Cii ve se va zua a mfe u vough u ishima i Aôndo yô, se eren akaa er tar u eren nahan. Uma wase jimin cii lu sha ikyev i aôndo u tar ne, ka Satan je la. (2 Mbakorinte 4:4) Kpa se mba va fe ishima i Aôndo yô, se kange ishima ser, se “kera eren sha asaren a ior ga, kpa i̱ lu sha ishima i Aôndo.”—1 Peteru 4:2.
7 Gbenda u he u se tsough ne ngu ve se a mbamtsera kpishi. Man u hemban cii yô, ka u bugh se gbenda u yan ikyar i injaa a Yehova. Davidi kaa ér mba ve ye ikyar a Aôndo yô, ka inja er i lôhô ve ér ve va tsa ken “tenti” u Aôndo shin “icighanwo” na nahan. (Pasalmi 15:1) Kpa sha mimi yô, Yehova una gba lôhôn hanma or tsô ér nana va ken tenti na shin icighanwo na ga, saa or “u nan zenden jighilaa, nan eren perapera, nan er kwagh sha mimi ken ishima i nan” la tseegh una lôhô nan ye. (Pasalmi 15:2) Akaa a yange se eren cii ve se mase va fan mimi la aa na yô, alaghga a gba u se sôr inja yase kua mbamlu asev cii ve se mase kuman mba Yehova una lôhô se ken tenti na shin icighanwo na ye. (1 Mbakorinte 6:9–11; Mbakolose 3:5–10) Ka mgemshima una wase se u sôron inja kua mbamlu asev ye—inja na yô ka u vaan afanyô sha asorabo a yange se eren la shi kangen ishima ser se civir Yehova. Kwagh ne una wase se se gema se undu uma u taregh u ngise se eren shi se waan ayol a ase ikyo tseegh la se hingir u eren ishima i Aôndo.—Aerenakaa 3:19.
8. Ka se tsegha iyol yase sha ci u Yehova nena, man iyoltseghan zua vea batisema u eren nena?
8 Vegher u sha uhar u mpin u hiihii la pine mba ve soo u eren batisema la aluer vea tsegha ayol a ve sha ci u Yehova ér vea er ishima na yô. Iyoltseghan ka kwagh u hange hange u i gbe u or a er cii ve nana er batisema yô. Or ka nan tsegha iyol i nan sha u eren msen hen Yehova ken iti i Kristu, nan pase un er i sar nan tsung u eren un tom a uma u nan cii yô. (Mbaromanu 14:7, 8; 2 Mbakorinte 5:15) Hen shighe la maa nan hingir kwagh u Yehova, nahan i doo nan u eren ishima i Aôndo er Yesu kpa doo un nahan. (Pasalmi 40:8; Mbaefese 6:6) Mba eren iceghzwa ne a Yehova kwa môm tseegh. Nahan ka sea er iceghzwa ne a Aôndo ken iuv yô, sha iyange i eren batisema la se pase ken igbar ior cii ve fa ér se er iceghzwa a Ter wase u sha.—Mbaromanu 10:10.
9, 10. (a) U eren ishima i Aôndo la wa nyi man nyi kere? (b) Mbatomov mba Nazi je kpa yange ve fa kwagh u iyoltseghan yase nena?
9 Ka akaa a nyi nahan i gbe u se eren ve se kaa ser, se mba dondon ikyav i Yesu i eren ishima i Aôndo? Yesu yange kaa a mbahenen nav ér: “Aluer anti or a sar nan ka van a Mo ityô yô, nana̱ nyiman iyol i nan, nana̱ tôô [kon u mtsaha] u nan, nana̱ dondo sha a Mo.” (Mateu 16:24) A ter akaa atar heen a i gbe u se er keng yô. Kwagh u hiihii yô, se “nyiman” iyol yase. Inja na yô, se venda asaren ase a bo a eren kwagh sha ishima yase la, se gema se de ser Aôndo a hemen se. Sha uhar yô, se tôô ‘kon wase u mtsaha.’ Sha ayange a Yesu la kon u mtsaha lu kwagh u kunya shi tese ikyav i ican i yan kpaa. Er se lu Mbakristu yô, se lumun u yan ican sha ci u loho u dedoo u se pasen ne. (2 Timoteu 1:8) Alaghga ior vea naha se tar shi vea lam a vese dang kpaa, kpa se mba ‘we kunya ikyo ga’ er Kristu nahan, saan se iyol gadia se fa ser doo Aôndo a vese. (Mbaheberu 12:2) Kwagh u masetyô yô, ka u dondon sha Yesu “gbem.”—Pasalmi 73:26; 119:44; 145:2.
10 Kwagh u doon yô, mba ve hendan a Mbashiada mba Yehova je kpa fa ér ve er iceghzwa ér vea civir Aôndo a ishima ve cii. Ikyav i tesen yô, Mbashiada mba gen mba yange i wuhe ve ken afo a mbakwarev a Nazi agen ken tar u Jamani a i yer ér Buchenwald yô venda ér vea nyiman jighjigh ve ga, nahan i nger takerada ugen ér ve wa uwegh. Ngeren shon kaa ér: “M ngu Orhenen Bibilo her, mayange me vihi iceghzwa i m er a Yehova la ga.” Sha mimi yô, kwagh ne pase ieren i mbatomov mba Aôndo mba ve tsegh ayol a ve cii yô!—Aerenakaa 5:32.
Batisema Ka a Tese Ér Or Ngu Orshiada u Yehova
11. Ka icivir i nyi mba ve er batisema ka ve zua a mini?
11 Ken vegher u hiihii u mpin u batisema u sha uhar la, i pine or u nan soo u eren batisema la aluer nan kav er batisema u nan lu eren la una na nan nana hingir Orshiada u Yehova yô. Or ka nana eren batisema yô, nan hingir ortom u Yehova u nan tsegh iyol i nan yô, nahan i hingir u yilan nan sha iti i Yehova. Kwagh ne ka zege icivir kpen kpen, kpa icivir ne ngi a tom u eren kpa sha mi. Shi aluer or u nan er batisema la nan civir Yehova sha mimi zan zan yô, nana lu a ishimaveren i va lun uma gbem sha won.—Mateu 24:13.
12. Icivir i i ne se, i yer se sha iti i Yehova la kua nyi tom kpa sha mi?
12 Sha kpôô yô, u yilan or sha iti i Yehova, Aôndo uhembanagee la ka zege icivir i numben a mi ga. Profeti Mika kaa ér: “Ior cii mba zenden hanmô ve ken iti i aôndo u nan, man se yô, sé zende ken iti i TER, Aôndo wase, gbem sha won.” (Mika 4:5) Nahan kpa, icivir i i ne se ne kua tom u eren kpaa sha mi. Gba u se eren uma sha gbenda u u tese icivir sha iti i i yer se sha mi ne. Paulu yange umbur Mbakristu mba ken Roma ér aluer or ngu tesen ior kwaghaôndo kpa nan gema nan ngu eren kwagh ugen kposo yô, nan ngu “tuhwan” iti i Aôndo.—Mbaromanu 2:21–24.
13. Er nan ve mbatomov mba Yehova mba ve tsegh ayol a ve la ve lu a tom u eren shiada sha kwagh u Aôndo ve?
13 Shi or ka nana hingir Orshiada u Yehova yô, i gba u nana eren tom u pasen mbagenev kwagh u Aôndo. Yehova yange lôhô ikyurior i Iserael i i tsegha iyol i i̱ sha ci na la ér i lu mbashiada nav sha er ior cii vea fa er un lu Aôndo u tsôron yô. (Yesaia 43:10–12, 21) Kpa ikyurior ne i̱ er kwagh u i lôhô i̱ ér i̱ er la ga nahan Yehova venda i̱. Nyian kpa, i na Mbakristu ian i civirigh i eren shiada sha kwagh u Yehova. Se mba eren shiada ne sha ci u Yehova doo se ishima shi sar se tsung ser i tsegha iti na. Se fa mimi sha kwagh u Ter wase u sha la, nahan a er nan ve se ôr mbagenev kwagh sha mi ga sha wono? Ka se ken ishima er apostoli Paulu kpa lu un ve kaa nahan ér: “I kighir mo a kighir je. Aluer me ôr Loho u Dedoo ga yô, kwagh á tserem.”—1 Mbakorinte 9:16.
14, 15. (a) Nongo u Yehova ka u wase se se vese ken jijingi nena? (b) Ka akaa a nyi nahan a lu a aa wase se se vese ken jijingi?
14 Shi mpin u batisema u sha uhar la ka a umbur mba ve soo u eren batisema mbara er i gbe u vea lu ken mzough vea nongo u Yehova u jijingi na a lu hemen ú la yô. Se mba civir Aôndo se tseegh ga, nahan gba u se ker iwasen man ishuen kua kwaghwan hen “mzough u anmgbianev” cii la. (1 Peteru 2:17 NW; 1 Mbakorinte 12:12, 13) Ka nongo u Aôndo u wasen se ve se ze hemen ken jijingi ye. Ka u gber ityakerada kpishi i i har sha Bibilo yô, man ityakerada ne ka i wase se u zuan a mfe u vough u ka a na se er kwagh sha kwaghfan zum u se tagher a mbamzeyol yô, shi ka i wase se u kporom hen Aôndo kpaa. “Wanakiriki u jighjigh man u fan kwagh” eren kwagh er ngô u a we wan u nan ikyo, a ne nan kwaghyan doo doo nahan, gadia ne se kwaghyan u ken jijingi mgbeghaa sha shighe vough sha er se za hemen ken jijingi yô.—Mateu 24:45–47; 1 Mbatesalonika 2:7, 8.
15 Ka i tsaase mbatomov mba Yehova ken mbamkombo mba ve ze ken hanma sati la shi ve zua a akaawan a aa wase ve vea lu Mbashiada mba Yehova mba jighjigh yô. (Mbaheberu 10:24, 25) Makeranta u Henen Tom u Hemen u Aôndo la ngu tesen se u lamen ken igbar, man Mkombo u Henen Tomshiren la di tsaase se sha er se pase loho wase sha inja yô. Ka sea za mbamkombo shin sea ôr ityakerada i i har sha Bibilo la sha tseeneke wase kpa se nenge er jijingi u Yehova a hemen nongo na yô. Akaawan a Aôndo a ne se hanma shighe ne ka a wase se se lu tsevaa zum u kwaghbo a tseer se yô, shi a tsaase se se hingir mba fan tom tsema tsema shi se lu per ken jijingi kpaa.—Pasalmi 19:7, 8, 11; 1 Mbatesalonika 5:6, 11; 1 Timoteu 4:13.
Ityôkyaa i Se Eren Batisema Yô
16. Kanyi ka i mgbegha se ve se tsegha ayol a ase sha ci u Yehova?
16 Mbampin mba batisema mba uhar mbara ka ve umbur mba ve soo u eren batisema la inja i batisema man ityom i batisema a ve a mi la kpaa. Nahan kanyi i doo u ia mgbegha ve, vea tsua ér vea er batisema? Or ka nan kighir se ér se er batisema ve se er ga, kpa ka Yehova a “urugh” se ye. (Yohane 6:44) “Aôndo ka dooshima” nahan hemen sha dooshima, ka sha agee ga. (1 Yohane 4:8) Ka mhôônom ma zungwen ma Yehova man gbenda u a eren kwagh a vese la u ne ve se kporom hen a na ye. Yehova na Wan na u môm môm sha ci wase shi a na se ishimaverenkeghen i hemban doon cii. (Yohane 3:16) Sha nahan yô, se kpa se na un uma wase cii—se tsegha ayol ase sha ci na.—Anzaakaa 3:9; 2 Mbakorinte 5:14, 15.
17. Ka an tseegh se tsegh ayol a ase sha ci u nana?
17 Se tsegha ayol a ase sha ci u ior shin sha ci u ma tom ugen ga, kpa ka sha ci u Yehova iyol na. Aôndo ne ior nav ityom kposo kposo kpa iyoltseghan ve yô ngi kwagh môm. U tesen ikyav yô, kwagh u Yehova kaa a Aberaham ér a er la lu kwagh môm a ityom i tindi Yeremia la ga. (Genese 13:17, 18; Yeremia 1:6, 7) Nahan kpa ve cii ve er kwagh u Aôndo kaa a ve ér ve er la vough sha ci u a doo ve ishima shi ve soo u eren ishima na sha mimi kpaa. Ken ayange a masejime ne kpa, mbadondon Kristu mba ve er batisema cii mba nôngon eren sha tindi u Kristu a we ér i pase loho u dedoo u Tartor shi i gema ior ve hingir mbahenen la. (Mateu 24:14; 28:19, 20) U eren tom ne a ishima yase cii la ka gbenda u dedoo u se tese ser Ter wase u sha doo se ishima, shi se tsegha ayol a ase sha ci na sha mimi yô.—1 Yohane 5:3.
18, 19. (a) Sha iyange i se er batisema la ka se pase ken igbar ser nyi? (b) Kanyi a time sha mi ken ngeren u a dondo nee?
18 Sha mimi yô, batisema ka a bugh se gbenda u zuan a averen kpishi, kpa ka kwagh u se tôô un wer wer ga. (Luka 14:26–33) Ka a tese ér se tsua a ishima yase cii ser se er kwagh u a hembe nyityô kwagh igen cii yô. (Luka 9:62) Sha iyange i se er batisema la, se pase ken igbar ser: ‘Aôndo ne ka Aôndo wase gbem sha won; Una lu orhemen wase zan zan ku kpaa.’—Pasalmi 48:14.
19 Ngeren u a dondo ne time sha mbampin mbagen mba alaghga ior vea pine sha kwagh u batisema yô. Ma ityôkyaa i injaa ngi i or a venda ér nana er batisema ga yôô? Or a kuma anyom a me ve nana er batisema? Ior cii vea er kwagh sha icivir sha iyange i batisema la nena?
Ú Fatyô u Pasen Kpa?
• Hii nan ve i gbe u saa hanma Orkristu nana gema ishima cii ve nana er batisema?
• U tseghan iyol sha ci u Aôndo la wa nyi man nyi kere?
• Icivir i i ne se i yer se sha iti i Yehova la wa nyi kere?
• Kanyi i doo u ia mgbegha se ve se tsua u eren batisema?
[Study Questions]
[Box/Picture on page 23]
Mbampin Mba Uhar Mba Ka I Pine Mba Ve Soo U Eren Batisema La
Ú gema ishima sha asorabo ou shi ú tsegha iyol you sha ci u Yehova wer u er ishima na sha ci u nagh ku Yesu Kristu a ne la vee?
Ú fa er iyoltseghan you man batisema u ú lu eren ne a ne, ú hingir Orshiada u Yehova, ú lu ken mzough u nongo u Aôndo u jijingi na a hemen ú ne kpa?
[Picture on page 24]
Iyoltseghan ka iceghzwa i or er a Yehova ken msen yô
[Picture on page 26]
Tom wase u pasen kwagh ngu tesen ér se tsegha ayol a ase sha ci u Aôndo