“Iyange Ne Ia Hungur Mo Ga Cii”

MZOUGH u gomoti u Australia ugen u i yer ér Beyondblue la kaa ér: “Mbamzeyol mba ken ishima mba ngôôr nan igyumior angev mbu ken ityou ga. Ka angev mbu mbu hembe zan ve iyol je ne.” Kwaghtôvon ugen tese ér hanma inyom yô, igyumior i ken tar u Australia i kuman iyenge er 100,000 nahan ka i hen akaa ken ishima zan zan je yô i ule kpishi.

Agumaior a a lu Mbakristu kpa ashighe agen ka a ule sha ci u mbamzeyol mba ken ishima. Kpa, ve mbagenev kpishi na Yehova jighjigh nahan kwagh ne wase ve ve hemba akaa a a ze ve iyol ken ishima la, nahan ve hingir igyumior i lun a inja i dedoo. Inja ve ne doo mbagenev kpen kpen. Sha nyi gbenda?

Hen ase sha kwagh u gumkwase ugen u lun anyom 18, mba yer un ér Claire. Un vea ngô na cii mba Mbashiada mba Yehova ken gar u Melbourne, ken tar u Australia. Ter u Claire yange gba toho undu tsombor na, kwagh ne za Claire iyol kpen kpen. Kpa jighjigh u na Yehova, Ter na u sha la taver her dông. Iyange igen yô, Lydia, kwasetwer u a ser tsombor u Claire va u va nengen ngô u Claire u yange lu dedoo ga la. Ngur yemen yô, a tôô Claire shin mato ér una za hungwa un hen kenti ugen. Mba gbe yemen yô, a pine Claire aluer una lu a ma nmgbianomso yô. Kpa, Claire gema kaa a na ér un ngu wanyekwase Shiada u Yehova, nahan un ngu a ma nmgbianomso ga. Kwagh ne kpiligh kwasetwer la iyol kpen kpen. Claire za hemen pase un er Bibilo i wase un u tsuan akaa a a wase un yô. Claire shi tôndo zwa ér una na un takerada ugen u ú har sha Bibilo, u u wase un tsung yô. Mba yer ú ér Questions Young People Ask—Answers That Work.

Lydia, kwasetwer la yange ngohol takerada shon ôr ú cii bee, ayange nga kar atar yô, a gbidye ngô u Claire waya a ôr un er takerada shon u wase un yô. Nahan a pine wener i na un ukôpi mba takerada shon ataratar una na mbaeren tom a na imôngo. Claire maa za a ityakerada la za na un, kwagh ne doo un je a wuese Claire sha jighjigh u nan na la. Claire kaa a na ér una va henen Bibilo a na, maa a lumun.

Nahan zum u kwasetwer la una due ahumbe atetan yô, Claire a va hen kwagh a na, a er nahan iwer imôngo je. Iyange igen yô, gba u a zua mkohol u nan ityesen sha kwagh u mbamzeyol mba ken ishima mba agumaior a zough a mi la, nahan Lydia kaa a Claire ér a va na kwaghôron hen mkohol ne. Cier Claire iyol je, kpa a lumun. Ior yange ve va mkohol la hemba 60. Uigyandenmbaiorov unyiin mba fan kwagh u angev mbu ken ityo tsema tsema na kwaghôron sha mkohol la. Mba been yô, gba sha kwa u Claire. Claire na kwaghôron pase er i doo u agumaior aa kôr ikyar a Aôndo yô. Shi pase ér Yehova Aôndo nengen sha agumaior shi wasen hanmaor u nan suur sha a na shi nan keren msurshima hen a na cii. Shi a pase ior er un fe dedoo ér ica a kera gba ga tsô Yehova una bee a nyityô mkpeyolga u sha iyol man u ken ityo cii yô. (Yesaia 33:24) Lu nyi i due ken kwaghpasen nee?

Claire kaa wener: “Yange m na kwaghôron la m been yô, ior kpishi gba ôron a mo ér ve ungwa wanyekwase pase ior kwagh u Aôndo nahan doo ve kpen kpen. Yange m na ior ukôpi mba takerada u Young People Ask la 23. Mbayev kasev utar mba ve va mkohol la nam namba u utelefon vev. Môm ken mbayevkasev mban ngu henen Bibilo hegen. Iyange ne ia hungur mo ga cii.”