Shighe u a Hembe Doon u Or a Lu Uma Yô

ZUM u ú tagher a mbamzeyol yô, ka ú hide u tôm ayange a “ngise tar doo” laa? Aluer ka nahan yô, nenge ase sha mkaanem ma Tor Solomon, Tor u fan kwagh yange kaa ne, ér: “De kaan wer: Ka nyi ayange a tsuaa la a hembe doon a ahegene? ga. Gadia ka sha kwaghfan u pin kwagh ne je ga.”—Orpasenkwagh 7:10.

Solomon yange wa kwagh ne ér nena? Sha ci u yange fa je wener u lun a mnenge u vough u ayange aa a kar la ngu hange hange sha u wasen se u wan ishima a mbamlu mba hegen mba ve vihi yum ne. Mba ve tômon ayange a ngise tar doo la alaghga ve̱ kera umbur er sha ayange la je kpa akaa a vihin man mbamzeyol yange ve luun, man er mimi je uma yange gba lun di zwa ahan ahan tseegh tsô ga yô. Alaghga akaa agenegh yange wa lun guda a ainge ne, kpa mimi je a fatyô u lun sha akaa cii ga. Er Solomon a kaa nahan, kwaghfan ngu ken u teman gban tômon di akaa a ayange a karen la tsô ga, gadia sha kpôô yô, se fatyô u hiden a ayange a karen la ga.

Kwaghbo ngu sha u tômon tar u tse laa? Een, aluer akaa a se lu tômon la nga yangen se u wan ishima shi nyôôso iyol sha mbamlu mba sha ayange ase ne shin aluer mtôm ne ngu yangen se u lun a iwuese sha shighe u se lu ker ne man ishimaverenkeghen i ia fatyô u lun i yase la yô.

Sha kpôô yô, hegen hemba kan shighe u dedoo u a doo u se lu uma yô, shin er mbamzeyol ve lu seer a seer nahan kpaa. Sha ci u nyi? Sha ci u se mgbôghom ikyua a mkur u mbaawashima mba Aôndo a lu a mi sha tar wase ne man averen a hementor u bem ken Tartor na. Bibilo er ityendezwa nahan ér: “Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.” (Mpase 21:4) Akaa aa doo hen shighe la, nahan ma or a kera lu a ityôkyaa i tômon ayange a “ngise tar doo” la ga.