Se Cii Se Soo Iwuese

IYANGE sev doo wankwase u kpuaa ugen kpen kpen. Shin er sha ayange agen yô ka i gba u a kôôm un nahan kpa, sha iyange ingin ne tsô yô á taver ityough ga cii. Nahan kpa, hen tugh mbura la, mba za gbilin un sha gambe na ér a yav yô ngô na ungwa un lu vaan. Pinen un er i hii ve a lu vaan yô a kaa sha imo i mlia wener: “Nyian kpa m taver ityougho?”

Mpin na la yange sôr ngô na ken ishima coo. Hanma shighe yange wan na u kwase una er kwagh shami ga yô, a kôôm un fese. Kpa er sha iyange ne a nenge wan na u kwase u kpuaa ne nôngo kpishi taver ityough ga nahan kpa, ngô na wongor iyol u wuese un cuku cuku kpaa ga.

Ka mbayevkasev mba kpuaa tseegh iwuese i doo ve ishima kua imo i nan ve ishimataver ga. Se cii ka i doo se—vough er ka i gba u a wa se kwagh shi a kôôm se nahan.

Shighe u í wuese se sha mimi mimi yô ka i lu se nena? Kwagh la ngu a doo se shi a na se msaanyol sha iyange la cii gaa? Ka keng se maa igyundu sha ser se kpa or nenge a iniôngon yase shi se kpa se gba kwagh. Ishima ka i taver se sé fa je ser se nôngo kwagh ka gbilin ga, shi ishima ngi i mgbegha se u hemban nôngon kwagh ken hemen cii. Ka nahan ve ashighe kpishi iwuese i or ne se i̱ í dugh ken ishima i nan la ngi i kporom a vese ikyua a or shon u nan ker ian i nana taver se ishima la ye.—Anzaakaa 15:23.

Yesu Kristu yange kav er i doo u wuese ior yô. Ken injakwagh i talenti la, ter (u a til sha ityough ki Yesu iyolna la) wuese mbatomov nav mba uhar mba jighjigh la asange asange, a kaa wener: “Doo yum, we ortom u injaa, u jighjigh.” Nenge er kwagh ne una doo ken ishima sha wono! Er ve lu a tahav kua mbamlu vev kposo kposo nahan je kpa, iwuese i í wuese ve yô lu kwagh môm.—Mateu 25:19-23.

Nahan de se umbur nen kwagh u ngô u wankwase u kpuaa la. Gba u saa mbagenev vea hii mliam cii ve se wuese ve ga. Kpa i lu tom wase u keren aan a se wuese ior yô. Se mba a ityôkyaa i injaa i wuese ior a ishima i môm sha hanma ian cii.