Er i pase ken ngeren mba ken ijime mbara nahan, akaa a ior ve suur sha mi ér vea lu ken mkpeyol yô ka, ityesen i i kaa ér hanma or cii i tsenga veren kwagh u una er nan la, man makeranta, man inyaregh, kua inja i dedoo. Nahan kpa, aluer u ngu suur sha akaa ne wer i va due u i doo yô, ka inja er u ngu dondon maape u tesen gbenda u i kpela sha inja ga, wer u za hen ijiir i u lu a vande zan ga nahan. Nahan kwagh ngu u una wase se ve se va lu ken mkpeyol ga shinii? Kwagh ngu!

Ka sea soo u tsuan ma kwagh u se er yô, se lam a or u nan lu tamen a vese shi kwaghfan u nan a hembe u wase yô. Nahan kwagh u una wase se ve se va lu ken mkpeyol la kpa se fatyô u fan hen Or u a hemba tsan sha won shi kwaghfan Na a gande ave yô. Se fatyô u zuan a kwaghwan u Or shon ken icighan takeda ugen, mba yer u ér Bibilo. Bibilo tsa kuma er anyom 3,500 nahan hegen.

U fatyô u nan Bibilo jighjigh sha ci u nyi? Sha ci u Or u a nger i la hemba tsan sha won shi kwaghfan na hemba cii. I yila un ér “or u tsan sha won” u a lu, “hii sha uicôronmbaashighev je zan zan gbem sha won.” (Daniel 7:9; Pasalmi 90:2) Ka “Un u A gbe Usha—ka Un man A lu Aôndo ye—u A maa tar man A er u kpaa la.” (Yesaia 45:18) A pase iti na ér ka Yehova.—Ekesodu 6:3.

Er Bibilo i due hen Aôndo u a gbe uumace la yô, i kaa ér ikyurior igen hemba igen ga. Kwaghwan u Bibilo ngu a iwasen hanma shighe shi wasen ior ken hanma tar cii. Bibilo ka takeda u u hembe lun ken ijô kpishi yô, shi i hemba samber sha tar a hanma takeda ugen cii. * Kwagh ne tese ér hanma ijiir i ior ve lu sha tar cii vea fatyô u ôron Bibilo shi ia wase ve. Akaa a se ôr sha kwagh u Bibilo ne sue mkaanem ma Bibilo man:

“Aôndo sangen a sange ga, kpa ken hanma ikyurior cii, or u nan cie un shi nan eren kwagh u vough yô, una lumun nan.”—AERENAKAA 10:34, 35.

Er ônov ka ve doo ormaren ishima shi nan wasen ve nahan, Yehova Aôndo ka Ter wase u se doo un ishima yô, shi wasen se ken Mkaanem nam, ka Bibilo je la. (2 Timoteu 3:16) U fatyô u nan Mkaanem nam jighjigh; kera ga je kpa ka un a gbe se ye, nahan a fa kwagh u una na ve se lu ken mkpeyol yô.”

Gba u u er nyi ve u fa wer mimi je u ngu va lun ken mkpeyol imba la nahana? Nenge ngeren u dondon.