Inja i Dedoo Tseegh ia Fatyô u Van Or a Mkpeyolo?
Ior kpishi hen ér aluer mba a inja i dedoo yô, kwagh la una na vea va lu ken mkpeyol ken hemen. Mhen ne hii ka kwagh u inyian a mi ga. U tesen ikyav yô, ior mba ken veghertar u Ashia lumun a kwagh u ortimen sha akaa ugen, u i yilan un ér Confucius, yange ôr anyom kar deri imôngo cii man shighe u Yesu la yô, a kaa ér: “Kwagh u u soo we i de eren a we ga la, we kpa de eren a ior ga.” *
KWAGH U IOR KPISHI VE EREN YÔ
Hegen kpa ior kpishi na jighjigh ér inja i dedoo ia na vea va lu ken mkpeyol ken hemen. Nahan ka ve nôngon ér vea eren kwagh sha icivir, shi vea lu a aeren a dedoo, shi vea fa ian ve hen ityô, shi vea lu a imoshima i dedoo. Kwase ugen ken Vietnam, iti na ér Linn, a kaa ér, “Yange m na jighjigh mer, aluer m ngu ôron kwagh shi eren kwagh sha mimi yô, a kpe uma wam iyol.”
Mbagenev ka atesen a kwaghaôndo ve la a ne ve eren a ior dedoo ye. Orgen ken tar u Taiwan, iti na ér Hsu-Yun, a kaa ér, “Yange i tesem ér, ka akaa a or eren shighe u nan lu uma la aa na nana va lu ken mkpeyol gbem sha won, shin nana ya ican kpishi shighe u nana kpe kera la ye.”
INJA I DEDOO NGI VAN IOR A MKPEYOL MIMI KPA?
Ka mimi, aluer se mba eren a ior doo doo yô, se zua a akaa a dedoo kpishi. Nahan kpa, ior kpishi mba ve nôngon sha gbashima ér vea eren akaa a dedoo a mbagenev la nenge ér, mba zuan a kwagh u dedoo ga. Kwase ugen ken Hong Kong, iti na ér, Shiu Ping, a kaa ér: “Mba ve tesen ior erdoo la, ior mba gem mba eren kwagh u dedoo a ve ga, er mo nahan. Yange m nôngo sha afatyô wam cii mer me nenge sha tsombor wam shi me eren a ior doo doo. Kpa ivese yam doo ga, shi nomom undum vea wan wam u nomso.”
Ior kpishi nenge ér ka hanma or u nan eren kwaghaôndo cii nan lu a inja i dedoo ga. Kwase ugen ken tar u Japan, iti na ér Etsuko, a kaa ér, “Yange m nyôr kwaghaôndo ugen shi m hii u kohol agumaior mer a eren ityom igen ker. Kpa m nenge ior wa afer ken kwaghaôndo la shi lu kperan hemen shi iin inyaregh ker.”
“Yange m nôngo sha afatyô wam cii mer me nenge sha tsombor wam shi me eren a ior doo doo. Kpa ivese yam doo ga shi nomom undum vea wan wam u nomso.”—SHIU PING, KWASE U KEN HONG KONG
Ior mbagenev mba eren kwaghaôndo kpoghuloo shi yange ve nôngo ér vea eren akaa a dedoo. Kpa ve va nenge ér a iniôngon ve i dedoo la cii kpa akaa a vihin er ve, er kwase u ken Vietnam ne nahan, iti na ér Van. A kaa ér, “Hanma sev yange m yam atamaikyon man ufaluwa kua kwaghyan m za ver sha atse a nan uter av mba tsev nagh. M henen mer me va zua a iveren ken hemen. M er kwagh ne kua akaa a dedoo agen anyom imôngo, kpa nomom va gba icôronuange, shi wan wase u kwase u lu ken yunivasiti ken tar u ken won yô saa ku, man lu wanyekwase je.”
Aluer inja i dedoo tseegh kuma u van se a mkpeyol ga yô, ka nyi i komo? U se na mlumun sha mpin ne yô, saa se lu a kwagh u una wase se u zuan a iwanger sha akaa a a tsum se la, shi una tese se akaa a se er ve se zua a mkpeyol yô. Ka nyi ia wase se?
^ Ikyum. 2 Wea soo u seer fan kwagh u ityesen i Confucius la yô, nenge takeda u i yer ér Mankind’s Search for God la, ityough 7, ikyumhiange i sha 31-35. Ka Mbashiada mba Yehova ve gber u ye, ngu sha Intanet hen ijiir i www.isa4310.com la kpaa.
