Ica a Gba Ga Tsô Aôndo Una Kar a Ican i Yan Cii Kera

KUHWA

“TERE, ka nan je m yila, man We U kera ongom ga? M genger imo her a We mer: Ipila; kpa U lumun u yiman ga.” (Habaku 1:2, 3) Mkaanem man ka ma Habaku, or u dedoo u yange Aôndo lumun un yô. Zamber na ne yange tese ér ngu a jighjigh u nan gaa? Mayange ga. Aôndo na Habaku vangertiôr ér Una kar a ican i yan kera sha shighe u un ver la vough.—Habaku 2:2, 3.

Shighe u we shin or u ne lu kôôsôô nan lu yan ican yô, a lu zange u kuren ikyaa wer, Aôndo ngu eren kwagh fele ga, hegen nahan doo u ma a bee a ican kera. Nahan kpa, Bibilo na se vangertiôr ér: “Ter ngu eren negh negh sha ityendezwa Na la er mbagenev ve nenge er ngu eren negh negh nahan ga, kpa we ishima a ven, mayange sar Un u mbagenev ve̱ tim ga, kpa ior cii ve̱ gema asema.”—2 Peteru 3:9.

KA HANMA SHIGHE AÔNDO UNA ER KWAGHA?

Ica a gba ga! Yesu yange kaa ér kov ugen ua nenge a mbamlu kposo kposo mba vea kohol a tese ér se mba ken ayange a masejime a ‘mkurtar’ yô. (Mateu 24:3-42) Er kwaghôron u profeti u Yesu la a lu kuren sha ayange a ase ne nyian yô, tese je ér ica a gba ga tsô Aôndo una er kwagh sha zayol u orumace. *

Kpa Aôndo una va kar a ican i yan cii kera nena? Shighe u Yesu lu shin tar la, a tese er Aôndo a lu a tahav mbu been a ican i yan i uumace la kera yô. Nenge ase akav a kwagh ne agen.

Uaahe: Shighe u Yesu man mbaapostoli nav lu nahan tso shin Zegemnger u Galilia la, zegeuraahumbe lu nôngon u urun tso ve. Kpa Yesu tese ér un vea Ter na vea fatyô u vendan kwagh a akaa a sha gbaaôndo la. (Mbakolose 1:15, 16) Yesu maa kaa di tsô ér: “Huan, lu ving!” Lu nyi i due kere? “Ahumbe maa de, nahan huan ving cii.”—Marku 4:35-39.

Angev: Yange i fa Yesu wuee ér ngu a tahav mbu been hanma ityô i uange cii, sha ci u yange bughun ior ashe shi a na mbaawanev ve zende shi lu been ior angev mbu gban ikyungugh shi lu wanger mbaamandev kpaa. “Mba ve lu dedoo ga la cii A bee ve angev.”—Mateu 4:23, 24; 8:16; 11:2-5.

M-ban u Kwaghyan: Yesu yange er tom a a tahav mbu Ter na, na un la, sha u geman kwaghyan u cuku hingir kpishi. Bibilo kaa ér, zum u lu eren tom u pasen kwagh la, a koso ior udubu imôngo kuma acin ahar je.—Mateu 14:14-21; 15:32-38.

Ku: Bibilo kaa ér Yesu yange nder iorov utar sha ivande, nahan tese wang je ér, Yehova ngu a tahav mbu timin ku kera. Môm ken mba Yesu nder ve la, yange kpe kuma ayange anyiin.—Marku 5:35-42; Luka 7:11-16; Yohane 11:3-44.

^ Ikyum. 5 Aluer wea soo u seer zuan a iwanger sha kwagh u ayange a masejime la yô, nenge ityough 32 ki takeda u U Fatyô u Lun Uma Gbem sha Won shi a Saan We Iyol! la, ka Mbashiada mba Yehova ve gber u ye shi u fatyô u za kuran u sha Intanet hen ijiir i www.isa4310.com/tiv la, gbilin.