• Or u Aôndo a tsough nan yô. “Mo M ver Tor Wam . . . Me na U akuraior, a̱ hingir dyako Wou, man akighir a tar kpaa, a̱ hingir kwagh Wou je.”—Pasalmi 2:6, 8.

• Oryandyako u ken ya u Tor Davidi. “I mar se Wan, i na se Wan u nomso . . . Mseer u tarkuran kua bem vea lu a ikighir je ga, sha ikônough ki torough ki Davidi man sha tartor na kpaa, sha er á ver u dông” yô.—Yesaia 9:6, 7.

• Or u a mar nan ken Betelehem yô. “We Betelehem . . . , ka ken a we or una duem, u una lu Orkurantar . . . Una hemba zan zan á za ar sha akighir a tar je.”—Mika 5:2, 4.

• Or u ior vea venda nan shi vea wua nan yô. “I laha Un, ior kpaa ta Un kera. . . . I kuma Un sha ci u akaabo ase, i vihi Un iyol sha ci u aferakaa a ase.”—Yesaia 53:3, 5.

• Or u a nder nan shin ku shi a na nan icivir yô. “Ú undu uma wam shin Sheol ga; man shi Ú de Wer, un u i doo U a na la a̱ nenge a ijiir i mtim ga. . . . Uishar mba haan iyol mba ken uwegh Ough ku yanegh gbem sha won.”—Pasalmi 16:10, 11.

Ken yiase i uumace cii, ka or môm tseegh akaa a i ôr sha or u nan kom u hemen la, a zough sha mlu u nan vough ye, man or la ka Yesu Kristu. Jighilii yô, ortyom yange kaa a Maria ngô u Yesu ér: “Aôndo una na un ikyônough ki torough ki ter na Davidi, . . . shi Tartor na kpaa ua kar kera mayange ga.”—Luka 1:31-33.

Yesu yange hemen shin tar ne ga. Kpa una lu Tor u Tartor u Aôndo sha, una hemen uumace cii. Ka nyi i ne ve a kom vough u lun Orhemene? Nenge er i pase kwagh na shighe u lu shin tar la yô.

•   Yesu yange waan ior ikyo. Yesu yange a wase nomso man kasev man mbayev kua mbaganden, vea lu a kwagh ave shin vea lu atsanaior shin vea due han han je kpaa. (Mateu 9:36; Marku 10:16) Shighe u orimande ugen zamber a na ér: “Wea lumun yô, u fatyô u wanger mo” la, kunya kôr Yesu tsô bee un imande.—Marku 1:40-42.

• Yesu tese se u eren kwagh sha ishima i Aôndo. A kaa ér: “Ne fatyô u eren Aôndo tom kua Inyaregh ga.” Shi a kaa ér se eren a mbagenev, er se kpa se soo ser, ve eren a vese nahan, maa i va gema yilan kwaghwan ne ér Tindi u Vesen. U seer yô, Yesu tese ér kwagh gba Aôndo sha ieren yase tseegh ga, kpa kwagh gba un sha mhen wase u ken ishima man asaren a ase la kpaa. Nahan cii ve se er kwagh sha ishima i Aôndo yô, gba u se wa ikyo sha akaa a se henen ken atô u ishima yase la. (Mateu 5:28; 6:24; 7:12) Yesu yange ôr var var ér saa se fa kwagh u Aôndo a soo, shi se eren sha mi ve a saan se iyol sha mimi ye.—Luka 11:28.

• Yesu tese ior kwagh u a lu dooshima yô. Akaaôron man aeren a Yesu la yange a lu a tahav, shi a kôr mba ve keghen ato a na la ken ishima. Yange “kpiligh ikpelaior la iyol kpishi a ityesen na, sha ci u lu tesen ve er ka or u i ne nan tahav mbu tesen yô.” (Mateu 7:28, 29) Shi tese ve ér: “Mbaihyomov enev ve za hemen u doon ne ishima.” Mba ve wua un la je kpa er msen sha ci ve kaa ér: “Tere, de ve isholibo ve, sha ci u ve fa kwagh u ve lu eren ga.”—Mateu 5:44; Luka 23:34.

Yesu kuma vough u lun Tor tar ne, sha ci u una fatyô u wasen ior shi eren a ve kundu kundu. Kpa lu hanma shighe hii u emene?