Alaghga se nenge ser kwagh hemba se shighe u ijende yase i lu yan ican a mbamzeyol mba ken ishima kpishi yô. Kpa se fatyô u tesen ser kwagh u ijende yase la gba se ishima, sha u wasen nan u nôngon a mbamzeyol mba ken ishima mba nan lu yan ican a mi la. Se wase nan nena?

“Lu tsev tsev sha u ungwan kwagh.”—YAKOBU 1:19.

Gbenda u hemban doon u u wase ijende you yô, ka u keghen ato a nan shighe u nan lu lamen a we yô. De nengen wer, hanma kwagh u nan ôr cii saa u ôr kwagh sha mi ga. Nôngo nana fa ér u ngu keghen ato a nan shi kwagh u nan gba u ishima. Shi nôngo fa er i lu nan ken ishima la, shi de puun nan ga. Umbur wer, nana fatyô u ôron akaa a nana va vaa afanyô sha mi ken hemen yô.—Yobu 6:2, 3.

“Lamen nen a mba iyol i kpe ve la sha gbenda u taver ve ishima.”—1 MBATESALONIKA 5:14.

Alaghga ishima ia nyian ijende you shin nana nenge ér nan gba kwagh ga. Aluer u fa kwagh u u ôr nan jighilii ga kpa, u gema u tese nan wer kwagh u nan gba u ishima yô, kwagh ne una fatyô u surun nan ishima shi taver nan ishima kpaa.

“Huror yô, lu a dooshima gbem.”—ANZAAKAA 17:17.

Na nan iwasen i kwagh a gbe nan a mi la jighilii. De tôôn wer u fa kwagh u u er nan ve una wase nan ga ze, kpa pine nan nana ôr u. Aluer  ka taver ijende you u ôron we kwagh u u fatyô u wasen nan sha mi la yô, due nan a mhen sha kwagh u ne fatyô u eren imôngo yô, er u duen za man ahumbe nahan. Shin u fatyô u kaan a nan wer, nana tindi u u za yam nan akaa shin u wase nan u sôron ya, gayô u eren nan akaa agen nahan.—Mbagalatia 6:2.

“Waan nen ishima. —1 MBATESALONIKA 5:14.

Alaghga ashighe agen a lu ijende you ape lamen ga. Aluer ka nahan yô, kaa a ijende you wer, shighe u i lu nan ape lamen cii u kegh ato a nan zulee. Angev mbu ijende you mbua na yô, alaghga nana ôr shin nana er akaa a doon we ga. Alaghga nana kaa ér nana kera er akaa a ne we ishima u eren la ga shin ishima ia lu vihin nan ker. Shighe u u lu wasen ijende you sha akaa a kwagh a gbe nan a mi la yô, wa ishima shi tese nan wer u kav er ishima i lu nan ker la.—Anzaakaa 18:24.

“Ka m nôngo mer, a fa ér m ngu ijende na, nahan una fatyô u lamen a mo hanma shighe cii. Shin er me fatyô u sôron mbamzeyol nav ga nahan kpa, hanma shighe u ka una lamen a mo yô, m kegh ato a na. Ashighe agen ka a soo ér or nana kegh ato a na tseegh, man ka a er nahan yô, i lu un guda.”—Mkaanem ma Farrah, a u ijende na i lu a angev mbu yan kwagh sha inja ga man ishimanyian karen ikyar inya man angev mbu ka mbu er a or nan ure kpishi la.

“Ijende yam igen la fa kwagh shi ka a taver mo ishima. Yange lôhôm m za ya iwer i nyohon hen ya na. Yange er kwagh a mo sha dooshima, nahan kera lum ican ga u pasen un er lum ken ishima yô. Kwagh ne yange taver mo ishima kpen kpen!”—Mkaanem ma Ha-eun u a lu a angev mbu ka mbu er a or nan ure kpishi la.

“Ishimawan ngi hange hange. Kwase wam ka una er kwagh u vihin mo yô, m umbur mer, ka angev mbu ne ve a er kwagh nahan ye, ka inja na la ga. Nahan ka m kera vihi ishima ga shi m hemba wan un ikyo.”—Mkaanem ma Jacob u kwase na a lu a angev mbu ka mbu er a or nan ure kpishi la.

“Kwase wam ka a wasem shi a surum ishima kpen kpen. Ishima ka ia nyian mo a za kar ikyar inya yô, mayange kighir mo ér m er kwagh u m soo u eren ga la ze. Ashighe agen yô, ka i gba u una de kwagh u ka a doo un u eren la je kpaa. Kwagh na doom kpishi sha ci u ne kwagh wuee shi tangen iyol ga.”—Mkaanem ma Enrico u a lu a angev mbu ishimanyian karen ikyar inya la.