Bibilo Ka Takeda u Ôron Kwagh u Mimi Hanma Shighe Cii
Hii sha ayange a tsuaa la je, ior kpishi ken mbamlu kposo kposo nenge ér ka Bibilo i ôron kwagh u mimi hanma shighe cii ye. Nyian ne, ior umiliôn imôngo mba dondon atesen a i̱. Kpa mbagenev nenge Bibilo ér ngi a iwasen ga, shi akaa a i nger ker la kpa ka ukwaghhir. We u nenge nena? U fatyô u zuan a mfe u mimi ken Bibilo?
ATÔAKYAA A U FATYÔ U NAN BIBILO JIGHJIGH YÔ
Ka nyi ia wase u u fan wer Bibilo kuma u ú na i̱ jighjigh? Nenge ikyav i tesen: Aluer ijende you nan ngu ôron we kwagh u mimi hanma shighe zan zan anyom kpishi yô, ka keng u na nan jighjigh. Bibilo ôron kwagh u mimi hanma shighe er ma ijende you i u ne nan jighjigh nahanaa? Nenge ikyav sha akaa agen.
Mbangeren I̱ Lu a Mimi Iyol
Ior mba ve nger Bibilo la lu a mimi iyol kpishi; yange ve pase akaa a ve er shami ga yô, man a ve kanshio u eren kpaa. U tesen ikyav yô, profeti Yona yange nger kwagh sha kwagh u ihyembeato na. (Yona 1:1-3) Jighilii yô, a za kure takeda u Bibilo u yange nger la sha u pasen er Aôndo yange tsaha un yô, kpa a ter ma kwagh u tesen er yange un kôôm ieren na la ga. (Yona 4:1, 4, 10, 11) Ieren i mimi i mbangeren Bibilo cii lu a mi la tese er yange kwagh u mimi gba ve ishima jim jim yô.
Mimi u Akaa a Wasen Se
Bibilo we ior kwagh u injaa hanma shighe sha akaa a ve eren kpa? I̱ we yum. U tesen ikyav yô, nenge akaa a Bibilo i kaa ér ior ve eren sha er bem a za hemen u lun hen atô ve ne: “Akaa a ne soo ner ior ve eren a ven la cii, ne kpa eren nen a a ve kpee je.” (Mateu 7:12) “Imo i legh legh ngi bundu ishima i nyoon, kpa kwaghôron u sha ipila yô, kenden a iyugh sha.” (Anzaakaa 15:1) Sha kpôô yô, akaa a mimi a Bibilo i ôr la nga a inja nyian vough er sha ayange a i nger a la nahan.
Mimi u Yiase
Akaa kpishi a i ndera dughun shin inya anyom imôngo hegen la tese er ior kposo kposo kua ajiir a i ter ken Bibilo la yange lu kpôô kpôô, shi akaa a i ôr ker ér yange er la kpa lu nahan vough yô. U tesen ikyav yô, nenge ankwagh u kpuaa u a tese mimi u kwagh ugen vindi vindi ne. Bibilo kaa ér sha ayange a Nehemia la, ior i Tiru (ior i Fenishia mba ve due ken Tiru), mba ve va lu ken Yerusalem la, yange “ve va a ishu kua hanma injauikya i kasua” cii.—Nehemia 13:16.
Ma ikyav ngi i suen kwagh u ivur Bibilo ne i ôr laa? Een, ngi. Mbadughun akaa shin inya zua a ikyav mbi ior i Fenishia shin inya ken Iserael, mbi mbi tese er ityar i ihiar i sha ayange a tsuaa ne eren kasua yô. Heela tseegh ga, i dugh akuhe a ishu i shin Zegemnger u Mediterenia shin inya ken Yerusalem. Mbadughun akaa shin inya na jighjigh ér, lu mbakasuav mba hen ijiir icaa, i hen kpe u zegemnger ne, va a ishu shon ye. Mba tôvon sha ikyav ne cii yô, orgen u timen sha akaa a ken Bibilo kaa ér: “Kwagh u i ôr ken Neh[emia] 13:16 ér ior i Tiru tee ishu ken Yerusalem la lu nahan vough.”
Mimi u sha Kwagh u Sainsi
Jighilii yô, Bibilo ka takeda u kwaghaôndo man akaa a yiase. Kpa ka ia ôr kwagh u a gbe a zough a sainsi yô, i̱ gba zwa môm a mbasainsi sha akaa a mimi a ve fe la. Nenge ase ikyav i môm.
Bibilo ôr kwagh ugen anyom kar er 3,500 nahan hegen, ér i har tar “sha ma kwagh ga.” (Yobu 26:7) Kwagh u i̱ ôr ne ngu kposo a ukwaghhir mba ve kaa ér tar u se tem sha u ne ngu kuan sha mnger, shin zege kurugh tôô ú la. Yange i nger takeda u Yobu i bee anyom kar er 1,100 nahan, kpa ior za hemen u nan jighjigh ér tar ua fatyô u gban lun sha ahumbe tsô ga, gba keng u ua tema sha kwagh. Orsainsi ugen iti na ér Isaac Newton, yange gber takeda ken inyom i 1687 la sha kwagh u tahav mbu urugh kwagh, mbu i nengen a mbu ga, i yer mbu ér gravity la, pase er i lu tahav mbu shon mbu kôr tar u lu masen ningir iyange yô. Yange pase kwagh ne anyom kar hegen deri utar di tsô. Gwaikyaa u mbasainsi er ne tese er kwagh u Bibilo vande ôron anyom a karen ken ijime er 3,000 nahan la i lu mimi yô!
Mimi u Kwaghôron u Profeti
Akaaôron a profeti a a lu ken Bibilo kpishi la kure sha mi vough nena? Nenge ikyav i môm: Yesaia yange tsenga ôron kwagh u mtim u Babilon.
Kwaghôron u Profeti Shon: Orngeren Bibilo Yesaia yange ôr kwagh anyom kar hegen er 2800 nahan, ér gar u Babilon, u lu u ken hemen una va hingir gartamen u tartor u lun a tahav kpishi la, a hemba un ityav, shi ken masejime una hingir ice. (Yesaia 13:17-20) Yesaia shi ter iti i or u nana er kwagh ne la kpaa, ér ka Shirushi. Shi pase gbenda u Shirushi una er kwagh shon kpaa, kaa ér, uifi vea “uma kera.” Shi tsenga ôron ér, a undu ihindagar ivegher.—Yesaia 44:27–45:1.
Er Kwagh Ne Kure sha Mi Yô: Yesaia yange ôr kwaghôron u profeti ne anyom nga karen er 200 nahan yô, tor u Pershia ugen va ta num sha Babilon. Tor shon lu ana? Lu Shirushi. Er girgar u Babilon lu civirii kpishi yô, Shirushi hungwa a shoja na shin Ifi u Yuferati, u yange kar ken atô u gar shon, shi ta agbaa ningir un tser la. Yange shoja na time akpa, nahan ifi la lu kuan va goom shimi karen za haan hen ijiir i lun amgbiôr amgbiôr. Kwagh ne na yô, mngerem pande shin ifi la je gba ior mba Shirushi sha iwenge, nahan ve fatyô u hungwan peren gbaa ifi u gbanger za kighir ken kpekpe u girgar la. Kwagh gema er kpilighyol yô, Mbababilon bugh ihindagar i ifi kar her kighilii la, undu ivegher! Shoja i Shirushi maa nyôr ken gar u Babilon sha ihinda la, hemba un ityav.
Nahan kpa, kwagh shi môm u i pase vindi vindi yô: Babilon hingir icee? Yange anyom kar uderi imôngo je kpa ior za hemen u lun ken gar la her. Kpa nyian ne, alôgh a gar u Babilon—ikyua a gar u Baghdad, ken tar u Iraq—tese er kwaghôron u profeti ne a kur sha mi vindi vindi yô. Sha kpôô yô, se fatyô u nan Bibilo jighjigh zum u i̱ lu ôron akaa a aa va er ken hemen je kpaa.
