1. Yehova gba se uumace a mfe u kpilighyol u nyi?

YEHOVA gba se uumace a mfe u kpilighyol. Yehova na se mfe u henen sha kwagh la, sha er se fatyô u sôron mbamzeyol asev shi wan agoyol sha kwagh u ken hemen yô. (Anz. 2:11) A na se tahav mbu eren kwagh u se we ishima u eren la, sha er se kure mbaawashima asev mba injaav mbara yô. (Fil. 2:13) Shi a gba se a imoshima i ka i wase se u fan kwagh u dedoo man kwagh u bo la. Imoshima la ka i wase se se palegh kwaghbo shi se sôr akaa a se er shami ga la.—Rom. 2:15.

2. Yehova soo ér se er tom a mfe wase la nena?

² Yehova soo ér se er tom a mfe u a ne se la sha gbenda u injaa. Sha ci u nyi? Sha ci u se doo un ishima, shi a fa je ér, aluer se er tom a mfe wase ne yô, a saan se iyol. Yehova taver se ishima kwa kimbir kimbir ken Mkaanem nam ér, se er tom a mfe u un ne se ne sha inja. Ikyav i tesen yô, Ruamabera u ken Zwa Heberu la kaa ér: “Mbamhen mba ortseenshima, ka sha u kwagh ma a ngee” shi  “hanma or u nan torough kwagh yum yô, ka ken ibanave nan lu zan ye.” (Anz. 21:5; Orpa. 9:10) Ruamabera u Mbakristu u ken Zwa Grika la di kaa a vese ér: “Er se lu a ian yô, se eren nen akaa a doon a ior cii,” shi a kaa ér, “er hanma or nan ngohol iyua i sha mlumun u sha mhôôn nahan yô, eren nen ayol a en tom a mi.” (Gal. 6:10; 1 Pet. 4:10) Kwagh ne tese wang ér, Yehova soo ér hanmô wase nana er hanma kwagh u nan fetyô la cii, sha u wasen iyol i nan man mbagenev.

3. Uumace mba a mbamyen mba nyi?

³ Nahan kpa, Yehova fa er uumace ve yen yô. Nahan mayange se fatyô u been a myen wase shin isholibo shi ku kera, sha tahav asev ga. Shi se fatyô u kighir mbagenev ser ve er kwagh u se soo la kpaa ga, sha ci u hanma or nan ngu a ian i eren kwagh u nan soo yô. (1 Utor 8:46) Shi sea lu a kwaghfan nan nan kpa, kwaghfan wase la una fatyô u kuman sha u Yehova la ga.—Yes. 55:9.

4. Se lu henen nyi ken ngeren nee?

⁴ Mlu wase una lu nan nan kpa, gba u se suur sha Yehova ser a tese se, shi a sue se shi a wase se u eren kwagh u se fatyô u eren ayol a ase ga la. Nahan kpa, doo u se er hanma kwagh u se fetyô la cii sha u sôron mbamzeyol asev shi wasen mbagenev. (Ôr Pasalmi 37:3.) U ngeen kwagh ga yô, gba u se ‘suur sha Yehova shi se eren akaa a dedoo’ shi gba u se ‘dondo sha kwagh u mimi.’ Sha nahan yô, de se nenge kwagh u se fatyô u henen ken ikyav i Noa man Davidi kua mbacivir Aôndo sha mimi mbagenev, mba yange ve suur sha Yehova shi ve er kwagh u vough la. Er se lu henen ken ngeren ne nahan, yange ve fa mkposo u kwagh u vea fatyô u eren man u vea fatyô u eren ga la, nahan ve er kwagh u vough.

5. Sha shighe u Noa la, tar lu nena?

⁵ Noa yange lu ken tar u “mgbough a apera” man idya yô. (Gen. 6:4, 9-13) Yange fa je ér, shighe a karen yô, Yehova una tim botar la kera. Er Noa fa nahan cii kpa, alaghga yange ishima ia vihi un tsung sha aferakaa a ior lu eren la je ka u henen a hen ga. Er kwagh lu nahan yô, Noa fa akaa a una fatyô u eren man a una fatyô u eren ga la.

6, 7. (a) Ka nyi yange lu u Noa a fatyô u eren ga? (b) Shighe wase ngu er shighe u Noa la nahan nena?

⁶ Kwagh u Noa fatyô u eren ga yô: Er Noa lu  pasen loho u icintan i Yehova nahan kpa, lu u una fatyô u kighir mbaaferev mba ve wa un atô la ér ve ungwa loho shon ga, shi lu u una na Mngerem ma Deemee ma a va fese kpaa ga. Yange gba u Noa una suur sha Yehova ér Una kure ityendezwa i a er u been a iferkwagh kera la, shi una na jighjigh ér Aôndo una er nahan sha shighe u a ver la vough.—Gen. 6:17.

⁷ Se kpa, se mba ken tar u u mgbough a iferkwagh, u Yehova a tende zwa ér una va tim u kera ne. (1 Yoh. 2:17) Er mtim a lu a va ga ne, se fatyô u kighir ior ser ve lumun “loho u Dedoo u tartor” la ga. Shi se fatyô u kôvor a iyange i mhii u “zegecan” la kpaa ga. (Mat. 24:14, 21) Gba u se lu a jighjigh u nan taveraa, shi se suur sha Aôndo ser una er kwagh sha ikyaa ne fese, er Noa nahan. (Ps. 37:10, 11) Se na jighjigh ser Yehova una de botar ne ér a za hemen i kar shighe u a ver la iyange môm ken inya tsô kpaa ga.—Hab. 2:3.

8. Noa yange ver ishima sha kwagh u fatyô u eren la nena? (Nenge foto u a lu sha mhii u ngeren ne la.)

⁸ Kwagh u Noa fatyô u eren yô: Ishima yange yina Noa sha ci u kwagh u fatyô u eren ga la ze, kpa a ver ishima sha kwagh u fatyô u eren la. Er Noa lu or u “yôôn kwagh u perapera” yô, yange pase loho u icintan i Aôndo la sha mimi, er Aôndo kaa un nahan. (2 Pet. 2:5) Er Noa lu pasen loho ne yô, kwagh la taver jighjigh na u nan je ka u henen a hen ga. Dugh kwaghpasen sha yô, shi Noa er tom a mfe man agee a na sha u kuren tom u gban tso u Aôndo na un la.—Ôr Mbaheberu 11:7.

9. Se fatyô u dondon ikyav i Noa la nena?

⁹ Ka se nôngo tsung se ‘eren tom u Ter ngegh je,’ er Noa nahan. (1 Kor. 15:58) Tom ne wa u maan shi sôron ajiir a civir Aôndo her, shin u wasen sha mbamkohol asev mba vesen man mba kiriki, gayô eren tom shin Betel shin hen ma afishi a geman kwagh a hen ityônya. Kwagh u hemban cii je yô, se mba eren tom u pasen kwagh ne kpoghuloo sha ci u se fa ser, tom ne ka u seer taver ishimaverenkeghen yase i se lu a mi sha kwagh u ken hemen la. Anmgbian u kwase ugen, u civir Yehova sha mimi kaa nahan ér: “Ka wea lamen vea mbagenev sha kwagh u averen a Tartor u Aôndo ua va a mi yô, u nenge er mba ve lu ungwan a we la ve lu a ishimaverenkeghen ga shi ve nenge ér mbamzeyol vev vea bee mayange ga yô.” Sha kpôô yô, ka sea pasen loho u dedoo la yô, kwagh ne a na se hemba  lun a mnenge u vough sha kwagh u ken hemen la shi se kange ishima ser se gba ayem a uma la zan zan se kar kuren.—1 Kor. 9:24.

10. Pase kwagh u yange za hemen ken uma u Davidi la.

¹⁰ Yehova yange pase kwagh u Tor Davidi ér ngu “or u sha ishima [na] vough.” (Aer. 13:22) Davidi yange civir Yehova sha mimi sha ayange a uma na cii. Nahan cii kpa, sha shighe ugen la, Davidi er isholibo i vesen. Yange er idya a Batesheba. Shi u hemban vihin je yô, nôngo ér una yer isholibo na la, sha u nengen ér i wua Uria, nom u Batesheba la ken utya. Davidi yange tindi Uria a washika u nger ker ér i wua Uria yô. (2 Sam. 11:1-21) Shighe kar yô, asorabo a Davidi la due ken igbar. (Mar. 4:22) Shighe u asorabo a Davidi due ken igbar la, a er nena?

11, 12. (a) Davidi yange eren isholibo kera yô, ka nyi fatyô u eren ga? (b) Aluer se er asorabo a vesen kpa se gema ishima yô, se fatyô u suur sha Yehova ser una er nyi sha ci wase?

¹¹ Kwagh u Davidi fatyô u eren ga yô: Yange lu u Davidi una fatyô u been a isholibo i er la sha won ga. Shi lu u una fatyô u waren akaa a a tser un sha ci u asorabo a na la kpaa ga. Jighilii yô, lu u Davidi una nôngo a akaa agen a a tser un la sha ayange a uma na cii. (2 Sam. 12:10-12, 14) Sha nahan yô, yange gba u Davidi una lu a jighjigh u nan. Lu u una na jighjigh ér, aluer un gema ishima sha mimi yô, Yehova una de un a kwaghbo shi una wase un u wan ishima a akaa a a tser un sha ci u aeren a na la.

¹² Er se yen yô, se cii se mba eren isholibo. Asorabo agen ka a hemba vihin a agen. Aluer se er asorabo agen yô, mayange se fatyô u been a mi sha won ga. Alaghga akaa a a tser se sha ci u asorabo a ase la, aa lu a vese gbem sha won. (Gal. 6:7) Kpa se na Yehova jighjigh shi se suur sha a na ser, aluer se gema ishima yô, una sue se ken ashighe a ican, aluer ka se se ve a atsan shon sha ayol a ase je kpaa.—Ôr Yesaia 1:18, 19; Aerenakaa 3:19.

13. Davidi yange hide taver ken jijingi nena?

¹³ Kwagh u Davidi fatyô u eren yô: Davidi yange de Yehova wase un hide taver ken jijingi. Gbenda môm u er kwagh ne yô, yange lumun Yehova kôôm un sha ikyev i profeti Natan. (2 Sam. 12:13) Shi Davidi er msen hen Yehova, pase asorabo a na shi tese sha mimi ér sar un u Yehova a hide a lumun un. (Ps. 51:1-17) Er Davidi ma de ibo i ken ishima ma ya tor sha a na la yô, gema hen kwagh ken asorabo a na la. Jighilii yô, mayange kera kimbir eren asorabo shon ga. Anyom a a mase karen la cii, Davidi civir Yehova sha mimi zan zan kar kpen, nahan mayange Yehova hungur a Davidi ga.—Heb. 11:32-34.

14. Ka nyi se fatyô u henen ken ikyav i Davidi laa?

¹⁴ Ka nyi se fatyô u henen ken ikyav i Davidi laa? Aluer se gba ken isholibo yô, gba u se gema ishima sha mimi shi se ker ser Yehova a de se a kwaghbo. Gba keng u se pase un asorabo a ase. (1 Yoh. 1:9) Shi gba u se pase mbatamen asorabo a ase sha er vea wase se ken jijingi yô. (Ôr Yakobu 5:14-16.) Ka sea lumun iwasen i Yehova nahan yô, se tese ser se suur sha ityendezwa na i er ér una bee se angev mbu ken jijingi shi una de se a kwaghbo wase la. Se eren nahan yô, a gba u se hen kwagh ken asorabo a ase la, nahan zan hemen u civir Yehova shi lun a vangertiôr ser mlu wase u ken hemen la una doo tsung.—Heb. 12:12, 13.

15. Ka nyi se fatyô u henen ken ikyav i Hana a ver se laa?

¹⁵ We kpa, alaghga u fa mbacivir Aôndo sha mimi mbagenev mba sha ayange a tsuaa, mba ve suur sha Yehova shi ve er kwagh u vough yô. Ikyav i tesen yô, Hana yange lu ikyômkwase, man lu u una fatyô u nôngon a zayol ne iyolna ga. Sha nahan yô, a suur sha Yehova ér a sur un ishima, maa za hemen u  civir Aôndo ken tabernakel shi pase Yehova er lu un ken ishima la cii ken msen. (1 Sam. 1:9-11) Nenge imba ikyav i dedoo i Hana a ver se ne! Shighe u se gbe angev shin se tagher a mbamtaver mbagenev mba ve gande se ken inya yô, ka se haa ishimanyian yase la cii sha Yehova, se suur sha a na ser una kende se ga. (1 Pet. 5:6, 7) Nahan se er kwagh u se fetyô la cii sha er se zua a iwasen ken mbamkombo asev mba Mbakristu la man ken akaa a ken jijingi a Aôndo a ne se la yô.—Heb. 10:24, 25.

16. Mbamaren vea fatyô u henen nyi ken ikyav i profeti Samuel a ver se laa?

¹⁶ Hide mbamaren mba civir Yehova sha mimi, mba mbayev vev ve tsum la di ye? Profeti Samuel yange fatyô u kighir ônov nav mba ve wa ikyondo la ér ve za hemen u civir Aôndo sha mimi sha u dondon atindi a perapera a a lu tesen ve la ga. (1 Sam. 8:1-3) Yange gema hanma kwagh cii wa sha ikyev i Yehova. Er kwagh lu nahan kpa, Samuel iyolna za hemen u tilen sha mimi shi eren ishima i Yehova, Ter na u sha la. (Anz. 27:11) Nyian kpa, mbamaren mba ve lu Mbakristu la kpishi ka ve nyôr ken imba mlu ne. Kpa ka ve suur sha Yehova ér a kegh iyol u ngohol mbaasorabo mba ve gem ishima la, er ter u ken injakwagh i wan u a undu ter na la nahan. (Luka 15:20) Mbamaren mban ka vea er nahan kpa, ve nôngo kpoghuloo ve za hemen u civir Yehova sha mimi, ve na jighjigh ér ikyav ve la ia mgbegha ônov vev u hiden va kohol ikyumuile.

17. Ikyav i kwasecôghol la ia taver se ishima sha ci u nyi?

¹⁷ Hen ase sha kwagh u kwasecôghol u sha ayange a Yesu la kpaa. (Ôr Luka 21:1-4.) Yange lu a kwaghmôm u una er sha anyighe u i lu eren ken tempel la ga. (Mat. 21:12, 13) Shi lu a kwagh u una er ve una due ken ican na la kera kpaa ga. Nahan kpa, er iyua a ishima na i môm sha “ideri ihiar” i i lu “kwagh u a lu a mi sha u koson iyol na cii” la. Kwase u civir Aôndo sha mimi ne yange tese ér un suur sha Yehova a ishima na cii ér, aluer un ver akaa a ken jijingi hiihii yô, Yehova una nenge sha mbamgbe nav. Er kwasecôghol ne suur sha Yehova yô, kwagh ne mgbegha un u suen mcivir u mimi u sha ayange a na la. Se kpa, se na jighjigh ser, aluer se vande keren Tartor la yô, Yehova una nenge ér se zua a kwagh u kwagh a gbe se a mi la.—Mat. 6:33.

18. Pase kwagh u anmgbian ugen u lu a mnenge u vough sha ayange a ase ne yô.

¹⁸ Mba se civir Yehova vea ve imôngo kpishi nyian kpa, ve suur sha Yehova shi mba eren kwagh u vough. Nenge ase kwagh u anmgbian ugen u yange i yilan un ér Malcolm yô. Yange civir Yehova sha mimi zan zan kar kpen ken inyom i 2015 la. Ken anyom a un vea kwase na ve civir Yehova la, ve tagher a akaa a dedoo man a bo. Anmgbian ne kaa ér: “Ashighe agen ka i taver u fan kwagh u uma, shi ican ngi ken uma kpishi. Kpa Yehova ka a ver mba ve suur sha a na la doo doo.” Nahan Malcolm wa se kwagh ér nyi? A kaa ér: “Er msen Yehova a wase u sha er kwagh u injaa una due ken tom u u lu eren un la, shi u za hemen u eren un tom kpoghuloo er u fetyô la yô. Ver ishima sha kwagh u u fatyô u eren la, i de lu sha kwagh u u fatyô u eren ga la ze.” *

19. (a) Se tsua ivur yase i sha inyom i 2017 ne sha inja vough sha ci u nyi? (b) U er nan ve u dondo kwagh u a lu ken ivur i sha inyom i 2017 ne ken uma wouwe?

¹⁹ Er tar u lu vihin ‘yemen hemen hemen’ yô, gba u se fa ser, se lu hemban tagher a mbamtaver cii. (2 Tim. 3:1, 13) Nahan yô, gba hange hange u se de ser mbamtaver mban ve hemba se ga. Kpa, gba u se suur sha Yehova a ishima môm, nahan se eren hanma kwagh u vough u se fetyô la cii. Sha nahan yô, se tsua ivur yase i sha inyom i 2017 ne sha inja vough, i kaa ér: ‘Suur sha Yehova eren akaadedoo’!—Ps. 37:3.