I nger loho u dedoo u ú er kwagh u ior vea va lu uma gbem sha won sha tar la ken Bibilo. (Pasalmi 37:29) Bibilo ngi a ityakerada i kiriki kuma 66. Aôndo yange er tom a mbajighjigh iorov 40 sha u ngeren ityakerada i Bibilo ne. Ityakerada itian i hiihii la ka Mose yange nger i ye. A nger i kuma er anyom 3,500 nahan ken ijime. Takerada u Bibilo u masetyô la di lu apostoli Yohane nger u ye. A nger u hemba anyom 1,900 hegen. Mbangeren Bibilo mban yange ve nger lu mbamhen mba ana? Aôndo yange ôr kwagh a mbangeren mban sha icighan jijingi na. (2 Samuel 23:2) Yange ve nger mbamhen mba Aôndo, lu mba vev ga. Nahan yô, ka Yehova jim jim je a lu Orngeren Bibilo ye.—Ôr 2 Timoteu 3:16; 2 Peteru 1:20, 21.

Se fa ser Bibilo due hen Aôndo sha ci u i tsengaôron akaa a ken hemen vighe vighe, shi i ôr a vough kpaa. Ma orumace môm nana fatyô u eren kwagh nahan ga. (Yosua 23:14) Ka Aôndo Uhembanagee la tseegh una fatyô u tsengan nengen a kwagh u una va er uumace ken hemen ye.—Ôr Yesaia 42:9; 46:10.

Se nenge ser takerada u ú dugh hen Aôndo yô, takerada ugen ua lu er u nahan ga, man kape i lu je la. I samber a ukôpi mba Bibilo ubiliôn ubiliôn ken ijô uderi imôngo. Er Bibilo i lu takerada u ngise nahan kpa, i ôr kwagh zua vough sha kwaghfan u sainsi. Shi iorov 40 mba yange ve nger Bibilo la ôr kwagh zwa môm. Heela tseegh ga, ikyav tese wang ér kwagh u dooshima u i nger ken Bibilo la una fatyô u duen ape gen ga, saa hen Aôndo u mimi la tseegh, shi zan zan hegen kpa, Bibilo  ngi a tahav mbu geman ior sha u uma ve a̱ doo yô. Atôakaa ne na yô, ior umiliôn umiliôn na jighjigh ér Bibilo ka Mkaanem ma Aôndo.—Ôr 1 Mbatesalonika 2:13.

Kwagh u vesen môm u i er ken Bibilo yô, ka loho u dedoo sha kwagh u awashima u dedoo u Aôndo a lu a mi sha uumace la. Ruamabera ôr se er ngise uumace gema ian i yange ve lu a mi i lun ken paradiso sha tar la ve ta kera yô, man er i lu u a va hide a paradiso la ken hemen yô.—Ôr Mpase 21:4, 5.

Mkaanem ma Aôndo shi ma a atindi man akaawan kpaa. Heela tseegh ga, Bibilo nger akaa a yange Aôndo er a uumace sha ayange a tsuaa la je zan zan yô, man yiase ne gema wase se u fan injaor i Aôndo a lu yô. Nahan yô, Bibilo ia wase u u fan Aôndo. i pase kwagh u ú er ve u hingir ijende i Aôndo yô.—Ôr Pasalmi 19:7, 11; Yakobu 2:23; 4:8.

Antakerada ne dondo gbenda u Yesu yange tesen ior kwagh la, nahan ua wase u ú fa Bibilo. Yesu yange una ôron kwagh a ior yô, a ter avur kposo kposo ken Bibilo shi a pase ve inja i kwagh u i nger ken “icighanruamabera” la.—Ôr Luka 24:27, 45.

Ka akaa kpuaa tseegh a doo kpishi er loho u dedoo u Aôndo la nahan ye. Nahan kpa, ior mbagenev soo u ungwan u ga, mbagenev je yô, ka u na ve ishimavihin je kpaa. Kpa we yô, de yen ishima ga. Saa u fa Aôndo ve u lu a ishimaverenkeghen i va zuan a uma u tsôron la ye.—Ôr Yohane 17:3.