ER ALAGHGA ú vande fan nahan, ior ka ve beeyol, ve gba angev, shi ve kpe kpaa. Mbayev je kpaa mbagenev ka ve kpe. Nahan doo u ú cia kuu, shin ú cia orkpenee?— Aluer se kpe yô, ú fa kwagh u una er se kpa?

Ma or môm je kpa ngu nyian u nan kpe kera cii, shi nan hidi nan nder u nana ôr se kwagh u or ka nana̱ kpe ve, a er nan la ga. Kpa orgen yange nan kpe shi nan nder shighe u Yesu, Ortesen Uhemban lu shin tar la. Aluer se ôr kwagh u or ne u i nger la yô, se fa kwagh u ior ka vea kpe ve, a er ve la. Or la lu huror u Yesu, lu ken Betani, angar u kiriki ugen ikyua a Yerusalem. I yilan or ne ér Lasaru, lu a anmgbianev mbakasev uhar, í yilan u môm la ér Marta, ugen la di í yilan ér Maria. De se ungwa ase kwagh u Bibilo i kaa ér yange er la.

Iyange igen yô, Lasaru gba angev tsung. Yesu gema lu ca a ijiir la hen shighe la. Nahan Marta man Maria ve tindi or loho ér i̱ za kaa Yesu yô, anngô ve Lasaru ngu inya uange. Ve tindi loho ne sha ci u ve fa ér Yesu una fatyô u va been anngô ve angev. Yesu lu ortwer ga, kpa Aôndo gema na un tahav mbu been ior nyityô uange cii.—Mateu 15:30, 31.

Nahan kpa, Yesu lu a̱ za nenge a Lasaru ga tsô, maa angev mbura nyoon Lasaru gande, maa a kpe. Kpa Yesu kaa a mbahenen nav ér Lasaru ngu yaven, kpa Una za nder un. Mbahenen kav kwagh u Yesu lu ôron la ga. Nahan Yesu kaa a ve gbar gbar ér: “Lasaru kpe.” Kwagh ne tese se nyi sha kwagh u kuugh?— A tese ér ku ngu er ka  mnyam ma or ka nan yav mem mem nahan. Ngu er ka mnyam ma or ka nan yav mem mem, je yô mnyam tsô kpa ma cier nan ga nahan.

Yesu maa mough gba yemen u za nengen a Marta man Maria. Ahuraior a ior mba hen tsombor la kpishi vande van lu her. Ve va u va kumbur kasev mbara sha ku u anngô ve la. Marta ongo ér Yesu ngu van yô, á due á za u za keghen un gbenda. Ica gbe ga yô Maria kpa due za sha u za keghen Yesu gbenda. Ishima vihi un kpishi, lu vaan kpaa, á za gba inya hen angahar a Yesu. Ahuraior agen a a lu vea Maria la kpa lu vaan.

Ortesen Uhemban pine ape ve ver Lasaru yô. Ior mba ve lu her la maa ve hemen Yesu gbenda, ve za a na hen bar, ape i ii Lasaru la. Er Yesu nenge ior cii lu vaan yô, un kpaa gba vaan. Á fa er ku u or u doon se ishima ka u nyoon yô.

I cir iwen sha hunda u bar la, nahan Yesu kaa ér: “Tôô nen iwen ne kera.” Nahan ior mbara vea menger iwen la kera kpa?— Marta hen ér doo u a menger iwen la kera ga. Á kaa ér: “Tere, una huma hegen, gadia ayange a kuugh na nyian ka anyiin je.”

Kpa Yesu kaa a na ér: “M vande kaan we Mer: Aluer wea na jighjigh yô, ú nenge icivir i Aôndo gaa?” Yesu lu kaan a Marta ér una nenge kwagh u una va Aôndo a icivir yô. Tsô Yesu una er nyi hen shighe nee? Mba menger iwen la kera yô, Yesu maa er msen hen Yehova genger genger. Yesu maa yila sha imo i taver kaa ér: “Lasaru, due ken won!” Nahan una due je kpa? Una due kpa?

Ú fatyô u nderen or u nan lu yaven kpa?— Een, aluer ú yila nan genger genger yô, nana nder. Kpa ú fatyô u nderen or u nan kpe yôô?— Ei. Wea yila orkpen la genger genger nan nan kpa, nana ungwa ga. Kwagh môm je kpa ngu u mo shin we shin orgen môm shin tar nana er nyian ve, nana nder orkpen shin ku ga.

 Kpa kwagh u Yesu ngu kposo. Aôndo na un tahav mbu hemban. Nahan Yesu yer Lasaru yô, kwagh u kpilighyol er. Or u kpe, tsa shin war ayange anyiin la due ken bar u i ii un la! I nder un, hide lu uma! Hide hingir u ôôn, zenden kera, shi lamen kpaa! Een, Yesu nder Lasaru shin ku.—Yohane 11:1-44.

Hen ase sha kwagh ne yôô: Kanyi yange i̱ er Lasaru shighe u a kpe laa? Ma kwagh ugen yange due ken iyol na yem za lu mape gen shinii—yange uma shin jijingi due ken iyol na yem za lu ma ijiir igen shinii? Uma u Lasaru yange yem sha shinii? Yange za lu uma shaala vea Aôndo man uicighan mbatyomov ken ayange a anyiin a á lu kpenegh laa?

Ei, yange za lu uma sha ga. Umbur wer Yesu yange kaa ér Lasaru ngu yaven. Ka wea yaven nahan, ka ú fa nyi? Ka wea yav mem mem yô, ú fe kwagh môm u a lu zan hemen kpaa ga, shin ú fe?— Shi ka wea va nder je kpa, ú fe shighe u ú lu yaven ve, a kar la ga, saa ú  nenge agogo ve ú fa ye.

Kape mlu u mbakpenev kpa a lu je la. Mba fe ma kwagh môm ga. Shi vea fatyô u eren kwagh môm ga. Kape Lasaru kpa yange kpe ve, hingir vough je la. Ku ngu er ka mnyam ma or ka nan yav kpum kpum nan kera fa ma kwagh môm ga nahan. Bibilo kaa ér: “Mbakpenev yô, fa ma kwagh ga.”—Orpasenkwagh 9:5, 10.

Shi hen sha kwagh ne kpaa: Luun er Lasaru yange una lu shaala sha ayange a anyiin la nahan, yange ma ôr kwagh a mi gaa?— Shi luun er yange una yem sha nahan, Yesu yange ma kighir un ér a̱ undu ijiir i sha í doon tsung la a̱ hide a̱ va lu shin tar nee?— Mayange ga cii!

Nahan kpa ior kpishi ka ve kaa ér kwagh ngu ken iyol yase u ka sea kpe kpa, a za hemen u lun uma her yô. Ka ve kaa ér Lasaru yange kpe kpa lu uma her, za lu ijiir igen. Kpa Bibilo ôr kwagh nahan ga. I̱ kaa ér Aôndo yange er Adam, or u hiihii la lu “or u uma.” Bibilo shi kaa ér Adam yange eren isholibo yô, maa kpe. Yange kpe kera nahan kera fa ma kwagh môm ga. Hide hingir vuulevu ú i tôô í er un a mi la. Shi Bibilo kaa kpaa ér ônov mba Adam cii ya dyako u isholibo man ku la.—Genese 2:7; 3:17-19; Mbaromanu 5:12.

 Nahan ikyav tese wang ér kwagh ngu ken iyol i or u ka nana̱ kpe kpa a due a za lu mape her uma ga. Shi, er ior ve ye dyako u isholibo hen Adam, or u hiihii la yô, ken masejime vea kpe, di er Bibilo kpa i kaa nahan, ér: “Or u nan eren isholibo yô, ka nan nana kpe ye.”—Esekiel 18:4.

Ior mbagen mba cie mbakpenev. Mba ze ikyua a ijiir i iin ior ga, sha ci u ve na jighjigh ér kwagh ngu kposo u ka a due ken iyol i mbakpenev, u una fatyô u bulan mbaumav yô. Kpa orkpen nana fatyô u bulan or u nan lu uma yôô?—Ei, nana fatyô ga.

Mbagenev je yô ve na jighjigh ér mbakpenev vea fatyô u hingir ujijingi, hiden va sôron mbaumav. Nahan ka ve ver kwaghyan mape sha ci u mbakpenev. Kpa ior mba ve eren nahan la, sha mimi yô ve na kwagh u Aôndo a ôr sha mbakpenev la jighjigh ga. Aluer se na kwagh u Aôndo a ôr la jighjigh yô, mayange se cia mbakpenev ga. Shi aluer mimi je se mba a iwuese hen Aôndo sha uma u a ne se la yô, se tese iwuese la sha u eren kwagh u Aôndo a lumun a mi yô.

Kpa alaghga ú lu pinen a ishima you wer: ‘Aôndo una nder mbayev mba ve kpe la vea hide a lu uma je-o? Aôndo soo u eren nahan mimi je kpa?’ Ka kwagh ugen u se nenge sha mi je ne.