Zum u Mfe u Aôndo Una Iv Tar La
Ityough 19
Zum u Mfe u Aôndo Una Iv Tar La
1, 2. Ka nena yange i va hingir u vihin mgbe u Yehova?
TÔÔ wer orfan eev tsung nan sember been kwaghkperan u doonashe. Nan nenge vough nahan er ka kwagh u doon tsung—doo kenger tsô! Kpa ken tugh môm orihom va vihi kwaghkperan la. Se fa tsô, kwagh ne una na orfan eev la mnyoon kpishi je. A torough nan iyol u nengen shighe u a wuhe orifer la tsô! Man shi u fatyô u henen er á sar orfan eev la u nengen er a hide aa eev mbu nan sha mdoom ma mbu la yô.
2 Vough er orfan eev la nahan, Yehova yange gba kwagh u doon kenger sha mser u tar man mver u a ver uumace sha u la. Er a gba nomsoor man kwase mba hiihii mbara kera yô, a kaa er tom na sha tar cii u lu “u doon tsung.” (Genese 1:31) Adam man Ifa ve lu ônov mba Aôndo, man ve doo un ishima. Yange lu a ishimaveren i uma u ken msaanyol, u iengem ken hemen sha ci ve. Mimi, Satan yem a ve ken ihyembeato, kpa tomaveegh u kpilighyol u Aôndo la vihi gande sôron ga.—Genese 3:23, 24; 6:11, 12.
3. “Uma u a lu uma jim” la kanyi?
3 Aôndo wa ken ishima er una sôr akaa una ver vough. Ngu a isharen tsung u nengen er se mba sha gbenda u yange wa ishima sha hiihii la. Mlu wase u tiônôôn a mbamzeiyol ityô la ka “uma u a lu uma jim” la ga, sha ci u a yina sha kwagh u Yehova a lu a mi ken ishima la ca je. “Uma u a lu uma jim” u Aôndo a soo sha ci wase la ka “uma u tsôron” ken mbamlu mba vough.—1 Timoteu 6:12, 19.
4, 5. (a) A iv ishimaverenkeghen i Paradiso la nena? (b) Er nan i doo u se hen sha ishimaverenkeghen yase ken hemene?
4 Mfe u Aôndo la ka a na se tom sha ishigh ki Yehova. (Yakobu 4:17) Kpa hen sha averen a ú ember aluer ú yar tom a mfe la man ú naregh uwegh sha u zuan a uma u tsôron yô. Ken Mkaanem nam, Bibilo la, Yehova Aôndo nger foto u doonashe u tesen er uma la una lu ken tar u Paradiso u u mgbôghom yum ne yô. Ka mimi, er se lu ior mba Yehova yô se mba eren Aôndo tom sha ci u isharen i se lu a mi i zuan a injar la tsô ga. Se mba eren Aôndo tom sha ci u a doo se ishima. (Marku 12:29, 30) U seer yô, mba kimbin se sha u nan se uma sha ci u se mba eren Yehova tom yum ga. Uma u tsôron ka iwua i Aôndo. (Mbaromanu 6:23) Á lu se a iwasen kpishi u henen sha imba uma la sha ci u ishimaverenkeghen i Paradiso la ka i umbur se imba Aôndo u Yehova a lu yô—ka u lun a dooshima u a “ne mba ve lu keren Un la injar” yô. (Mbaheberu 11:6) Ishimaverenkeghen i yeghen ken uma wase man ken asema ase la ia na u se taver ishima ken atsan a ken tar u Satan ne.—Yeremia 23:20.
5 De se har asema a ase hegen sha ishimaverenkeghen i Bibilo i uma u tsôron ken Paradiso sha tar ken hemen la. Uma una lu nena zum u mfe u Aôndo una iv tar laa?
ARMAGEDON UNA KAREN YÔ —A LU TAR U PARADISO
6. Kanyi i lu Armagedon, man una er nyi hen uumace?
6 Er i vande tesen nahan, shi ca ga tsô Yehova Aôndo una tim botar u hegen ne. Tar ngu kporom ikua a kwagh u Bibilo i yer er Har–Magedon, shin Armagedon la. Ishemberti la alaghga ia na ior mbagenev vea hen er ka ityav mbi bughur mbi ityar i nôngon ityav vea va a mi la, kpa Armagedon ngu kposo a imba uitya la. Er Mpase 16:14-16 a tese nahan, Armagedon ka “ityav mbi iyange i vesen i Aôndo.” Ka ityav mbi mbi kou “utor mba sha tar sha won cii,” shin ityar cii ker yô. Wan u Yehova Aôndo, Tor u i tsough la, shi kpeghee una nyôr ken uitya. Kwagh u una due ker la akperan nga shami ga. Mba ve hendan a Tartor u Aôndo shi ve lu vegher u botar u Satan ne cii a kar a ve kera. Ka mba ve tese ishoon hen Yehova la tseegh vea war ye.—Mpase 7:9, 14; 19:11-21.
7. Ka hana Satan man azôv a na vea lu sha shighe u Mtemtor u Kristu u Anyom Dubu laa, man kwagh ne una lu a inja hen uumace nena?
7 Hen ase wer we ú war zege mtim la. Uma una lu nena ken tar u he u sha ityendezwa i Aôndo la? (2 Peteru 3:13) Gba u se ker a ker ahaba ga, sha ci u Bibilo i ôr se, man kwagh u̱ i ôr la ngirigh iyol tsô. Se fa ser a ngohol tahav hen Satan man azôv a na cii kera, a gesa ve ken ihungwa i i ze kweng i kwagheren a lu shimi ga la ken atô u Mtemtor u Yesu Kristu u Anyom Dubu la. Mayange akaauma a wan ifer, vihin tu la aa kera lu ken iuv, aa vaan a mzeiyol shi aa nôngon sha u tuul se yemen a mi ken aeren a a lu a bo sha ishigh ki Aôndo la ga. A lu zege mpeveryol tsô!—Mpase 20:1-3.
8, 9. Ken tar u he la, kanyi ia er atsan, iangev, man iyolbeene?
8 Shighe a karen yô, hanma inja uange cii ia kera lu ga. (Yesaia 33:24) Zum la mbasombonangahar vea mough sha, vea zende, vea yevese, man vea vine amar sha angahar a gbong gbong, a taver kpaa. Er ve vande lun ken uma u ungwan iov shio la nahan, mbakondonato vea ungwa akenge a iemberegh aa kase ve. A kondo mbaapirashe iyol er vea nenge a tar u injaa u lun a uimondon man mdoom hen ishigh vev yô. (Yesaia 35:5, 6) Ken masejime, vea nenge a ishiv mbi mbadoon ve ishima mbara! Alaghga hen shighe la ashe a ve aa hingir cing anshighe kpeghee sha mliam ma iemberegh.
9 Hen ase yôô! Ajingi a wan sha ashe aa kera lu ga, igôdô man mbaaga vea kera lu ga, mcimbim kpaa maa lu ga, ajiir a sôron anyi shin ayoughacii kpaa aa lu mayange ga! Mayange mbamzeiyol mba ken ishima man mbamzungu kpaa vea kera yange ior msaanyol ga. Iyev mbua kera iv a angev ga. Mbamlu mba iyolbeen kpaa a sôr ve. (Yobu 33:25) Se hemba lun a mkpeiyol, shi se hemba taver iyol kpaa. Hanma pepe yô se nder ken mnyam ma kundun iyol a agee a he, se iv a gbong gbong iyol man a saan se iyol u nyôron ken iyange i he i uma u dedoo man tom u nan mkom.
10. Ka nyi tom mba waren Armagedon vea ere?
10 Tom u iemberegh ua lu kpishi sha ci u mba vea war Armagedon la. Vea gema tar ua hingir paradiso. Hanma ivulugh ki tar u u hôngor ne cii a ese kera. Ishule i doonashe man ishule i ikayue ia tile sha ityough ki uya mba hôngorough man inya i lun a ihyôghonov la. Hanmaor nana ember ken uya mba mkpeyol, mba doon kpaa. (Yesaia 65:21) Er shighe a karen yô, ajiir a a lu paradiso la aa samber man aa zua zan zan tar cii ua ar sha iaven i mdoom ma yange Orgban ver ken sule u Eden tsuaa la. A lu kwagh u nan mkom kpishi u lun uwegh ken tom u mser la!
11. Mlu u uumace aa uikyasen mba tar man uma u ishôso una lu nena ken hemene?
11 Akaa ne cii a er a sha hemen u Aôndo sha er uikyasen vea vihi ga yô. Uumace vea lu ken bem a ishôso. A u ma ve gbaa sôngon ve daeng daeng tsô la yô, oruma una hide a hii u veren ishima sha tar dedoo, shi nengen sha a ve kpaa. Nenge ken ashe a ishima you er ugbaseela vea iyôngo, ubegha vea agumabua, vea lu yan kwagh imôngo la—man zendeinya kpaa vea lu ken mkpeyol. Wanikundan je kpaa nana lu a kwagh u cian hen inyamtoho ga, shin ior mbaaferev, mba vihin tu kpaa vea nzughul a mlu u kundu kundu u tar u he la ga. (Yesaia 11:6-8) Ngula a lu tar u he u bem tsô!
A GEMA UUMACE
12. Ka nena Yesaia 11:9 a lu ivin nyiana, man ka nena una iv ken Paradiso?
12 Yesaia 11:9 pase se er i hii ve kwaghbo môm una er shin tar ga yô. A kaa er: “Tar ua mgbough a mfe u TER er mngerem ma ngee shin zegemnger nahan.” I ôr kwagh ne ka sha ior sha ci u ishôso ia fatyô u ngohol “mfe u TER” shi van a mbamgem ken ave ga, sha er ieren ve la ka i lu a mhen shio yô. Kpa mfe u Orgban wase la ka a gema ior. Ka keng we kpaa ú vande van a mbamgem mbagen ken a we sha u yaren tom a mfe u Aôndo ne ken uma wou. Umiliôn mbagen kpaa ve er nahan. Sha ci u nahan yô, kwaghôron u profeti ne vande hiin u ivin kera kpaa sha mba ve lu eren Yehova tom la. Nahan kpa, shi a tese uwegh sha shighe u ior sha tar cii vea kar a aeren a sha inja i inyamtoho shin aeren a sha ipila la kera man vea hingir mba bem gbem sha won yô.
13. Kanyi ityesen ia za hemen sha tara?
13 A lu kwagh u kpilighyol tsô zum u tar cii ua iv a mfe u Aôndo la! A va a ityesen i vesen sha ikev i Tor Yesu Kristu man mba 144,000 nav mba wasen hemen mbara. Hen shighe la a hii u yaren tom a “uruamabera” mbahev. Ka keng mban a lu akaawan a Aôndo a i nger a a tese mba sha tar mbara a mi yô. (Mpase 20:12) Uumace vea hen, a lu ityav ga, kpa a lu bem. Ikyav mbi van a mtim cii a kar a mbi kera gbem sha won. (Pasalmi 46:9) A tese mba vea lu ken tar u he la u eren a uumace mbagen sha dooshima, sha icivir, man sha ieren i dedoo kpaa.
14. Ka nena tar ua lu kposo zum u uumace vea hingir tsombor u ken mzough môm laa?
14 Uumace vea hingir tsombor môm u ken mzough. Akaa a yangen mzough man mlu u anmgbianev la aa kera lu ga. (Pasalmi 133:1-3) Ya u ma or môm kpaa a kera gba u a senda sha u yangen mbaiv ga. Bem una tema tor ken hanma ishima, ken hanma ya, man ken hanma vegher u tar kpaa.—Mika 4:4.
MNDER U IEMBEREGH LA
15. Ka akum ahar a nyi a nder ve shin tara?
15 Ken Anyom dubu la, a va a mnder u shin ku. Mba yange ve er isholibo sha icighan jijingi u Aôndo sha apera, shin tahav mbu tomov nav, sha u eren ieren i lun kposo a mtese na shin hemen na a mgemishima shio la yô a nder ve ga. (Mateu 23:15, 33; Mbaheberu 6:4-6) Ka mimi, ka Aôndo una fa mba yange ve er isholibo sha imba gbenda la ye. Kpa a nder akum a lun kposo ahar—“mbaperapera kua mba ve lu perapera ga” la. (Aerenakaa 24:15) Er m-er kwagh u vough una lu yô, ka sha kwaghfan u kaan er mba a hii ngohol ve u lun uma sha tar la a lu mbaperapera, mbara mba ve er Yehova tom a ishoon la.—Mbaheberu 11:35-39.
16. (a) Ka unô vea lu ken “mbaperapera” mba a nder shin tar laa? (b) Ka mbaperapera mba tsuaa mba hana i hembe saren we u zuan ishigh a ve, man ka sha ci u nyi?
16 A u ma ve lu ungwan abaver a uitya, uaikôr, man ku la yô, mbatomov mba Yehova vea ngohol abaver a kpilighyol a mnder u shin ku la. A lu kwagh u saan iyol kpishi u ungwan mhidi u nomso man kasev mbaperapera anza er Abel, Enoki, Noa, Aberaham, Sara, Yobu, Mose, Rahabi, Rutu, Davidi, Eliya, Eseter nahan. Vea pase akaa a mbayiase a kpilighyol tsô er vea lu ôron vie vie akaa kpishi a yange er man a lu ken Bibilo la yô! Ka keng ve man mbaperapera mba ve sember kpen ken ayange angan ne cii a doo ve u ungwan kwagh u mkur u tar u Satan la man er Yehova yange tsegha icighan iti na shi pase mtemtor na kpaa yô.
17. Ka nyi iwasen mba jighjigh vea na mbagenev mba a nder laa?
17 Mbaperapera mban vea lu a iwasen kpishi zum u vegher u sha uhar u mnder la, zum u ubiliôn imôngo mba ve lu “perapera ga” la a pase ve ken ikyangenev mbi ku kera la! Uumace kpishi yange ve vande zuan a ian i fan Yehova ga. Satan yange ‘pir ve ashe a asema.’ (2 Mbakorinte 4:4) Kpa tom u Diabolo la a kar a ú kera. Mba ve lu perapera ga la vea hide ken tar u doonashe man u lun a bem kpaa. Ior mba i vande veren ve vough la vea ngohol ve man vea tese ve kwagh u Yehova man u Wan na u hemen, Yesu Kristu. Er ubiliôn kpishi vea hingir u fan shi lun a dooshima hen Orgban yô, mfe u Yehova una iv tar sha gbenda u kpilighyol.
18. Ú hen wer a lugh nena zum u ú lu ngohol mbadoon we ishima mba a nder laa?
18 Mnder u shin ku la una va se a msaanyol tsô! Ka an je nan vande yan ican sha ci u orihom wase ku ga? Mimi je, ka an nan vande zuan a ishimavihin zum u dooshima u kangenaan shin ijende i taveraa la ka i tôndo kera sha uange, iyolbeen, aikôr, shin ipila i ka i tôô uma u or u nan doo se ishima kera la ga? Nahan, hen ase, iember i mba mzough mba vea lu ken Paradiso la. Ungô man uter, ônov mbanomso man ônov mbakasev, ahuraior man anmgbianev, vea yevese vea za kuve mbagenev, a ahan zwa man mliam ma sha iember.
MLU U VOUGH KEN MASETYÔ!
19. Kanyi ivande ia er hen shighe u Anyom dubu laa?
19 Ken ato u Anyom dubu la cii, ivande i kpilighyol ia lu eren. Hen uumace yô, alaghga a lu kwagh u hemban kpilighyol u Mtemtor u Anyom Dubu u Kristu je la. Yehova una na zwa er Wan na a̱ yar tom a mtsera u nagh ku ipaan la sha hanma orjighjigh man mba lun a iko i wan mbanomso man mbakasev cii. Sha kwagh ne yô, isholibo cii a kar a i kera man a kende a uumace vea ar sha mlu u vough la.—1 Yohane 2:2; Mpase 21:1-4.
20. (a) U lun vough la a lu inja nena? (b) Ka hanma shighe mba vea war Armagedon man mba a nder ve la vea hii u lun uma jim jimi?
20 Mlu u vough! Una lu nena? A lu m-hidi u imba uma i Adam man Ifa yange ve ember cii man ve er isholibo hen Yehova Aôndo la. Sha mlu u iyolough, ken mhen, ken ishima, sha aeren, ken jijingi—hanma gbenda u a hen shami cii—uumace mba vough mbara vea kuma vough sha msoo u Aôndo. Kpa zum la ior cii vea lu a mluiyol môm shinii? Mayange ga cii! Akaa a Yehova a gbe la—ikon, uimondon, ishôso—ve cii ve tese se er a soo mbamlu mba kposo kposo. Uumace mba vough mbara vea lu a aeren man kwaghfan kposo kposo. Hanmaor nana ember uma er Aôndo yange wa ishima er i lu la. Mpase 20:5 kaa er: “Mbakpenev mbagenev mba ve shi her yô, ve nder ga saa anyom dubu la aa kuma ve.” Vough er zegeikpelaior i mbawaren Armagedon la nahan, mba a nder ve la vea hingir uma vindi vindi zum u vea ar sha mlu u vough a isholibo shio la.
21. (a) Kanyi ia er ken mkur u Mtemtor u Kristu u Anyom Dubu laa? (b) Kanyi ia mase eren Satan man mba ve lu ken vegher na la ciili?
21 Uumace mba vough mbara vea tagher ishigh a ikaren i masetyô. Ken mkur u Anyom dubu la yô, Satan man azôv na cii a pase ve ken ihungwa i i ze kweng la anshighe kpeghee man a na ve ian er ve̱ mase nôngon kwa u masetyô u geman ior kera hen Yehova. Mbagenev vea ver asaren a daeng aa hemba dooshima ve hen Aôndo, kpa a tôndo ihyembeato ne keenee. Yehova una tim mba soon ayol ave tseegh ne imôngo a Satan man azôv a na cii. Hen shighe la mba eren akaabo cii vea kar kera gbem sha won.—Mpase 20:7-10.
KANYI Ú ERE?
22. Kanyi ú lu a ishimaveren wer ú er ken Paradiso?
22 Mtsôr una samber hen mba Yehova Aôndo a doo ve ishima man ve tem ken tar u Paradiso la. Taver u henen imba iember i vea lu a mi la, man we kpaa ú fatyô u lun ken kwagh ne. Ityogholov, eev, ityomavee—mimi yô, akaaeren a uumace mba vough la aa hemba ityom i hembancii i mba ve hembe fan akaa ken tar u tse ne cii! Ityôkyaa yô, uumace vea lu a uma u vough man shighe u been mayange ga la. Hen ase sha kwagh u ú fatyô u eren er ú lu or u vough la. Shi hen, kpaa, sha kwagh u we man uumace mbagen ne hen sha akaa a Yehova a gbe la—hii sha akaa a nan iwanger a a lu ubiliôn imôngo sha tar la zan zan yem sha aveghemakaa a a ndahar i gande u nengen a mi sha ashe la. Hanma kwagh u uumace vea fatyô u eren cii una seer van a msaanyol hen Ter wase u sha u lun a dooshima la, Yehova.—Pasalmi 150:1-6.
23. Er nan ve uma u ken Paradiso una due ishima ga?
23 Hen shighe la uma una due ishima ga. Una hemba doon seer a seer cii er shighe a lu karen yô. Nenge ase, mkur ngu sha mfe u Aôndo ga. (Mbaromanu 11:33) Ken mtsôr la cii, akaa aa lu a henen shi aan a he a timen shami kpaa aa za hemen u lun. (Orpasenkwagh 3:11) Man er ú za hemen u henen kwagh u Yehova Aôndo la, ú za hemen u lun uma—ka di anyom kpeghee tsô ga kpa ka gbem sha won!—Pasalmi 22:26.
24, 25. Er nan ve i doo u ú lu uma sha ityesen i mfe u Aôndo hegene?
24 Mlu u ken hemen u ken paradiso shin tar ken msaanyol la ka kwagh u ú nôngo sha tahav ou cii shin u kimbi nyityô injar shami gaa? Mimi a kuma! Ka shami, Yehova naregh nau makuli u kpilighyol u mlu u iengemegh u ken hemen la. Makuli la ka mfe u Aôndo. Ú yar tom a mi kpa?
25 Aluer Yehova doou ishima yô, a doou u eren ishima na. (1 Yohane 5:3) Er ú lu zan hemen a ieren shon la, ú zua a averen tsô! Aluer ú yar tom a mfe u Aôndo yô, una fatyô u van we a uma u hemban lun a msaanyol ken tar u u lu a mbamzeiyol ne je kpaa. Man averen a ken hemen la ngee kpishi, sha ci u ngun ka mfe u una va a uma u tsôron je ne! Hegen ka shighe u vough u ú er kwagh shami je ne. i lu gbashima wou u lun uma sha inja i mfe u Aôndo. Tese dooshima wou hen Yehova. Civir icighanti na man tese wer Satan ka oraie. Ken vegher na yô, Yehova Aôndo, Imbor i kwaghfan u mimi man mfe la, una ember sha ci wou tsung ken zege ishima na i dooshima la. (Yeremia 31:3; Sefania 3:17) Man ú doo un ishima gbem sha won!
KAR MFE WOU
“Uma u a lu uma jim” la kanyi?
Armagedon una kar kera yô, kanyi ia er sha tara?
Ka unô a nder ve sha tara?
Ka nena uumace vea hingir mba lun vough man a mase karen ve?
Ishimaverenkeghen you ngi nena sha kwagh u Paradiso?
[Mbampin Mba Ngeren u Henen]
[Ufoto mba sha peeji 178, 179 la]
Ú ngu a ishimaverenkeghen i lun ken Paradiso, zum u mfe u Aôndo una iv tar la kpa?
