UKWAGHAÔNDO ka vea tesen ior vev u eren msen yô, ve hemba veren ishima sha akaa a or a er shighe u nan lu eren msen la, er u kenden ave sha, shin kenger sha kwavaôndo, shin guren anu inya, man ambaakaa la nahan, kua asember a msen man adua u eren. Nahan kpa, Bibilo wase se u kaven ér gba u se ver ishima sha akaa a ngara nahan ga, kpa se hemba veren ishima sha akaa a hange hange a a lu ken msen u eren la, er mpin ne a tese nahan, “Gba u se eren msen nena?”

Bibilo pase ajiir kpishi a mbacivir Aôndo sha mimi yange ve er msen yô, kua igbenda man akaa kposo kposo a yange ve er shighe u ve lu eren msen la kpaa. Yange ve er msen ving ving, shin sha ikyenge ikyenge, shighe u i doo u vea er nahan yô. Vea eren msen yô, shighe ugen ve kenger sha kwavaôndo gayô ve gure ve suwa ityough inya. Yange ve eren msen a ieev shin asa shin ityakeda i msen ga, kpa ve er msen sha kwagh u a lu ve ken ishima la jighilii ken mkaanem vem. Nahan, yange ve er msen nena ve Aôndo a ungwa?

Er se vande teren ken ngeren ugen la nahan, yange ve eren msen hen Aôndo u i yer un ér Yehova la tseegh. Kwagh u hange hange ugen kpa ngu ken msen u eren. I pase kwagh shon ken 1 Yohane 5:14 ér: “Ka vangertiôr u se lu a mi je ne; nyityôkwagh i se sôn Aôndo man i lu i sha ishima na cii yô, ngu a ungwa se.” Aôndo ungwan mbamsen mba ve zua sha awashima na yô. Inja i kwagh ne er nyi?

Kwagh u se er ve se er msen una zua sha awashima u Aôndo yô, saa se fa awashima na. Sha nahan yô, saa se hen Bibilo ve se fatyô u eren msen sha ishima i Aôndo ye. Nahan kwagh ne tese ér saa se za makeranta u henen Bibilo ve Aôndo una ungwa mbamsen asev yee? Ei, kpa Aôndo ver ishima ér se hen kwagh u a lu u sha ishima na la, nahan se ker u kaven ishima na shi se eren ishima na. (Mateu 7:21-23) Nahan gba u msen wase una zua sha kwagh u se lu henen la.

Er se lu henen kwagh u Yehova kua awashima na la, jighjigh u nan wase una lu taver seer a seer. Jighjigh u nan kpa ka kwagh u hange hange u a lu ken msen u eren yô. Yesu kaa ér: “Hanma kwagh u ne er msen ne sôn cii, aluer ne na jighjigh yô, a na ne.” (Mateu 21:22) Kpa, ka nyi i lu jighjigh u nana? Ka u gban nan kwagh jighjigh tsôô? Ei, kpa ka u nan jighjigh a kwagh u u nenge a mi ga, kpa ikyav i tese wang ér ngu yô. (Mbaheberu 11:1) Bibilo ôr akaa kpishi a tesen ér Yehova u se nengen a na ga la, ngu kpôô kpôô, a kuma u suur sha na, shi a kegh a kegh iyol u ungwan mbamsen mba ior mba ve ne un jighjigh yô. Heela tseegh ga, se fatyô u sônon ser jighjigh u nan wase a seer, shi ka i doo Yehova u nan se kwagh u a gbe se yô.—Luka 17:5; Yakobu 1:17.

Msen u eren shi wa kwagh u hange hange ugen ne kpa ker. Yesu kaa ér: “Or môm nana gba van hen Ter ga, saa nana kar her a Mo.” (Yohane 14:6) Inja na yô, Yesu ka gbenda u karen zan hen Ter, Yehova. Sha nahan yô, Yesu kaa a mbahenen nav ér ve eren msen ken iti na. (Yohane 14:13; 15:16) Kwagh ne tese ér gba u se eren msen hen Yesu ga, kpa se eren msen ken iti i Yesu, sha ci u ka Yesu a ne ve i hingir u se fatyô u zan hen icighan Ter wase u a lu wang la ye.

Kwagen la mbadondon Yesu mba ve hemba lun kôôsôô vea na la kaa a na ér: “Tere, tese se u eren msen.” (Luka 11:1) Ikyav tese ér yange ve lu kaan a na ér a tese ve akaa a hange hange er se pase nahan ga. Kpa ve soo u fan akaa a vea fatyô u ôron ken msen yô. Inja na yô, ve lu pinen ér, ‘Ka akaa a nyi nahan se fatyô u eren msen sha mini?’