Luka 6:1-49
-
Yesu, “Ter u Iyange i Memen” (1-5)
-
I bee orgen u uman uwegh iwan (6-11)
-
Mbaapostoli mba 12 mbara (12-16)
-
Yesu tese shi bee ior iangev (17-19)
-
Mba i saan ve iyol man mba kwagh a tser ve la (20-26)
-
U tesen mbahyomov dooshima (27-36)
-
De u ôron mbagenev ijir (37-42)
-
Mba fe kon sha atam a u (43-45)
-
Iyou i̱ i maa i̱ tsembelee yô; iyou i̱ i we i̱ ityô i taver ga yô (46-49)
6 Kwagen la, Yesu lu karen ken ishule i samuyia sha Iyange i Memen, nahan mbahenen nav lu tôndon asagher a uiyia, njighen ken ave yan.
2 Mbafarishi mbagenev mba nengen nahan yô, ve pine ér: “Er nan ne eren kwagh u tindi a yange ér i de eren sha Iyange i Memen ga nee?”
3 Kpa Yesu gema kaa a ve ér: “Ne ôr kwagh u Davidi yange er shighe u ijen kôr un kua nomsombaiorov mba ve lu a na imôngo la gaa?
4 Ne umbur er yange nyôr ken iyou i Aôndo za ngohol ikpenberedi i i ver sha ishigh ki Aôndo,* i tindi tese ér orgen môm nana̱ de ye ga, saa upristi tseegh, kpa un ya shi na nomsombaiorov mbagenev mba ve lu vea na la gaa?”
5 Maa a kaa a ve ér: “Wan u or ka Ter u Iyange i Memen.”
6 Sha Iyange i Memen igen la, a nyôr ken shinagoge a gba tesen. Orgen gema lu ker, u̱ uma* uwegh ku yanegh yô.
7 Nahan mbangerenatindi kua Mbafarishi haa ashe sha Yesu sha u vea nenge una bee or angev sha Iyange i Memen yô; ve lu keren ityôkyaa i nan un ibo.
8 Kpa a kav kwagh u ve lu henen ken asema a ve la, nahan a kaa a or u uman* uwegh la ér: “Mough sha, tile hen atô.” Maa a mough a za tile her.
9 Yesu maa kaa a ve ér: “Ne ior mban, de m pine ne kwagh, Ka nyi tindi a ne ian ér i er sha Iyange i Memene? Ka kwagh u dedoo shin ka kwagh u bo? Ka u waren uma shin ka u wuan unu?”
10 Gem kenger ve cica cii yô, a kaa a or la ér: “Nalegh uwegh ou.” Tsô a er nahan, maa uwegh nagh hide lu dedoo.
11 Kpa ishima vihi ve pev, nahan ve gba lamen ker ayol a ve sha kwagh u vea er a Yesu yô.
12 Sha iyange igen la, a za sha uwo u za eren msen, nahan a tsa eren msen hen Aôndo tugh kaka.
13 Sev mbu va aven yô, a yila mbahenen nav hen a na, maa a tsua iorov 12 ken a ve, a yila ve ér mbaapostoli.
14 Ve yô, lu Shimon, u na un iti igen ér Peteru la, man anmgbian na Anderia; Yakobu man Yohane; Filibu man Batolomiu;
15 Mateu man Toma; Yakobu wan u Alefeu, man Shimon, u i yilan ér “ortseenshima” la;
16 man Yuda wan u Yakobu, kua Yuda Isekarioti, u va tee un la.
17 Tsô a hungwa vea ve a va tile hen ijiir i lun vaanaa. Ikpela i mbahenen nav lu her, shi ikyumior i vesen due ken Yudia man Yerusalem kua haregh u hen kpemnger u̱ Tiru man Shidon la cii, va ér vea va ungwa akaaôron a na shi a bee ve iangev vev.
18 Ior mba ujijingi mba bov lu zan ve iyol la je kpa i dugh ujijingi mbara ken a ve kera.
19 Nahan ikpelaior la cii lu nôngon ér vea bende a na, sha ci u tahav lu duen ken a na been ve cii iangev.
20 Tsô a gema a kenger mbahenen nav, maa a kaa ér:
“Saan ne mba ne lu mbaibanave la iyol, sha ci u Tartor u Aôndo ka u wen.
21 “Saan ne mba ijen i ker ne hegen la iyol, sha ci u ne va ide.
“Saan ne mba ne vaan hegen la iyol, sha ci u ne va se.
22 “I saan ne iyol hanma shighe u ior ve ker ne ihyom man shighe u ve dugh ne ken nongo ve kera, man shighe u ve hee ne man shighe u ve vende ne shin ve vihi ne iti ér ne mba mbaaferev sha ci u Wan u or yô.
23 Ember nen sha iyange la shi tsue nen amar sha iember, sha ci u injar yen vese sha, gadia ka akaa a yange uter vev mba tsev kpa eren a uprofeti vough je la.
24 “Kpa kwagh a tser ne mbanyarev, sha ci u ne zua a mkpeyol wen bee cica cii.
25 “Kwagh a tser ne mba ne ide hegen la, sha ci u ijen ia va kôr ne.
“Kwagh a tser ne mba ne lu sen hegen la, sha ci u ne va zungwe shi ne vaa.
26 “Kwagh a tser ne, aluer ior cii mba ôron akaa a dedoo sha a ven* yô, gadia ka kwagh u yange uter vev mba tsev kpa eren a uprofeti mbaaiev je la.
27 “Kpa me kaa ne mba ne lu ungwan ne: Mbahyomov enev ve̱ za hemen u doon ne ishima, shi eren nen a mba ve ker ne ihyom la dedoo,
28 shi sônon nen iveren sha ci u mba ve we ne afan la, shi eren nen msen sha ci u mba ve tuhwan ne la.
29 Aluer or ta u sambe sha wasegh môm yô, gema ku gen kura kpa ver nan; shi aluer or tôô u ikyondo i haan iyol yô, de nana yem a ikyondo you i ken atô kpaa.
30 Hanma or u nan sôn u kwagh yô, na nan. Shi aluer or tôô u kwagh yem a mi yô, de kaan wer nana hide a mi ga.
31 “Shi er ne soo ner ior ve eren kwagh a ven la, ne kpa eren nen a ve nahan vough.
32 “Aluer ka mba ne doo ve ishima la tseegh ve doo ne ishima yô, ka ne a inja sha nyi? Gadia mbaasorabo je kpa ior ka vea tese ve dooshima yô, ve kpa ve tese ve dooshima.
33 Man aluer ne mba eren dedoo a mba ve eren a ven dedoo la tseegh yô, ka ne a inja sha nyi? Mbaasorabo je kpa mba eren nahan.
34 Shi aluer ka mba ne hen ner vea kimbi ne la tseegh ne ne ve injô* yô, ka ne a inja sha nyi? Mbaasorabo je kpa mba ne mbaasorabo injô sha er vea hide ve a mi nahan vough yô.
35 Kpa ne yô, mbahyomov enev ve̱ za hemen u doon ne ishima shi eren nen a ior dedoo shi naan nen injô, kpa de veren nen ishima ner i hide ne a mi ga. Nahan injar yen ia vese, shi ne lu ônov mba U Hemban Cii, sha ci u un eren dedoo a mba wuese kwagh ga man mbaaferev kpaa.
36 Zungwen nen mhôônom gbem, vough er Ter wen a zungwen mhôônom nahan.
37 “Shi de nen u ôron mbagenev ijir, nahan mayange a ôr ne ijir ga. De nen u puun mbagenev, nahan mayange a puu ne ga. Deen nen ior kwaghbo gbem, nahan ne kpa a de ne kwaghbo wen.
38 Naan nen ior kwagh, nahan ior kpaa vea na ne. Vea haa ne ikyaren i dedoo shin ikyum, i í kindigh shi i yoghol, i̱ iv poo i̱ lu haan inya yô. Sha ci u ka er ne eren a mbagenev la, ve kpa vea er a ven ye.”
39 Tsô shi a ôr ve injakwagh ér: “Orapirashe nana fatyô u hemen orapirashe ugen gbenda kpa? Ve uhar cii vea za gba shin ihyungwa ga zee?
40 Orhenen hembe or u tesen nan ga, kpa hanma or u i tese nan tsembelee yô, nana lu er or u a tese nan la nahan.
41 Man er nan ve u lu nengen a anivurkon ken ishe i anmgbian wou, kpa gungurkon u ken ishe you la yô, u nengen a mi ga?
42 A er nan man u kaa a anmgbian wou wer, ‘Anmgbian, de m dugh anivurkon u a lu ken ishe you la,’ kpa we iyol you u gem u nengen a gungurkon u ken ishe you la ga? We orwanatseregh! Hii dughun gungurkon u ken ishe you la cii ve u nenge tsembelee, u dugh anivurkon u a lu anmgbian wou ken ishe la ye.
43 “Kon u injaa môm ngu um ityamegh ki bough ga. Shi kon u bo môm ngu um ityamegh ki dedoo ga.
44 Hanma kon yô, mba fe u sha ityamegh ki u. U tesen ikyav yô, ior mba kor atam a tur hen kon u saa ga, shi mba zer atam a wain sha ageva ga.
45 Or u dedoo ka nan ôron akaa a dedoo a nan koso ken ishima i nan la, kpa iferor yô, ka nan ôron aferakaa a nan koso ken vanger u nan la. Sha ci u ka kwagh u or hembe henen ken ishima la zwa u nan ka u ôron ye.
46 “Er nan ka ne yilan mo ner, ‘Tere! Tere!’ kpa ne eren akaa a m kaa la ga?
47 Hanma or u nan ve hen a mo shi nan ungwan mkaanem am shi nan eren sha mi la, me tese ne er nan lu yô:
48 Nan ngu er or u nan lu maan iyou ve nan time i ze shin inya, nan za we i̱ ityô sha vande nahan. Tsô ura nôô kpishi, nahan ifi sar avenge, maa mngerem kua va ta sha iyou shon, kpa mngerem mara taver kuma u tenger a i̱ ga, sha ci u i maa i̱ taver.
49 Gema di or u nan ongo kpa nan er sha mi ga yô, nan ngu er or u nan maa iyou i nan sha inya a u wan i̱ ityô shio nahan. Ifi kua va ta sha iyou shon, nahan fese je i̱ yôhôr vindi vindi i̱ haa inya.”
Ngeren mba shin kpe
^ Shin “beredi u sha ishi.”
^ Shin “kpe.”
^ Shin “kpen.”
^ Shin “mba wuese ne.”
^ Ka, “u nan injô a u pinen mtsera shio” je la.
