U Fa Kpa?
Er nan ve ior mba yange ve lu Mbaiserael ga kpa lu ken shoja i Tor Davidi?
YANGE lu ior Mbaiserael tseegh ve lu ken ikyumutya i Tor Davidi la ga. Ikyav i tesen yô, Seleki yange lu Oramon, Uria di lu Orhiti, Itema gema lu Ormoabi. a (1 Kron. 11:39, 41, 46) Ikyumutya i Davidi igen yange i wa “Mbakereti man Mbapeleti kua Mbagati” kpa ker. (2 Sam. 15:18) Ikyav tese ér Mbakereti kua Mbapeleti yange ve lu anmgbianev mba Mbafiliti. (Esek. 25:16) Man a shi nan kpa, Mbagati yange ve lu ior mba ken gar u Filiti u lu ken Gati la.—Yos. 13:2, 3; 1 Sam. 6:17, 18.
Er nan ve Davidi yange de ior mba ken akuraior agen ne ér a lu ken ikyumutya na? Sha ci u yange lu a vangertiôr ér vea er kwagh a na sha mimi, u hemban je yô, vea va Yehova ahenge ga. Ikyav i tesen yô, takeda u The New Interpreter’s Dictionary of the Bible la ôr kwagh u Mbakereti kua Mbapeleti kaa ér: “Yange ve eren kwagh a Davidi sha mimi shighe u lu tor la, kua ken ashighe a taver je kpaa.” Yange ve er kwagh a na sha mimi nena? Shighe u “ior i Iserael cii” undu Tor ve Davidi la kpa “gbilinor ugen lu, . . . iti na ér Sheba” vea Mbakereti man Mbapeleti yô, ve undu Davidi ga, ve za hemen u eren kwagh a na sha mimi, shi ve wase Sheba kpa de ihembeato na i hii la. (2 Sam. 20:1, 2, 7) Hen shighe ugen la di, wan u Tor Davidi Adoniya yange soo ér una kar a tema tor sha ityou ki Solomon. Kpa Mbakereti man Mbapeleti sue Davidi shi wase un ver Solomon tor, sha ci u lu Solomon Yehova tsua ér a tema tor aluer Davidi kera ngu ga ye.—1 Utor 1:24-27, 38, 39.
Or ugen u lu ken ikyurior igen u un kpa sue Davidi yô, lu Itai Orgati. Itai vea ikyumutya na i kuman er 600 nahan yange ve sue Tor Davidi shighe u wan na Abesalom hendan a na, shi soo ér una ngohol nomsombaiorov mba Iserael asema sha er ve de kera ze hen tor ga la. Sha hiihii la, Davidi yange kaa a Itai ér ngu or u ken ikyur igen, sha ityôkyaa ne yô, a de nenge num sha ci na ga. Kpa Itai kaa a na ér: “Er Ter a lu u uma ne, man er terem tor kpaa a lu uma, mimi je, henpe terem tor una lu la, shin a lu ku shin a lu uma, ka heregh wanakiriki wou kpaa una lu ye.”—2 Sam. 15:6, 18-21.
Itai yange eren kwagh a Davidi u Yehova tsua un ér a lu tor la sha mimi
Shin er Mbakereti man Mbapeleti kua Mbagati ve lu ior mba ken akuraior agen nahan kpa, yange ve fa ér ka Yehova a lu Aôndo u mimi ye shi ka un a tsua Davidi ér a lu tor ye. Nenge er yange a saan Davidi iyol u lun a azende a mimi ne sha wono!
a Tindi u Aôndo u i nger ken Duteronomi 23:3-6 la, yange venda ér Mbaamon kua Mbamoabi ve de nyôron nongo a Mbaiserael ga. Nahan cii kpa, aluer Oramon shin Ormoabi nan tsua ér nana civir Aôndo u mimi la yô, nana fatyô u lun ken nongo u Iserael. Nenge takeda u Insight on the Scriptures, Tihi u sha 1, peeji 95.
