1. Tese ikyav i er i hii ve i gbe hange hange u se fa shighe u se lu ker, shin kwagh u a lu zan hemen la yô. (Nenge foto u a lu sha mhii u ngeren ne la.)

KA KOM u a hii mkohol yô, orkyôn u mkohol la mough unde sha tsembe, sugh hanma or za van. Shighe kuma u a hii u kuhwan ityogholough. Mba ve ve mkohol la cii fa je ér, shighe kuma u vea tema inya ve. Ve soo u ungwan ityogholough mbi doon tsung, shi ve kegh iyol u ungwan akaaôron a a lu nan la. Kpa alaghga, ior mbagenev ve kegh atô a orkyôn u mkohol la ga, shi ve fa er i hii u kuhwan ityogholough kpaa ga. Ve fa ér mkohol hii ga, nahan mba zenden kwagh ve kera garemaa shin mba lamen a azende a ve. Kwagh ne tese se kwagh u una fatyô u eren se, aluer se fa shighe u se lu ker ga, shin kwagh u a lu zan hemen la ga yô. Kwagh ne tese se kwagh u vesen sha ci u ica a kera gba ga tsô, kwagh u a hembe mkohol la a yem zende zende yô, una er, nahan gba u se wa iyol se keghen a kegh. Ka nyi kwagh laa?

2. Yesu yange kaa a mbahenen nav ér “kuran nen” sha ci u nyi?

² Shighe u Yesu Kristu lu ôron kwagh u ‘mkurtar’ la, a wa  mbahenen nav kwagh ér: “Ver nen ishima, kuran nen, gadia ne fa zum u shighe la una kuma ga.” Been yô, shi a wa ve kwagh kwa kimbir kimbir ér: ‘Kuran nen.’ (Mat. 24:3; ôr Marku 13:32-37.) Mateu kpa shi pase kwagh u mkaanem ma Yesu ôr a mbahenen nav ér ve lu per ne la, ér: ‘Kuran nen, gadia ne fa iyange i Ter wen Una va la ga. . . . Kohol nen iyol gadia ka hen shighe u ne ver ishima ga la je, Wan u or Una va ye.’ Shi a hide a kimbir ér: ‘Kuran nen gadia ne fa iyange shin ihwa kpaa ga.’—Mat. 24:42-44; 25:13.

3. Se mba ongo icintan i Yesu la sha ci u nyi?

³ Er se lu Mbashiada mba Yehova yô, se mba nengen icintan i Yesu ne ashe ashe ga. Se fa je ér se mba ken “shighe u mkur” cou cou man ica a kera gba ga tsô, “zegecan” la una va! (Dan. 12:4; Mat. 24:21) Se mba nengen er i lu nôngon ityav mbi vihin tsung, shi ieren i dang man mvende u vendan atindi ve lu seer a seer, shi ayôôso a kwaghaôndo man m-ban u kwaghyan man ubombauangev kua ityar mbi tenger mbi lu zan hemen sha tar yô. Se fa je ser ka ior mba Yehova ve lu pasen loho u Tartor hanma ijiir cii sha tar ye. (Mat. 24:7, 11, 12, 14; Luka 21:11) Se mba keghen shighe u Ter una va sha u va kuren awashima u Aôndo la.—Mar. 13:26, 27.

4. (a) Er nan ve se ne jighjigh ser, Yesu fa shighe u Armagedon una va la hegene? (b) Er se fe shighe u zegecan la una va ga nahan kpa, ka nyi se fe?

⁴ Hanma mkohol yô, ka i ver shighe jighilii u hiin un. Nahan kpa, sea nôngo nan nan kpa, se fatyô u fan inyom shin iyange shin ihwa jighilii i zegecan la una hii ga. Shighe u Yesu lu shin tar la, a kaa ér: “Kwagh u iyange la man shighe la yô, ma or fa ga, shin mbatyomov mba Shaav shin Wan kpaa ga, saa Ter tseegh.” (Mat. 24:36) Kpa i na Kristu tahav Sha, sha u a nôngo ityav a tar u Satan ne yô. (Mpa. 19:11-16) Nahan yô, ka a inja u se kure ikyaa ser, er i lu Yesu i gbe u una va hemen ityav mbi Armagedon la yô, ikyav tese wang ér a fa shighe u mkur una va la hegen. Kpa se yô, se fa ga. Nahan gba hange hange u se kuran zan zan zegecan la una kar van. Kpa Yehova yô, fa shighe u kwagh ne una er la vough. A ver shighe u mkur una va la jighilii. A fa er shighe a kera shi i vese ga, u zegecan la una hii yô, shi “una bunde ga.” (Ôr Habaku 2:1-3.) Er nan ve se fe ser shighe u zegecan la zurumu?

5. Ôr kwagh u a tese ér hanma shighe cii Yehova ka a kure akaaôron a na a profeti la sha shighe vough yô.

⁵ Hanma shighe cii, akaaôron a profeti a Yehova nga a kure sha shighe vough! Nenge ase er yange yima Mbaiserael sha ikyev i Mbaigipiti sha shighe u kaa ér una yima ve la vough yô. Mose yange ngur ôron kwagh u uwer u Nisan 14, inyom i 1513 C.S.Y. (Cii man Shighe u Yesu) la yô, a kaa ér: ‘Anyom deri unyiin man ikyundugber nga kar yô, sha iyange la je, akumaior a TER cii due ken tar u Igipiti.’ (Eks. 12:40-42) “Anyom deri unyiin man ikyundugber” la hii shighe u Yehova ya ikyur a Aberaham ken inyom i 1943 C.S.Y. la. (Gal. 3:17, 18) Shighe kar yô, Yehova kaa a Aberaham ér: “Fa dedoo, tsombor wou ua lu shir ken tar u u lu u ve ga yô, ua er tom u ikpan man á er u ican anyom deri unyiin je.” (Gen. 15:13; Aer. 7:6) A shi nan kpa, “anyom deri unyiin” a lu u ônov mba Aberaham vea ya ican ne la hii ken inyom i 1913 C.S.Y. la, zum u Ishemael naha Isaka tar, shighe u Isaka sember den atumba la, zan zan va kure  shighe u Mbaiserael due ken Igipiti ken inyom i 1513 C.S.Y. la. (Gen. 21:8-10; Gal. 4:22-29) Anyom 400 ken ijime je, Yehova vande veren shighe jighilii u una va yima ior nav yô!

6. Se fe ser Yehova una va yima ior nav sha ci u nyi?

⁶ Yoshua, u lu môm ken ior mba i due a ve ken Igipiti la, yange umbur Mbaiserael cii ér: “Ne fa ken asema a en cii kua ken uuma enev cii kpaa, ma kwagh môm sha akaa a dedoo a TER, Aôndo wen, ter sha a ven la bunde ga, a cii i kure ne a vough, ma kwagh môm bunde ga.” (Yos. 23:2, 14) Se kpa se fa wang ser, ityendezwa i Yehova a er a vese ér una va yima se sha shighe u zegecan la ia bunde ga. Nahan aluer se soo u waren mtim u tar ne yô, gba kpee u se kuran.

7, 8. (a) Yange lu tom u nyi mbakuran lu a mi sha ayange a tsuaa la, man kwagh ne tese se nyi? (b) Ôr kwagh u una fatyô u eren aluer mbakuran gba mnyam yô?.

⁷ Se fatyô u henen er i lu hange hange u se kuran yô, ken kwagh u yange er sha ayange a tsuaa la. Sha ayange a tsuaa la, i wa ugar mba vesen kpishi er Yerusalem nahan girgar u taven sha tsung. Girgar la yange a kura ior mba ve lu ken gar la sha ikyev i mbaihyomov vev, shi a lu a ijiir i taven sha tsung, ape ior ve tema, ve kuran gar shon yô. Yange i ver ior sha girgar la man sha hundagar sha u ve kuran un tugh man atetan cii yô. Yange i gba u vea ôr ior mba ve lu ken gar shon la, shighe u kwaghbo a lu van yô. (Yes. 62:6) Yange gba u mbakuran mbara vea kuran shi vea lu per hen ajiir a ve lu kuran la, gayô ior kpishi vea saa ku.—Esek. 33:6.

⁸ Josephus u yange nger yiase i Mbayuda la pase er Mbaromanu yange ve nyôr ken Yerusalem ken inyom i 70, shighe u Yesu kera lu shin tar ga la yô. Ior mba ve lu kuran vegher u gar la ugen la ve gba mnyam. Sha nahan yô, ushoja mba Mbaromanu fatyô u nyôron ken gar la. Mba nyer ker yô, ve kar fese ve yem ken tempel la ve za nande un, nahan kwagh ne kure vegher u masetyô u zegecan u va sha Mbayuda mba ve lu ken Yerusalem la.

9. Ka nyi ior kpishi ve fe nyian ga?

⁹ Ityar kpishi nyian ver “mbakuran” sha akighir a tar ve, shi ve wa mbaanar mba injaav mba kuran akighir la, mba i sember varen yô. Ka ve kuran sha u vea yange or shin ma kwagh u una er tar ve kwaghbo la, a de nyer ga yô. Nahan kpa, “mbakuran” mbara ka ve nenge a iferkwagh i uumace man ugomoti mbagenev vea fatyô u eren tar ve la tseegh. Kpa ve kera fa er Aôndo a ver gomoti sha, u Kristu a lu hemen la ga, kua akaa a gomoti shon a lu eren la kpaa. Shi er ica kera gba ga tsô, gomoti la una tim akuraior cii kera nahan kpa ve fa ga. (Yes. 9:6, 7;56:10; Dan. 2:44) Sha nahan yô, aluer se mba per ken jijingi shi se mba kuran yô, shighe u iyange i ijirigh la i ve cii, ia bur se a bur ga!—Ps. 130:6.

10, 11. (a) Ka nyi i gbe u se wa ikyo sha mini, man ka sha ci u nyi? (b) Ka nyi i tese u wang ér Diabolo pir ior ashe a ishima sha u ve de nengen a akaaôron a profeti a ken Bibilo la ga?

¹⁰ Tôô wer orkuran ugen ngu per hen ijiirtom na tugh kaka. Kpa ka va zurum u sev a av yô, maa a vôr shi mnyam hii u kôron un. Se kpa, er se lu zurum a mkurtar yô, kape a lu hemban taver se u lun per je la. Aluer se mba kuran ga yô, kwagh la una vihi je a gande! De se nenge akaabo atar a se wa ikyo sha mi ga  ve, a a na se kera lu per ga, shi se de u kuran la.

¹¹ Diabolo ngu nôngon ér ior ve gba mnyam ma ken jijingi. Er kera shi ica ga u Yesu una kpe la, a ta mbahenen nav icin sha kwagh u “tor u tar ne” la kuma acin atar. (Yoh. 12:31; 14:30; 16:11) Yesu yange fa ér Diabolo una na ior vea za hemen u lun ken ime sha kwagh u akaa a ken jijingi, sha er vea kera lu per, er akaaôron a profeti a Aôndo a sha kwagh u akaa a ken hemen la a tese la ga. (Sef. 1:14) Satan ngu eren tom a kwaghaôndo u aiegh sha u pirin ior ashe a ishima. Ka ieren i nyi u nenge a mi ken ior mba u pasen ve kwagh laa? U kav er Diabolo a “pir ve ashe a asema” sha er ve de fe er mkurtar a zurum shi Kristu a lu hemen ken Tartor u Aôndo la hegen ga kpa? (2 Kor. 4:3-6) Ashighe kpishi ka sea pasen ior ser mkur zurum yô, ve kaa ér, “Kwagh gbam sha mi ga.” Jighilii yô, ka sea soo u pasen ve kwagh u ica a kera gba ga tsô una tser tar ne yô, kwagh a gba ve sha mi ga.

12. Er nan ve i gbe u se de ser Satan a bume se ga?

¹² De lumun wer ieren i ior mba ve we ikyo sha akaaôron a profeti ga la, i yange u u kuran ga. Kera kpa u lan kwagh u a lu zan hemen ga. Paulu yange kaa a mba ve lu civir Aôndo vea na imôngo la ér: “Ne ayol a en ne fa doo doo, iyange i Ter ngi van er ormbaiv ka nan va tugh nahan.” (Ôr 1 Mbatesalonika 5:1-6.) Yesu ta se icin kaa ér: “Kohol nen iyol nahan; gadia ka hen shighe u ne ver ishima ga la, man Wan u or Una va ye.” (Luka 12:39, 40) Ica a kera gba ga tsô, Satan una bume ior kpishi vea hen ér “bem, man mkpeyol” ngu shin tar, kpa a lu mimi ga. Una tsugh ve vea hen ér zayol kera ngu shin tar ga. Se di ye? Aluer se mba “per geng ge geng” yô, iyange i ijirigh la “ia kera va tser [se] er ormbaiv nahan ga.” Ka nahan ve i gbe u se ôron Mkaanem ma Aôndo a ne i nger la hanma iyange, shi se gbidyen kwar sha kwagh u Yehova a lu ôron se la ye.

13. Jijingi u taregh ngu benden a uumace nena, man se palegh un nena?

¹³ Jijingi u taregh ngu nan ior mba yaven ken jijingi. Ior kpishi de akaa a a lu hange hange ken uma ga la ya tor ken a ve, nahan kera mba “mbaibanave ken jijingi” ga. (Mat. 5:3) Maa ve  yem keren akaa a taregh aa ka a kende “isharen i iyolough, man isharen i ashee” la. (1 Yoh. 2:16) Shi akaa a i eren ken tar ne sha u nan ior msaanyol la na yô, ve hingir mba “iember i iyolough i hembe doon ve” yô, shi hanma inyom yô, ka i seer duen a igbenda i he i meen ior sha gbaa ne. (2 Tim. 3:4) Ka nahan ve Paulu yange kaa a Mbakristu ér, “de veren nen iyol ian sha u i̱ kende asaren a i la ga” ye, sha ci u kwagh ne ka a na se hingir u gban mnyam ken jijingi.—Rom. 13:11-14.

14. Ka icintan i nyi i lu ken Luka 21:34, 35 laa?

¹⁴ Se soo ser i lu jijingi u Aôndo a hemen se ye, i de lu jijingi u taregh ga, sha ci u ka jijingi ne Yehova a er tom a mi u wasen se u fan akaa a ken hemen la wang ye. ^[1] (1 Kor. 2:12) Nahan kpa, gba u se fa ser saa ka zegekwagh una na or nana hii u gban mnyam ken jijingi ga, kwagh u kiriki kpa una fatyô u nan or gban mnyam, aluer kwagh shon yange nan u eren akaa a ken jijingi yô. (Ôr Luka 21:34, 35.) Alaghga mbagenev vea naha se tar sha ci u se mba kuran yum, kpa kwagh la a de hingir ityôkyaa i se de u kuran ga. (2 Pet. 3:3-7) Gba kpee u se kohol imôngo a mba se civir Aôndo a ve la hanma shighe, ken mbamkombo mba tiônnongo, ape jijingi u Aôndo a lu la.

15. Lu nyi i er Peteru man Yakobu kua Yohane, man kwagh la una fatyô u eren se nena?

¹⁵ Mbamyen asev ka ve na i taver se kpishi u lun per. Yesu yange fa er uumace ve yen shi ve lu a mbamshi yô. Nenge ase kwagh u yange er hen tugh mbu kpernan i wua Yesu la. Yange gba u Yesu una sôn Ter na ken msen ér a wase un, sha er una za hemen u tilen sha mimi yô. Yesu yange kaa a Peteru man Yakobu kua Yohane ér ‘kuran nen,’ maa un di yem u za eren msen. Nahan kpa, ve fa er gba hange hange u vea kuran ga. Er u ma ve lu kuran la yô, ve gema ve de myen ve na ve gba mnyam. Kpa Yesu yô, er vôr nahan kpa, lu per, lu eren msen hen Ter na sha gbashima. Lu kwagh u mbahenen nav mba ve lu vea na la kpa, ma ve lu eren je la.—Mar. 14:32-41.

16. Inja i u “kuran” la ér nyi, man Yesu tese se er se er kwagh ne ken Luka 21:36 nena?

¹⁶ Ka nyi ia wase se ve se za hemen u “kuran” shi se wa agoyol se lu keghen iyange i Yehova laa? Gba u a sar se tsung u zan hemen u eren kwagh u vough. Kpa ka cii la ga. Yange ka va shin ayange kpuaa u Yesu una kpe yô, a kaa a mbahenen nav ér ve za hemen u sônon Yehova ken msen ér a wase ve. (Ôr Luka 21:36.) Nahan, aluer ka u se za hemen u kuran yô, gba kpee u se eren msen sha gbashima.—1 Pet. 4:7.

17. Se er nan ve se fa ser se wa agoyol se mba keghen kwagh u ica a gba ga tsô una er laa?

¹⁷ Er Yesu yange kaa ér, mkur una va ‘shighe u se ver ishima ga la’ yô, hegen ka shighe u gban mnyam ken jijingi shin yemen u keren sarbang u tar u Satan ua na se la ga, kua akaa a sar se u eren la kpaa ga. (Mat. 24:44) Aôndo man Kristu ôr se akaa a ica a gba ga tsô, se zua a mi la ken Bibilo, man er se za hemen u kuran yô. Gba u se na ishima sha akaa a ken jijingi, man mlu wase vea Yehova kua sha akaa a Tartor. Gba u se fa shighe u se lu ker ne kua akaa a a lu zan hemen la kpaa, sha er se wa agoyol se lu keghen kwagh u a lu van ken hemen la yô. (Mpa. 22:20) Uma wase ngu sha zongo!