Ka i gba u ankaam mba lun a ingyur man agbeen vea lu tsembelee ve, vea fatyô u purugh shi unden sha kwagh shi peven fan kwagh u a lu zan hemen ape ve lu la ye. Ikyav i tesen yô, shie u iyar shin akor a ishondokye ne i ile yô, ngi kera fetyô u zenden shin lamen a ishondo igen shin ungwan ihuma kwagh tsembelee ga. Or u tôvon sha kwagh u annyamev ugen, iti na ér Alexander Hackmann, a kaa ér: “Ankwagh u lun a ingyur man agbeen môm u lun côu côu kpa ngu ga. Ka a lu hen inya côu côu nan kpa, ve fa er vea er ve, vea lu tsembelee yô.”

 Nenge ase: Hackmann vea ahuraior a na mba ve hen kwagh u annyamev imôngo yô, tôv sha kwagh u ishondo i i yer ér Carpenter Ant (Camponotus rufifemur) ne i ovur shin i kiren inyar shin akor a ve a mi yô. Nahan ve mase kaven er ishondo ne ka i ovur ankaam kposo kposo mba ve var sha inyar shin akor ve la sha u hulen agbeen maa kôron iyar shin akor la ovur ker. Ka ve er tom a kwagh u ve lu a mi sha ave hurhur er ka brôôshi la u ovur ankaam mba waren kehen. Ka una nguren ovur ankaam ma kiriki yô, a mase ovur ve hen aan a hen ato u ankaam mba hurhur mba ve lu un iyar shin akor na la. Aan ne ka a lu di er aan aa lu hen atô u ice i ve lu a mi sha iyar shin akor la nahan. Maa a mase dughun acôghor aa var un sha akor aa hembe ndahar je a yen sha gwarce ica la sha ikyeende i a lu a mi sha ave hurhur la.

 Nenge ase ken vidio ne er ishondokye i i yer ér carpenter ant la i lu ovur iyar shin akor a i yô.

 Hackmann vea ior nav nenge ér kwagh u ishondeikye ne ka i eren sha u ovur iyar shin akor a i la, a fatyô u eren tom a mi sha ajiir a ikyômpeni i varen akaa yô. Ikyav i tesen yô, kwagh la una fatyô u wasen kpishi u sôron ijiir lun tsembelee zum u i lu varen ankaam mba wan ken ikyav mbi sha usu mbakiriki mba ka i gba u a var hen ijiir i i lu côu côu ga la; sha ci u ii ka ia lu kpuaa tseegh kpa kwagh u i var la a va lu a zayol.

 We u nenge nena: Kwagh u ishondeikye i i yer ér carpenter ant a kiren shin ovur a iyar shin akor a i la yange gba duen abu tsôô? Shin i gba a gba?