Ior kpishi ka i kaa a ve ér a fatyô u fan or u yange nan nger Bibilo la ga. Ashighe kpishi Bibilo ka i pase mba yange ve nger i̱ la wang. I hii avegher a Bibilo agen sha asember er “kwagh u Nehemia,” man “mpase u Yesaia,” kua “kwaghôron u TER u a va hen Yoel” nahan.—Nehemia 1:1; Yesaia 1:1; Yoel 1:1.

 Mbangeren Bibilo kpishi yange ve kaa ér ve mba ngeren kwagh ken iti i Yehova, u a lu Aôndo u mimi tswen la, shi ka un yange kôôm mbamhen vev ye. Uprofeti mba yange ve nger Ruamabera u ken zwa Heberu la, pase hemba acin 300 ér: “TER ngu kaan nahan ér.” (Amoshi 1:3; Mika 2:3; Nahum 1:12) Aôndo yange na mbangeren Bibilo mbagenev loho na sha ikyev i mbatyomov.—Sekaria 1:7, 9.

 Iorov mba kuman er 40 nahan yange ve nger Bibilo ken atô u anyom a hemban 1,600. I er tom a nomsombaiorov mbagenev u ngeren ityakerada i Bibilo imôngo. Jighilii yô, Bibilo ngi a ityakerada ker 66. Ityakerada 39 ker ka i ken Ruamabera u ken zwa Heberu, u ior kpishi ve yer ér Ikyuryan i Tse la, ityakerada 27 la di ka i ken Ruamabera u Mbakristu u ken zwa Grika, u ior kpishi ve yer ér Ikyuryan i He la.