Kain u lu wan u hiihii ken ônov mba Adam man Ifa la, yange vôso môm ken anmgbianev nav mba kasev shin môm ken ônov mba kasev mba anmgbianev nav mba nomso man mba kasev mar la. Aluer se time sha kwagh u Bibilo i er sha kwagh u Kain man tsombor na yô, alaghga se kpa se kure ikyaa nahan.

Akaa a mimi a i er sha Kain man tsombor na yô

•   Ior cii due ken tsombor u Adam man Ifa. “Ka sha [Adam] je man A er akuraior cii ye, sha u ve̱ tema sha won cii.” (Aerenakaa 17:26) Kwase u Adam, Ifa di hingir “ngô u uuma cii.” (Genese 3:20) Sha nahan yô, ikyav tese wang ér lu ken tsombor u Adam man Ifa la, Kain zua a kwase ye.

•   Lu Kain vea anmgbian na Abel ve lu ônov mba hiihii ken ônov mba Ifa mar la ye. (Genese 4:1, 2) Yange mba zendan Kain kera sha ci u a wua anmgbian na yô, a kaa ér: “Hanma or u nana kohol mo nana wuam je.” (Genese 4:14) Lu ana Kain lu ciana? Bibilo kaa ér Adam “mar ônov mba nomso man mba kasev.” (Genese 5:4) Nahan ikyav tese ér, alaghga lu ônov mba Adam man Ifa mbagenev mbara Kain lu cian ye.

•   Shighe u i gba uumace ica lu a gba ga la, kwagh u or vôson kwase shin nom hen tsombor u nan la, lu kwagh u bo ga. Ikyav i tesen yô, orjighjigh Aberaham kpa yange vôso wan u ter na u kwase. (Genese 20:12) Kwa hiihii u i va venda imba ivese la yô, lu sha shighe u tindi u Mose la. Hen shighe ne nahan, Kain kpe kera anyom kar uderi imôngo. (Levitiku 18:9, 12, 13) Ka inja er sha ayange la yô, anmgbianev vea vôso ayol ave vea mar mbayev kpa, ve faan gban iwan, er nyian nahan ga yô.

•   Bibilo pase yiase i Adam man Ifa kua tsombor ve sha gbenda u vough. I pase kwagh u tsombor u Adam la vie vie ken takerada u Bibilo u Genese, u Mose nger la tseegh ga, ken ngeren mba ior mba ngeren yiase, er Esera man Luka mbara kpa i pase kwagh ne ker vie vie. (Genese 5:3-5; 1 Kroniku 1:1-4; Luka 3:38) Mbangeren Bibilo ôr kwagh u uma u Kain la ér, ka kwagh u yange er sha ayange a tsuaa la yô.—Mbaheberu 11:4; 1 Yohane 3:12; Yuda 11.