Ei, i ter ga. Ishember i “pugatori” la ngi ken Bibilo ga shi i̱ tese ér ka za wanger uuma mba ior mba ve kpe la ken pugatori ga. * Nenge ase kwagh u Bibilo i tese sha kwagh u isholibo man ku la shi er kwagh u i tese la a lumun a ityesen i pugatori la ga yô.

•   Ka jighjigh u or ne awambe a Yesu la ka a wanger nan sha asorabo a nan ye, ka shighe u ior ve kaan ér or ka nan za lu ken pugatori la ga. Bibilo kaa ér, “awambe a Yesu Wan [u Aôndo] nga wanger se sha asorabo cii” shi ér, “Yesu Kristu . . . due a vese ken asorabo ase kera sha awambe a Na.” (1 Yohane 1:7; Mpase 1:5) Yesu na “uma Na a̱ hingir ipaan sha ci u ior kpishi” sha ci u mde u asorabo a ve.—Mateu 20:28.

•   Mbakpenev fa ma kwagh ga. “Mbaumav fa er vea kpe yô, kpa mbakpenev yô, fa ma kwagh ga.” (Orpasenkwagh 9:5) Or u nan kpe yô, kwagh u i lu eren a nan cii ka nan fa ga, sha nahan yô, a fatyô u wanger nan sha usu u pugatori la ga.

•   Or u nan kpe kera yô, ka kera tsahan nan sha ci u asorabo a yange nan er la ga. Bibilo kaa ér, “injar i isholibo i kimbin yô, ka ku” shi ér “or u nan kpe yô, i pase nan sha ikyev i isholibo i tuhwa.” (Mbaromanu 6:7, 23) Ku ka mtsaha u a kom sha isholibo gbing gbing yô.