Bem una va sha tar, kpa a lu sha iniôngon i orumace ga, a lu Tartor u Aôndo, u u lu gomoti u sha u Yesu Kristu a lu hemen la. Nenge akaa a Bibilo i pase se sha kwagh u doon tsung u una ve er ken hemen ne yô.

1.   Aôndo una er ‘ityav mbia bee zan zan a ar hen ikighir i tar je,’ nahan ‘shin tar yô, bem a lu sha ior mba i doo Un a ve la,’ er a tende zwa nahan.—Pasalmi 46:9; Luka 2:14.

2.   artor u Aôndo ua lu, ua gema a hemen tar cii. (Daniel 7:14) Hen shighe la ua lu gomoti u tar cii, nahan gomoti shon una bee a kwagh u mbavia a mbavia, u a ve a ayôôso kpishi sha tar la.

3.   I yila Yesu u a lu Tor u Tartor u Aôndo la ér “Wantor u Bem,” nahan una nenge ér ‘bem a lu zan zan ikighir i de lu ga.’—Yesaia 9:6, 7.

4.   Mba ve ze hemen a num u nôngon la cii a kera de ve ér ve lu ken Tartor la ga, sha ci u “or u ipira i doo nan la yô, [Aôndo] kôr nan ihyom.”—Pasalmi 11:5; Anzaakaa 2:22.

5.   Aôndo tesen mba a hemen ve la kwagh u una wase ve u lun ken bem yô. Bibilo pase kwagh u ityesen ne ia va a mi yô, ér: “Vea gema usanker vev, vea var indyuhar a mi, awange a ve kpaa aa hingir ahô a sôron ikyon a mi; ikyurior igen ia kera tsuwa sanker a ikyurior igen ga, vea kera hen ityav mbi nôngon kpaa ga.”—Yesaia 2:3, 4.

 Hegen je kpa, Mbashiada mba Yehova umiliôn imôngo sha tar cii mba henen kwagh u una wase ve u lun ken bem yô sha ikyev i Aôndo. (Mateu 5:9) Shin er se lu akuraior kposo kposo shi lu ken ityar i hemban 230 nahan kpa, se mba nenge ityav a uumace mbagenev ga.