U Nenge Nena?

• Aluer or ngu keren ér nana time sha kwagh u akav a sha asan a tesen shie u yange i mar nan shin nan za ishor gayô nan ngu keren ér nana fa kwagh u ken hemen nahan ka kwaghbo?

• Akaa a mbaimev ka di ukwaghalôm mba ve lu tesen kwagh u dedoo man kwagh u bo tsôô, shin ka kwagh u mimi u una fatyô u bulan oro?

Ngeren ne una time sha ityôkyaa i alaghga ia na ve kwagh u mbaimev una fatyô u saren ior yô, kua ityôkyaa i i ne ve i gbe u se wa ikyo la kpaa.

•  Ka nyi ka i doo ior kere?

•  Er nan i doo u u wa ikyo?

•  Kwagh u u fatyô u eren yô

•  Kwagh u mbakov wou ve ôr yô

Ikyômpeni i eren akaa a nan ior msaanyol ka i tese kwagh u mbaimev ken akaa a ve eren u nan ior msaanyol la. Ka ve tese kwagh ne tseer tseer ken ufiim man uporogeram mba sha televishen man ken ugyeem mba vidio man ken ityakerada. Kwagh ne na yô, agumaior kpishi hingir u soon kwagh u ishor i kpehen sha asan man azôv kua ior mba ka i kaa ér ve due debur u za man ior awambe man kwagh u mbatsav. Sha ci u nyi? Ka sha ci u:

• Ka i sar ve u fan: Ka ve soo u fan aluer mimi je mbatyomov kua azôv mba yô

• Ishima ka i za ve iyol: Ka ve soo u fan kwagh u una va er ken hemen yô

• Mzough: Ka ve soo ér vea nôngo a lam a or u doon ve ishima u nan saa ku yô

Alaghga atôakyaa ne iyol i a yô a lu kwaghbo ga ase je. Ikyav i tesen yô, u henen sha kwagh u ken hemen shin sha kwagh u or wou u nan saa ku la ka kwagh u sha gbaaôndo je. Kpa kwaghbo ngu ken kwagh ne u i gbe u ú fa yô.

Bibilo ta icin gbang gbang sha hanma kwagh u a gbe a zough a kwagh u mbaimev cii. Ikyav i tesen yô, Bibilo kaa ér:

“I̱ de zough a . . . or u kpehen ishor, shin or u eren ahir, shin or u pasen uivande, shin or u lamen ishor, shin or u yangen akombo, shin or u nan pin jijingi u orkpen kwagh, shin nan pin jijingi u tsengan pasen akaa kwagh, shin or u lamen a mbakpenev” ken a we ga. “Gadia hanma or u nan eren akaa angan cii, nan ngu TER kwagh u ihôngorough je.”—Duteronomi 18:10-12.

Er na ve Bibilo i vende kwagh u mbaimev i tsughur ishigh sha nahana?

• Aluer se er kwagh vea ujijingi mba bov yô, se mba tan ikyaa a ve. Bibilo tese ér mbatyomov mbagen yange ve hemba Aôndo ato nahan ve hingir mbaihyomov nav. (Genese 6:2; Yuda 6) Mbatyomov mba wan ifer mba i yer ve ér azôv ne, ka ve tsume a ior sha ikyev i mbapinen jijingi u mbakpenev kwagh kua mba tsengan pasen akaa man mba kpehen ishor sha asan shin sha igbenda igen. Aluer se mba eren akaa ne yô, se hingir u yan ikyar vea mbaihyomov mba Aôndo.

• Kwagh u mbaimev ngu a samber a aie u i eren ér uumace mbagen vea fatyô u fan kwagh u ken hemen la. Nahan kpa, ka Aôndo tseegh una fatyô u eren kwagh ne ye; a kaa ér: “M pasen hii sha mhii zan zan mkur, man hii sha ayange a tsuaa la je, akaa a a lu a vande eren ga la.”—Yesaia 46:10; Yakobu 4:13, 14.

• Kwagh u mbaimev shi ngu a samber a aie ugen u i eren ér mbakpenev vea fatyô u lamen mbaumav la. Kpa Bibilo kaa ér: “Mbakpenev yô, fa ma kwagh ga, . . . gadia ma tom shin mhen shin mfe shin kwaghfan mba shin Sheol . . . ga.”—Orpasenkwagh 9:5, 10.

Atôakyaa ne na yô, Mbashiada mba Yehova ka ve nyagh hanma ieren i i biishi a kwagh u mbaimev cii. Shi ka ve palegh iemberyolough i i lu a mbakpenev mba ior ka ve kaa ér ve due debur u za man ior awambe shin mba ka i kaa ér i nder ve ken mbatsav la kua iemberyolough i i tese akaa a sha gbaaôndo ga cii. Gumkwase ugen u i yer un ér Maria yô, kaa ér: “Aluer ma kwagh u i lu tesen ngu a kwagh u mbaimev ker yô, doo u me nenge ga.” *

• Kange ishima wer, u za “hemen u lun a imoshima i wang” sha ishigh ki Yehova sha u palegh iemberyolough shin nyityô ieren i i gbe i zough a kwagh u mbaimev cii.—Aerenakaa 24:16.

• Ta hanma kwagh u a gbe a zough a kwagh u mbaimev u u lu a mi cii kera. Ôr Aerenakaa 19:19, 20, nahan ver ishima nenge ikyav i dedoo i Mbakristu mba sha ayange a mbaapostoli la ver sha gbaa ne yô.

Umbur: Aluer u nyagh akaa a mbaimev kua iemberyolough i i tese akaa la yô, u lu tesen wang wer u ngu tan ikyaa a Yehova. Man kwagh ne ka a na i saan Yehova iyol!—Anzaakaa 27:11.