“ተመሳሲልካ ኽትነብር ኣሎካ፣ እንተ ዘይኰይኑ፡ ኣዕሩኽ ኣይህልዉኻ፡ ህይወት ኣይህልወካ፡ መጻኢ ኣይህልወካ። በይንኻ ተረሲዕካ ኢኻ እትነብር።”—ካርል።

 እዝስ እተጋነነ ድዩ፧ ምናልባት ይኸውን። ኰይኑ ግና፡ ገሊኦም ሰባት ካብቲ ካርል ዝገለጾ ነገር ንምምላጥ ዘይገብርዎ ነገር የሎን። ንስኻኸ፧ እዛ ዓንቀጽ እዚኣ፡ ዝሓሸ መገዲ ኽትሕብረካ እያ።

•  ሰባት ተመሳሲሎም ኪነብሩ ዚጽዕሩ ስለምንታይ እዮም፧

•  ክትፈልጦ ዘሎካ

•  መዛኑኻ እንታይ ይብሉ፧

•   ምኽንያቱ ኺግለሉ ኣይደልዩን እዮም። “ገሊኦም ንዓይ ሓዲጎምኒ ኺዛወሩ ምስ ከዱ እተሳእልዎ ስእልታት ኣብ ማሕበራዊ መራኸቢ ርእየ እየ። እዚ ድማ፡ ‘እንታይ እየ በዲለ፧’ ኢለ ኸም ዚሓስብ ገይሩኒ እዩ፣ ጥቓኦም ክቐርብ ከም ዘይበቅዕ ኰይኑ ስለ እተሰምዓኒ እውን ረቢሹኒ እዩ።”—ናታሊ።

   ነዚ ዚስዕብ ሕሰበሉ፦ ካብ ሓደ ጕጅለ እተገለልካ ዀይኑዶ ተሰሚዑካ ይፈልጥ፧ ምስቶም ጕጅለ ኽትመሳሰል ኢልካ ዝገበርካዮ ነገርዶ ኣሎ፧

•   ምኽንያቱ እተፈልዩ ኪዀኑ ኣይደልዩን እዮም። “ወለደይ ሞባይል ተሌፎን ክሕዝ ኣይፈቐዱለይን። መሳቶይ ቍጽሪ ተሌፎነይ ኪሓትቱኒ ኸለዉ፡ ተሌፎን ከም ዘይብለይ እነግሮም እሞ፡ ‘እንታይ፧ ጓል ክንደይ ዲኺ፧’ ይብሉኒ እዮም። ጓል 13 ምዃነይ ምስ ነገርክዎም፡ መስክነይቲ ኢሎም ይጥምቱኒ።”—ሜሪ።

   ነዚ ዚስዕብ ሕሰበሉ፦ ካብ ወለዲ ዚውሃብ እንታይ ቀይድታት እዩ ኻብ ካልኦት እተፈለኻ ኸም እትኸውን ኪገብረካ ዚኽእል፧ ነቲ ቐይድታት ብኸመይ ኢኻ እትሕዞ፧

•   ምኽንያቱ ኺድንደኑ ኣይደልዩን እዮም። “ደቂ ትምህርተይ ነቶም ብተግባሮም፡ ብኣዘራርባኦም፡ ወይ ብኣምልኾኦም ፍልይ ዝበሉ ኣይፈትውዎምን እዮም። ምሳታቶም እንተ ዘይተመሳሲልካ፡ ዕላማ መጥቃዕቲ ኢኻ እትኸውን።”—ኦሊቪያ።

   ነዚ ዚስዕብ ሕሰበሉ፦ ምስ ገሊኦም ስለ ዘይተመሳሰልካ ኣደዳ ግፍዒ ዄንካዶ ትፈልጥ፧ ነቲ ዅነታት ብኸመይ ሒዝካዮ፧

•   ምኽንያቱ ንኣዕሩኾም ኪስእኑ ኣይደልዩን እዮም። “ምስ ኵሉ ተመሳሲለ ኽነብር ጽዒረ እየ። ናይ ካልኦት ኣዘራርባ እቐድሕ ነይረ። ዘየስሕቕ ነገር የስሕቐኒ ነይሩ። ንኻልኦት ዚጐድእ ነገር ምዃኑ ኣጸቢቐ እናፈለጥኩ እውን፡ ምስ መሳቶይ ተጸምቢረ ብሰባት አላግጽ ነይረ።”—ሬቸል።

   ነዚ ዚስዕብ ሕሰበሉ፦ ብመዛኑኻ ኽትፍቶ ኽሳዕ ክንደይ እዩ ዜገድሰካ፧ ምሳታቶም ክትመሳሰል ኢልካስ ባህርያትካ ቐዪርካ ዲኻ፧

•   ክትመሳሰል ኢልካ ጠባይ ሰባት እንተ ቐዲሕካ፡ እዚ ተገልቢጡ ኺጐድኣካ ይኽእል እዩ። ስለምንታይ፧ መብዛሕትኡ ግዜ፡ ሰባት ንዜምስል ሰብ ይፈልጥዎ እዮም። ወዲ 20 ዓመት ዝዀነ ብራያን፡ “ዘይኰንክዎ መሲለ ክቐርብ ከለኹ፡ ምስ ሰባት ኣይሳነን እየ ነይረ። ከተምስል ከለኻ ሰባት ስለ ዚፈልጥዎ፡ እቲ ዝሓሸ መገዲ ገዛእ ርእሰይ ምዃን ከም ዝዀነ ተማሂረ እየ” ኢሉ ተዘክሮኡ ይገልጽ።

   ዝሓሸ መገዲ፦ ብቐዳምነት ንእትሰርዖ ነገራት ዳግም ሕሰበሉ። መጽሓፍ ቅዱስ፡ ‘እቲ ዚሓይሽ መርምሩ’ ይብል እዩ። (ፊልጲ 1:10) ስለዚ፡ ከምዚ ኢልካ ገዛእ ርእስኻ ሕተት፦ ‘እንታይ ይሓይሽ—ምስቶም ካብ ናተይ እተፈልየ መትከላት ዘለዎም ሰባት ተመሳሲለ ምንባርዶ፡ ወይስ ገዛእ ርእሰይ ምዃን፧’

   “ንኻልኦት ክትመስል ምጽዓር፡ ዋጋ የብሉን። ሰባት ብዝያዳ ኸም ዚፈትዉኻ ኣይገብርን እዩ፣ ዝሓሸ ሰብ እውን ኣይገብረካን እዩ።”—ጄምስ።

•   ክትመሳሰል እትገብሮ ጻዕሪ ንመንነትካ ኺዓብጦ ይኽእል እዩ። ብሰብ ምእንቲ ኽትፍቶ ኢልካ፡ ካልኦት ዝደለይዎ ዘበለ ዚገብር ሰብ ክትከውን ትኽእል ኢኻ። ጀረሚ ዝስሙ መንእሰይ፡ “ምስ ሓደ ጕጅለ ኽመሳሰል ኢለ፡ ዋላ እውን ሕማቕ ስም እናኣጥረኹ፡ ዝዀነ ይኹን ነገር እገብር ነይረ” ኢሉ ተዘክሮኡ ይገልጽ። ኣስዕብ ኣቢሉ ድማ፡ “እዚ ኸኣ ኣብ ትሕቲ ቝጽጽር ካልኦት እዩ ኣእትዩኒ። መጻወቲኦም እየ ነይረ” ይብል።

   ዝሓሸ መገዲ፦ ከም ነፋሒቶ መምስ ከባቢኡ ሕብርኻ ኣብ ክንዲ እትለዋውጥ፡ መትከላትካ ፍለጥ፡ ብእኡ ድማ ተመላለስ። መጽሓፍ ቅዱስ፡ “ኵሉ ገይርዎ ኢልካ ኣይትግበር” ኪብል ሓቁ እዩ።—ዘጸኣት 23:2፡ ሆሊ ባይብል—ኢዚ-ቱ-ሪድ ቨርሽን።

   “ኵሉ እቲ ዚፈትዋኦ ሙዚቃን ጸወታታትን ክዳውንትን ምርኢታትን ኵሕለ ምሕልን ክፈቱ ፈቲነ እየ። . . . ከማታተን ክኸውን ፈቲነ እየ። የምስል ከም ዝነበርኩ ዝፈለጣ ይመስለኒ። ኵለን እየን ፈሊጠናኒ፡ ዋላ እውን ኣነ ነዚ እፈልጦ ነይረ። ኣብ መወዳእታኡ፡ ባዶን በይነይን ዝዀንኩ ዀይኑ ተሰሚዑኒ፣ መን ምዃነይ እኳ ኣይፈልጥን እየ ነይረ። ናይ ርእሰይ ስብእና ኣይነበረንን። ምሳኻ ዚመሳሰል ወይ ንዓኻ ዚፈትወካ፡ ኵሉ እቲ እትረኽቦ ሰብ ከም ዘይኰነ ፈሊጠ። እዚ ኽብል ከለኹ ግና መሓዙት ካብ ምግባር ተስፋ ትቘርጽ ማለት ኣይኰነን፣ የግዳስ፡ ምእንቲ ኽትዓቢ ንርእስኻ ቦታን ግዜን ትህብ ማለት እዩ።”—መሊንዳ።

•   ክትመሳሰል እትገብሮ ጻዕሪ ንኣካይዳኻ ኺጸልዎ ይኽእል። ክሪስ ዝስሙ መንእሰይ፡ ዘመዱ በዚ ኺጽሎ ርእዩ እዩ። ብዛዕባኡ ድማ ከምዚ ይብል፦ “ምስ ገሊኦም ኪመሳሰል ኢሉ ኸም ምውሳድ ሓሽሽ ዝኣመሰለ ኺገብሮ ዘይደሊ ነገር ኪገብር ጀሚሩ። ብርቱዕ ወልፊ ኸኣ ኣጥርዩ፣ እዚ ንህይወቱ ዳርጋ ኣበላሽይዎ ነይሩ።”

   ዝሓሸ መገዲ፦ ካብቶም ብኣዘራርባኦምን ብኣካይዳኦምን ጽቡቕ መትከላት ከም ዘይብሎም ዚፍለጡ ሰባት ርሓቕ። መጽሓፍ ቅዱስ፡ “ምስ ጥበበኛታት ዚመላለስ ጥበበኛ ይኸውን፣ ምስ ዓያሹ ዚሓብር ግና ክፉእ ይረክብ” ይብል።—ምሳሌ 13:20።

   “ሓድሓደ ግዜ፡ ምስ ገሊኦም ክትመሳሰል ምጽዓር ጽቡቕ እዩ። ምእንቲ እዚ ኢልካ ግና ኣንጻር እቲ ቕኑዕ ምዃኑ እትፈልጦ ነገር ፈጺምካ ኣይትኺድ። ናይ ሓቂ እንታይነትካ ዚቕበልዎ ሰባት እዮም ዚዀኑኻ።”—መላኒ።

   ምኽሪ፦ ምስ ሓደስቲ ሰባት ንምትዕርራኽ ክትፍትን ከለኻ፡ ሓባራዊ ዜገድሰኩም ነገራት ከም ዘሎ ጥራይ ኣይትርአ። የግዳስ፡ ከም ናትካ ዓይነት መትከላት፡ ማለት ከም ናትካ ዓይነት መንፈሳውን ስነ ምግባራውን እምነት ዘለዎም ሰባት ድለ።