ማርያም መግደላዊት እምንቲ ሰዓቢት የሱስ ክርስቶስ እያ ነይራ። እቲ መግደላዊት ዚብል መጸውዒኣ፡ ካብታ ኣብ ጥቓ ባሕሪ ገሊላ እትርከብ መግደላ (መገዳን ክትከውን እትኽእል) እትብሃል ከተማ እተወስደ ኪኸውን ኣለዎ። ማርያም ኣብኣ ትነብር ነይራ ትኸውን።

 ማርያም መግደላዊት ሓንቲ ኻብተን ምስ የሱስን ደቀ መዛሙርቱን ዚጕዓዛን ብንብረተን ዜገልግላኦምን ዝነበራ ኣንስቲ እያ ነይራ። (ሉቃስ 8:1-3) የሱስ ኪቕተል ከሎ ብዓይና ርእያ እያ፣ ምስ ተንስአ እውን ሓንቲ ኻብቶም ዝረኣይዎ ቀዳሞት ደቀ መዛሙርቲ እያ ነይራ።—ማርቆስ 15:40፣ ዮሃንስ 20:11-18።

•  ማርያም መግደላዊት ኣመንዝራ ድያ ነይራ፧

•  ማርያም መግደላዊት “ናይ ሃዋርያት ሃዋርያ” ድያ ነይራ፧

•  ማርያም መግደላዊት ሰበይቲ የሱስ ክርስቶስ ድያ ነይራ፧

•  ኣብ መጽሓፍ ቅዱስ ክንደይ ማርያም ተጠቒሰን ኣለዋ፧

 መጽሓፍ ቅዱስ፡ ማርያም መግደላዊት ኣመንዝራ ኸም ዝነበረት ገይሩ ኣይዛረብን እዩ። የግዳስ፡ የሱስ ሸውዓተ ኣጋንንቲ ኸም ዘውጽኣላ እዩ ዚገልጽ።—ሉቃስ 8:2።

 ‘ኣመንዝራ እያ ነይራ’ ዚብል ሓሳብ ደኣ ኻባይ እዩ መጺኡ፧ ድሕሪ ሙማታ ዘመናት ጸኒሑ፡ እታ ንኣእጋር የሱስ ብንብዓታ ዝሓጸበቶን ብጸጕሪ ርእሳ ዘንቀጸቶን ስማ ዘይተጠቕሰት ሰበይቲ (ምናልባት ኣመንዝራ)፡ ንሳ ኸም ዝዀነት ጌርካ ኺእመን ጀመረ። (ሉቃስ 7:36-38) እንተዀነ ግና፡ ነዚ ዚድግፍ ቅዱስ ጽሑፋዊ መሰረት የልቦን።

 ኣይፋልን። ማርያም ሓንቲ ኻብተን ብዛዕባ ትንሳኤ የሱስ ንሃዋርያት ዘበሰራ ቐዳሞት ኣንስቲ ስለ ዝነበረት፡ ካቶሊካዊት ቤተ ክርስትያን “ቅድስቲ ማርያም መግደላዊት” ከምኡ እውን “ናይ ሃዋርያት ሃዋርያ” ኢላ ትጽውዓ እያ። (ዮሃንስ 20:18) እዚ ግና ሃዋርያ ኣይገብራን እዩ። ኣብ ቅዱሳት ጽሑፋት እውን በዚ ኸምዚ ተጸዊዓ ኣይትፈልጥን እያ።—ሉቃስ 6:12-16።

 መጽሓፍ ቅዱስ ኣብ መወዳእታ ቐዳማይ ዘመን ድ.ክ. እዩ ተጻሒፉ ተወዲኡ። ክሳዕ ሻድሻይ ዘመን ግና መራሕቲ ቤተ ክርስትያን ንማርያም መግደላዊት ናብ ዝለዓለ ደረጃ ኽብ ኣየበልዋን ነይሮም። ኣብ ካልኣይን ሳልሳይን ዘመን ኣብ እተጻሕፈ ኽፋል ቀኖና መጽሓፍ ቅዱስ ኣብ ዘይኰነ ጽሑፋት፡ ገሊኦም ሃዋርያት የሱስ ንማርያም ከም ዝቐንኡላ ተጻሒፉ ንረክብ ኢና። እዚ ናይ ፈጠራ ዛንታታት፡ ቅዱስ ጽሑፋዊ መሰረት የብሉን።

 ኣይፋልን። የሱስ ከም ዘይተመርዓወ መጽሓፍ ቅዱስ ብንጹር ይገልጽ እዩ። a