ኣብዚ ግዜ እዚ፡ ጸገም ዘይብሉ ዅነታት ኬሕልፍ ዚኽእል ሰብ የለን። ኵነታቱ ተቐቢሉ፡ ዓቕሙ ዚፈቕደሉ እናገበረ ዚነብር ሰብ ግና፡ ንዅነታቱ ተቘጻጺርዎ ኺብሃል ይክኣል እዩ። ሕማቕ ኵነታት እናኣጋጠመካ፡ ብመጠኑ እውን እንተ ዀነ ንህይወትካ ኽትቈጻጸራ እንተ ኽኢልካ ጽቡቕ እዩ። ድሕሪ ግዜ ዅነታትካ እንተ ተተዓርዩ ኸኣ ዝሓሸ እዩ። እቲ ኻብ ኵሉ ዝበለጸ ግና ብሕጂ እዩ ዚመጽእ።

መጽሓፍ ቅዱስ፡ ኵሎም ሰባት ንህይወቶም ብዜዕግብ መገዲ ኺቈጻጸርዎ ኸም ዚኽእሉ ይገልጽ እዩ። ሽዑ ሰባት ተስፋ ዜቝርጽ ኵነታት፡ ዕለታዊ ጸቕጥታት፡ ከምኡ እውን ኣሉታዊ ስምዒታት ስለ ዘየጋጥሞም፡ ምሉእ ብምሉእ ተሓጒሶም ኪነብሩ እዮም። (ኢሳይያስ 65:21, 22) መጽሓፍ ቅዱስ ነቲ ህይወት እቲ፡ “ናይ ሓቂ ህይወት” እዩ ዚብሎ።—1 ጢሞቴዎስ 6:19።