ቃል ኪዳኖም ዚሕልዉ ሰብኣይን ሰበይትን ንመውስቦኦም ነባሪ ኸም ዝዀነ ገይሮም እዮም ዚርእይዎ፣ እዚ ኸኣ ኣብ መንጎኦም ቅሳነት ይፈጥር እዩ። ክልቲኦም ድማ ብጻዮም ኣብ ጽንኩር ግዜ እውን ከይተረፈ ንመውስቦኡ ኸም ዜኽብር ይተኣማመኑ እዮም።

ገሊኦም ሰብ ሓዳር ብምኽንያት ማሕበራዊ ወይ ቤተ ሰባዊ ጸቕጢ ብሓባር ኪነብሩ ይግደዱ እዮም። በቲ ኣብ መንጎ ሓድሕዶም ዘሎ ፍቕርን ኣኽብሮትን ተደሪኾም ቃል ኪዳኖም ዚሕልዉ እንተ ዀይኖም ግና ኣዝዩ ዝሓሸ እዩ።

ስርዓት መጽሓፍ ቅዱስ፦ “ሰብኣይ . . . ካብ ሰበይቱ ኣይፈለ።”—1 ቈረንቶስ 7:11።

“ንቓል ኪዳንካ ውፉይ እንተ ዄንካ፡ ብቐሊሉ ኣይትቕየምን ኢኻ። ቀልጢፍካ ይቕረ ትብልን ቀልጢፍካ ይቕረታ ትሓትትን ኢኻ። ንጸገማት ከም ዕንቅፋታት እምበር፡ ከም መባተኺ ጌርካ ኣይትርእዮን ኢኻ።”—ማይካ።

መብዛሕትኡ ግዜ፡ ንቓል ኪዳኖም ውፉያት ንዘይኰኑ ሰብ ሓዳር ጸገማት ኬጋጥሞም ከሎ፡ ‘ኣይንሳነን ኢና’ ኢሎም ይድምድሙ፡ ንፍትሕ ድማ መገዲ የናድዩ እዮም።

“ብዙሓት ሰባት ሓዳር ኪጅምሩ ኸለዉ፡ እንተ ዘይቀደወ ኸም ‘መሐለውታ’ ኪዀኖም ፍትሕ ይሓስቡ እዮም። ፍትሕ እናሓሰቡ ሓዳር እንተ ጀሚሮም፡ ቃል ኪዳኖም ካብ መጀመርታኡ ጽኑዕ ኣይኰነን።”—ጂን።

ርእስኻ ፈትን

ክትብኣሱ ኸለኹም . . .

• ብመጻምድትኻ ትጠዓስ ዲኻ፧

• ምስ ካልእ ክትከውን ትምነ ዲኻ፧

• “ሓዲገካ/ኪ ክኸይድ እየ” ወይ “ዚርድኣኒ ሰብ ክረክብ እየ” ትብል ዲኻ፧

ንሓዲኡ ኻብዚ ሕቶታት እዚ ‘እወ’ ኢልካ እንተ መሊስካ፡ ቃል ኪዳንካ ኸተድልድለሉ እትኽእል እዋን ሕጂ እዩ።

ምስ መጻምድትኻ ተመያየጥ

• ንቓል ኪዳንና ዝነበረና ተወፋይነት ነክዩዶ፧ እንተ ነክዩ፡ ስለምንታይ፧

• ንቓል ኪዳንና ንምድልዳል እንታይ ስጕምትታት ክንወስድ ንኽእል፧

ምኽሪ

• ሓሓሊፍካ ንመጻምድትኻ ብጽሑፍ ፍቕርኻ ግለጽ

• ኣብ እትሰርሓሉ ቦታ ስእሊ መጻምድትኻ ብምንባር ተወፋይነትካ ኣርኢ

• ብስራሕ ወይ ብኻልእ ተፋላሊኹም ኣብ እትውዕሉሉ እዋን ተሌፎን ደውል

ስርዓት መጽሓፍ ቅዱስ፦ “ነቲ ኣምላኽ ዝጸመዶስ፡ ዋላ ሓደ ሰብ ኣይፍለዮ።”—ማቴዎስ 19:6።