መጽሓፍ ቅዱስ ብዙሕ ተስፋታትን ምኽርን ይህብ እዩ። መሸም እንታይ ከም ዚምህር ክትፈልጥ ትደሊ ኢኻ፣ ግናኸ፡ ዜጠራጥረካ ነገራት ይህሉ ይኸውን። እሞ ደኣ ነቲ ኣብዚ ጥንቲ እተጻሕፈ መጽሓፍ ዘሎ ተስፋታትን ምኽርን ክትኣምኖ ትኽእል ዲኻ፧ ነቲ መጽሓፍ ቅዱስ ብዛዕባ ናይ ሕጂ ህይወትናን ብዛዕባ ናይ መጻኢ ህይወትናን ዚብሎኸ ብሓቂዶ ኽትኣምኖ ትኽእል ኢኻ፧ ሚልዮናት ይኣምንዎ እዮም። ንስኻ እውን ክትኣምኖ ትኽእል እንተ ዄንካ እስከ ንርአ።

1. መጽሓፍ ቅዱስ ሓቂ ድዩ ወይስ ፈጠራ፧

መጽሓፍ ቅዱስ፡ እቲ ኣብኡ ሰፊሩ ዘሎ ሓበሬታ፡ “ልክዕ ቃላት ሓቂ” ኸም ዝዀነ ይገልጽ እዩ። (መክብብ 12:10) ናይ ሓቂ ሰባት እተሳተፍዎ ናይ ሓቂ ታሪኽ የዘንቱ እዩ። (ሉቃስ 1:3፣ 3:1, 2 ኣንብብ።) ብዙሓት ጸሓፍቲ ታሪኽን ተመራመርቲ ስነ ጥንትን ንልክዕነት እቲ ኣብ መጽሓፍ ቅዱስ እተጠቕሰ ዕለታትን ሰባትን ቦታታትን ፍጻመታትን ኣረጋጊጾም እዮም።

2. መጽሓፍ ቅዱስ ግዜኡ ዝሓለፎ ኣይኰነን እንብል ስለምንታይ ኢና፧

ኣብ ብዙሕ መዳያት፡ መጽሓፍ ቅዱስ ቅድሚ ግዜኡ ዜፍልጥ ኰይኑ እዩ ተረኺቡ። ንኣብነት፡ ስነ ፍልጠታዊ ነገራት ይተናኺ እዩ። መብዛሕትኡ እቲ ኣብቲ ጕዳይ እቲ ዚብሎ፡ ኣብቲ እተጻሕፈሉ ግዜ ኣከራኻሪ እዩ ነይሩ። ዘመናዊ ስነ ፍልጠት ግና፡ መጽሓፍ ቅዱስ ልክዕ ምዃኑ ኣረጋጊጹ እዩ። እወ፡ “ሕጅን ንዘለኣለምን ዜተኣማምን እዩ።”—መዝሙር 111:8።

3. ነቲ መጽሓፍ ቅዱስ ብዛዕባ መጻኢ ዚብሎ ኽንኣምኖ እንኽእል ስለምንታይ ኢና፧

መጽሓፍ ቅዱስ “ገና ዘይተገብረ” እተነግረሉ ትንቢታት a ሒዙ ኣሎ። (ኢሳይያስ 46:10) ኣብ ታሪኽ ንእተኸስተ ሓያሎ ነገራት፡ ገና ኸይኰነ ኸሎ ብልክዕ ተነብይዎ ነይሩ እዩ። ነዚ ሎሚ ዘሎ ዅነታት ዓለም እውን ብልክዕ ገሊጽዎ እዩ። ኣብዚ ትምህርቲ እዚ፡ ገለ ኻብ ትንቢታት መጽሓፍ ቅዱስ ክንምርምር ኢና። ልክዕነቱ ድማ ዜስደምም እዩ!

 ጽማቝ

ታሪኽን ስነ ፍልጠትን ትንቢትን ንመጽሓፍ ቅዱስ ክትኣምኖ ኸም እትኽእል ይሕብር።

ክለሳ

•   መጽሓፍ ቅዱስ ሓቂ ዝሓዘ መጽሓፍ ድዩ ወይስ ፈጠራ፧

•   ስነ ፍልጠት ምስ መጽሓፍ ቅዱስ ዚሰማምዓሉ ገለ መዳያት እንታይ እዩ፧

•   መጽሓፍ ቅዱስ ብዛዕባ መጻኢ ዚንበዶ ይመስለካ፧ ስለምንታይ፧