AISISIAET NA 01

Epone bo Ani Epedoria Ebaibuli Aingarakin Ijo?

KOBOLIAK

Nepetai oni kere ijaatar keda aingiseta nuikamunitos aijar, aiticanitoi, atwanare, arai bo nuikamunitos ingaren. Ejaas bobo acekiro nuaduc nuipodokinit oni kwape nat aiman arai bo ajaut kekale loiyalama. Engaraki Ebaibuli itunga luipu adumun abongonokineta nuka aingiseta nuepolok kotoma aijar, ido einakinit bobo kesi aicoreta nuingarakinete kotoma aijar nakanginipaaran. Ejai kereka itunganan yenijeni ijo yenepedori Ebaibuli aingarakin?

1. Anu bo aceingiseta nuebongokinit Ebaibuli?

Ebongokinit Ebaibuli aingiseta nu nuepolok: Epone bo ani ageunor aijar? Anyoin bo alosikinet naka aijar? Kanuinyo ejaar aiticanitoi otunga? Inyo bo etakanikini itunganan ketwana? Arai ekoto nginitunganan ainapakin, kanuinyo ejaatar ijiisinei? Inyo etakanikini akwap koingaren? Isinyikokinit Ebaibuli oni amoot abongonokineta nuka aingiseta angun, ido adumutu itunga luipu abongonokineta nuisimonikinete.

2. Epone bo ani ingarakinia Ebaibuli oni alelakin aijar kanginipaaran?

Einakinit Ebaibuli oni aicoreta nuejok. Kwape aanyunet, isisianakini ikalia epone lodumunet aiyalama. Elimokinit oni nuibusakinit aswam naiyalongongor keda epone loipedoria oni alelakin aswamuwok. Ibuni ijo ajenun nuisisianakini Ebaibuli kanuikamunitos akiro nu ka ace da nuipu nainyikokinia oni aisisia nepepe. Aticepak icamunit ijo ebe “nginikirot [naejai toma Obaibuli] . . . ejai ajokis.”—2 Timoteo 3:16.

Mam eitabo lo eburokinit Ebaibuli. Konye, isinyikokinit ijo aisisia akiro nuejaas Obaibuli. Kanuangun, kilipit ijo aisiom ikokoron kere luijaikinitai kotoma aisisiaeta kanu kosodi aitiirian ikokoron ngul keda nuiwuta ijo aisisia.

KISISIAU NUIPU

Isisiau epone loengarakinia Ebaibuli itunga, epone loipedoria ijo alelakin aisiom nges, keda kanuinyo ibusakinitor oni acamun aingarakinio kaneejaasi luce tetere kimisiikini.

3. Epedori Ebaibuli ainakin oni aingarenikinio

Esubit Ebaibuli bala atooci nailiyai ejok. Ipedori oni aitoswam nges aitolomununa aseununeta nuejok ido ingarakinit Ebaibuli oni ajenun nuepote atakanun koingaren.

Kosiom Isabulin 119:105, kosodete aimor aingiseta nuta:

Epone bo ani ayaitor ewadikan esabuli, Ebaibuli?
Iwomit ijo biai kanuikamunitos Ebaibuli?

4. Epedori Ebaibuli abongonokin aingisetawok

Abu adiopeberu kodum abongonokineta kotoma Obaibuli nuka aingisetake nuetapasete nges adaun ikar luipu. Koboliak EBIDIO, kosodete aimor aingiseta nuetupakinete.

EBIDIO: Sirikicamak Akonimun Adaun! (1:48)

Kotoma obidio, anu bo aingiseta nuajaatar aberu ngin?
Epone bo ani abu aisisia Ebaibuli kingarakinia nges?

Isinyikokinit Ebaibuli oni aingit aingiseta. Kosiom Matayo 7:7, kosodete aimor aingiset nata:

Anu bo aingiseta nuijaatar ijo nuaticepak epedori Ebaibuli abongokin?

5. Ipedori ijo alelakin aisiom Ebaibuli

Elelakinitos itunga luipu aisiom Ebaibuli ido emedautu noi. Koboliak EBIDIO, kosodete aimor aingiseta nuta.

EBIDIO: Aisiom Ebaibuli (2:05)

Kotoma obidio, epone bo ani apupioto atumunak ngul kanuikamunitos aisiom Ebaibuli?
Kanuinyo kwana eminakinitor kes aisiom Ebaibuli?

Toma Obaibuli, idumakini oni amun keda aicoreta nuitalakaarete. Kosiom Iromayon 15:4, kosodete aimor aingiset nata:

Eminakinit kereka jo aisumunet naijaikinit Ebaibuli naka aitalakaario ka amun?

6. Epedorete luce aingarakin oni amisiikin Ebaibuli

Kilema asiomenen Ebaibuli ikulepek bon, aanyutu luipu ebe imedaete kesi noi kotoma aisisia kaluce. Kosiom Aswamisio 8:26-31, kosodete aimor aingiset nata:

Epone bo ani ipedoria jo amisiikin Ebaibuli?—Koany ikokoron 30 keda 31.

Epuda ebwacit loka Etiopia aingarakinio kanu amisiikin aiwadikaeta nuka Ebaibuli. Aanyutu itunga luipu ebe imedaete kesi noi kotoma aisisia Ebaibuli kaluce

EBAKASI ICETUNGA EBE: “Aisisia Ebaibuli erai aicanican apak.”