Kiseseni ijo itunga luejaas toma aputo?— Eraas kesi Matayo, Marako, Luka, Yokana, Petero, Yakob, Yuda, keda Paul. Itunga lu kere kiboitos apak adiopet keda Yesu, kosodete aiwadik nuikamunitos Yesu. Aso kesisiautu nuipu nuikamunitos kesi.

Iuni kotoma kesi araas ikiyakia lu apotu kolimonokisi keda Yesu. Kijeni ijo itunga lu iuni?— Matayo, Yokana, keda Petero. Ikiyakia lu iarei Matayo ka Yokana ajenete  Yesu noi, ido kangin idiopet kakesi abu kiwadik eitabo lo ikamunit aijar ke Yesu. Abu ekiyakia Yokana da kiwadik eitabo lo enyaritai Apukokinio kede ibaluwan iuni lu enyaritai, Yokana losodit, Yokana lokiareit, ka Yokana lokiuniet. Ekiyakia Petero abu kiwadik ibaluwan iarei luejaas toma Obaibuli. Enyaritai kesi Petero losodit keda Petero lokiareit. Kotoma obaluwa ke lokiareit, abu Petero kiwadik nuikamunitos apak na eneria Yawe kokuju kosodi atemar nuikamunitos Yesu: ‘Lo nges okokuka. Amina eong nges, ido apoga eong kanuke.’

Itunga ngul ice lu ejaas toma aputo kisisianakinete bobo oni nuikamunitos Yesu kotoma oitabon lu iwadikatos kesi. Ediopet kakesi nges Marako. Katicepak ajai nges ngina ikamario Yesu kosodi aanyun ngun kere nuajaas. Ece bobo nges Luka. Arai nges emuron loadekis katicepak abu nges koraun ekristayot akaulo na Yesu atwanare.

Ikewadikak ice luka Ebaibuli iarei lu iseseni ijo kotoma aputo kesi araas inacan ke Yesu ludidik. Kijeni ijo ikiroria kec?— Ikiroria kec kesi araas Yakob ka Yuda. Kageunet, mam eyuunitos Yesu. Kawomitos do kesi cut ebe arai nges ebang. Konye ekaulo apotu kesi kiyuutu Yesu kosodete araun ikristayon.

Ekewadikan Ebaibuli lo awasia loiseseni ijo kotoma aputo nges Paul. Ne arokor erauna ekristayot, arai ekekiror Saul. Angarunit nges ikristayon ido da abu kiswamainik kesi iboro lukarokok. Kijeni ijo inyoin bo abu koinak Paul erauni ekristayot?— Adiope paran, neajar Paul alosit korot katipet abu nges kopup itunganan inera keda nges kokuju. Arai Yesu! Abu kingit Paul: ‘Kanukinyo kireitor ijo ngul luiyuunitos eong?’ Akaulo kangin, abu Paul kijulakin araun ekristayot. Kiwadik do Paul itabon 14 luka Ebaibuli, ageun Iromayon kiton Iburanian.

Isiomenenei oni Ebaibuli kangin paran, mere kwangin?— Ne isiomenena oni Ebaibuli, isisiauni oni nuipu nuikamunitos Yesu. Ikoto kereka Ijo aisisiaun nuipu nuikamunitos Yesu?—