Kinyaraunit Edeke itunga lukatekerin kere aikunyakin nejai nges kotoma ailip. (Isabulin 65:2) Konye, mam nges kiirari arai acamun ailipasinei kere. Kwape awanyunet, etunganan loitisilanari ake beru mam ailipasineike kiiraro. (1 Petero 3:7) Bobo da neketakinotor itunga luka isirael aswam nu arokok abu Edeke kogir apupokin ailip kec. Kabiet, erai ailip arereng. Ejaa ngun da, kiirari Edeke ailipasinei angul luiswamaet nukarokok arai kitironikinos.​—Kosiom Isaia 1:15; 55:7.

Kosesen ebidio Epupi kereka Edeke ailipasinei kere?

Erai ailip atutubet naka aima wok, ekoto do oni ailip nejai lokasuban bon, Yawe. (Matayo 4:10; 6:9) Bobo, kwape mam oni idolitor, ekoto oni ailip kokiror loka Yesu narai abu kotwana anuok. (Yokana 14:6) Mam Yawe ekoto oni ainyogonyog ailip arai aisiom koitabo. Ekoto nges oni ailip kotau wok.​—Kosiom Matayo 6:7; Ipilipin 4:6, 7.

Epupi Lokasuban ailipa nakotau. (1 Samuel 1:12, 13) Ekoto nges oni ailip ediosawa kere, kwapenat tupuruc keda ebong, esawa loaiyam, ka edoikisi oni atiokisio.​—Kosiom Isabulin 55:22; Matayo 15:36.

Mam aikunyakin nejai Edeke epatana narai ijai oni nepepe ka itunga lu emameotor aiyuun kanejai Edeke ido ekweniatar aisumununeta Edeke nuayaun ainapakin akwap. (2 Timoteo 3:1, 4; 2 Petero 3:3, 13) Ekoto do oni aupa  keda iyuunak luce tetere isinyikokin nepepe.​—Kosiom Iburanian 10:24, 25.

Aupa kede itunga lu eminasi Edeke ingarakini oni aikunyakin nejai Edeke. Airiamunun naka Ajenak luka Yawe ijaikinit arereng na aitogogong aiyuun wok kanejasi luce.​—Kosiom Iromayon 1:11, 12.

Ipedori ijo aikunyakin nejai Yawe kotoma aomoom nuidau oni aisisiaun kotoma akirot ke. Koomom kotau nu ikamunitos aswamisio, aicoreta ka aisumununetake. Aomoom kotau edukuni do aiyalama kotau wok kanuka amina naka Edeke ka acoake.​—Kosiom Yosua 1:8; Isabulin 1:1-3.

Ipedori ijo aikunyakin nejai Edeke arai kijatar amuno ka aiyuun neijai ngesi. Konye eputosi aiyuun kwape ibore yen ejari ido okoto aitanyamio. Ibusakinit ijo aitanenen akon aiyuun kotoma ainyogonor nuka aiyuun kon.​—Kosiom Matayo 4:4; Iburanian 11:1, 6.

Epodokinit Edeke ngun lu eminasi nges. Epedori nges ayuar kesi anejai idio bore kere yen ebuni aitukurian akec aiyuun ka amuno naijar ikar kere. (Isabulin 91:1, 2, 7-10) Ikwenyakinit nges oni acoit irotin lu itukurianete aijar ka aiyalama wok. Isisianakini Yawe oni erot loijok cut lokaijar.​—Kosiom Isabulin 73:27, 28; Yakob 4:4, 8.