Tsy mahavita mampisy fiadanagne ty mpitarike amy ty tontolo toy eto naho ty fikambanagne iraisam-pirenena. Vao mainke nifamonovono avao o ndatio nanomboke tamy i Aly Lahibey Faharoey hatrake amy izao. Fa ho roe arivo tapetrisa ty ndaty miaigne agnate ty aly tie amy hinane zao. Fa ho ty ampahaefa ty mponegne an-tane etoy zay.

 Nagnino o ndatio ro tsy mahavita mampisy fiadanagne? Ino ty rehafe ty Baiboly?

1.  1. Ndra tie te hikezake aza o ndatio le tsy mahavita izay noho ty toe-tsaigne anagna iareo. Fa nirehafe ty Baiboly mialoha fa amo o androntikagne zao, le “ho tea tegna o ndatio, ho tea vola, hibohaboha, hagnambone tegna, ... tsy ho megnatse mivalike, ... tsy ho azo ifagnarahagne, ... tsy hahafehe tegna, hasiake, ... ho bey zizo, ho rengevoke.”​—2 Timoty 3:2-4.

2.  2. Ndra miharo raike o ndatio ndra sambe minday ty tegna’e, le tsy afake hamaha ty ola iareo naho tsy ampea i Jehovah a Andrianagnahare, i Mpamorogney. Rehafe ty Baiboly fa “tsy namboaregne hivey vatagne o ndatio.”​—Jeremia 10:23.

3.  3. Ambane fahefà i mpitondra raty fagnahỳ ty tontolo toy. Tsy ia zay fa i Satana Devoly. “Mamitake ze tane misy ndaty” reke. (Apokalypsy 12:9) Noho “ty tontolo toy fehe i ratỳ”, ty mahavy o alio.​—1 Jaona 5:19.

 Magnomey toky antika ty Baiboly fa hisy ty fiadanagne, faie tsy boake amy ty kezake atao o ndatio ty hampisy izay fa boake aman’Agnahare.

•   “‘Haiko soa ty raha fa vinetsevetseko hanoegne ama’areo’, hoe ty Jehovah. ‘Ty hagnomey anareo fiadanagne ty vetsevetseko fa tsy loza, mba hahavy anareo hanagne fiaignagne soa vaho raha tamaegne amy ty hoavy.’”​—Jeremia 29:11.

 Akore ty hagnatanterahan’Andrianagnahare ze fampitama’e zay? “Handemodemoke i Satana i Andrianagnahare ty fiadanagney.” (Romanina 16:20) Hampiasa ty fitondra’e an-dagnitse, i atao ty Baiboly tihoe “Fanjakàn’Andrianagnaharey” reke, mba hampisy fiadanagne magneran-tane. (Lioka 4:43) Ambane fitondrà i Jesosy, i Mpanjaka ty Fanjakàn’Andrianagnaharey, le hampianaregne hilongo soa o ndatio.​—Isaia 9:6, 7.

•   Naho te hahatrea fagnazavagne fagnampe’e rehe, le vakio ty lahatsoratse tihoe “Inona no Hataon’ny Fanjakan’Andriamanitra?”