Maro amy ty ndaty magneran-tane mirehake ty vata’e fa manonjohy ty lia i Jesosy Kristy ro manao politike. Misy ndaty te hampalaza ty fivavahagne misy aze naho ty fitsipike orihe’e le manohagne mpanao politike ndra antoko politike raike. Le o mpanao politikeo ka mateteke mampiasa i raha inoa i fivavahagne reỳ ndra ty raha misy amo o fiaraha monegneo eo, amy izay manohagne aze o ndaty mpivavakeo. Fitrea areke tihoe misy mpitondra fivavahagne mirotsake ho filiegne ndra te hanagne toeragne amo o fitondragneo eo. Amy ty firenena ila’e aza le o ndaty tokavegne tihoe “Kristianao” managne toeragne miambake amo o fanjakagneo naho o fivavahagneo.

 Akore ty heve’o? Toko’e hizilike amo o politikeo vao o mpanonjohy i Jesosy Kristio? Ho hai’o ty vale izay naho mandineke ty ohatse nenga i Jesosy rehe. Hoe reke: “Fa modely ro nimeiko anareo, mba hanoa’areo manahake i nataoko tama’areoy.” (Jaona 13:15) Ino areke ty modely nenga i Jesosy ho antikagne, naho o politikeo ro rehafegne?

 Aha’a. Tsy nizilike amy ty raharaha ara-politike ty Jesosy.

 Tsy nite hahazo fahefagne amo o politikeo eo ty Jesosy. Nandietse ty ho natao mpitondra o fanjakagneo ty Jesosy naho fa nimea i Satana Devoly aze “ze fanjakagne amy ty tontolo toy.” (Matio 4:8-10) a Nisy fotoagne ty Jesosy niforesé o ndatio hatao mpitondra satria trea iareo tie managne toetse fanjaka reke. Hoe ty Baiboly: “Naho fa nifanta i Jesosy tie ho avy hanao foresé aze hatao mpanjaka iareo, le nisintake ty eo reke le nandeha irery am-bohitse agne.” (Jaona 6:15) Tsy mba nagniry ty hatao mpanjaka ty Jesosy. Tsy nagneke ty hizilike amo o politikeo reke.

 Tsy nimete nizilike amo o aly hevetse ara-politikeo ty Jesosy. Ohatse zao, nandietse ty handoa hetra tamo o fanjakagne Romanao ty Jiosy tamy ty andro i Jesosy sady nihevetse io ho tsy rare’e. Naho fa iareo nanao ze hamantaragne ty heve i Jesosy miomba o hetrao, le tsy mba nizilike amy ty aly hevetse miomba io reke. Hoe reke tamy iareo: “Aloavo amy i Kaisara ze ahy i Kaisara, fa aman’Andrianagnahare ze an’Andrianagnahare.” (Marka 12:13-17) Tsy nanohagne ndra ia ndra ia amo o politikeo reke, faie naseho’e fa toko’e haloa i hetra angatahe ty fanjakagne Romana, i atao tihoe Kaisaray. Trea tamy igne ka fa tsy voatere hatao o ndatio iaby ze raha ampanoe o fanjakagneo iareo. Tsy toko’e homeagne o Fanjakagneo ohatse ze an’Andrianagnahare, agnisa izay ty fanokanan-tegna naho ty fanompoagne aze.​—Matio 4:10; 22:37, 38.

 Nanohagne sady nampianatse o ndatio ty miomba i fanjakagne an-dagnitse agney, ndra ty Fanjakàn’Andrianagnahare ty Jesosy. (Lioka 4:43) Tsy nizilike amo o politikeo reke satria fanta’e fa ty Fanjakàn’Andrianagnahare avao ty hahavita hagnatanterake ty raha safirien’Andrianagnahare miomba ty tane toy fa tsy ty fanjaka o ndatio. (Matio 6:10) Taka i Jesosy ka fa tsy tihoe hampiasa ty fanjaka o ndatio o Fanjakàn’Andrianagnahare iohoe fa hanolo iareo.​—Daniela 2:44.

 Aha’a. Mankatò i lily i Jesosy tihoey ty mpanonjohy ty lia’e tie “tsy agnisa ty tontolo toy.” (Jaona 15:19) Nagnorike ty ohatse nenga’e iareo sady tsy nizilike amo o politikeo. (Jaona 17:16; 18:36) Ndra aleo iareo nanao i asa nampanoe i Jesosy iareoy, le ty hitory naho hampianatse ty miomba i Fanjakàn’Andrianagnaharey ta tie hizilike amo o politikeo.​—Matio 28:18-20; Asan’ny Apostoly 10:42.

 Nankatò an’Andrianagnahare o Kristiana tamy ty taonjato voaloha’eo. Faie nagnaja avao o mpitondra olombelogneo ka iareo. (Asan’ny Apostoly 5:29; 1 Petera 2:13, 17) Nankatò ty lalàna tamy i firenena nisy iareoy agne iareo sady nandoa hetra. (Romanina 13:1, 7) Tsy nizilike amo o politikeo iareo faie nandrambe soa amo o lalànao naho ty fiarovagne boake amo o fanjakagneo.​—Asan’ny Apostoly 25:10, 11; Filipianina 1:7.

 Atoro ty Baiboly fa ndra i Jesosy ndra i mpanonjohy ty lia’e rey, le sambe tsy nizilike amo o politikeo. Tsy manohagne ndra ia ndra ia ka areke o Vavolombelo i Jehovah magneran-taneo satria Kristiana. Manao i asa nandilia i Jesosy iareoy avao ka iareo, le ty hitory ty “talily soa ty miomba i Fanjakagney” manahake ty natao i Kristiana tamy i taonjato voaloha’e rey.​—Matio 24:14.