Fa niteàko o raha finorogneo tamy ty raho mbe niajaja. Nisy ala naho antara soasoa ty narine i Jyväskylä tanà’ay a Failande Agnivo agne. Nitsangatsangagne mbeo mateteke ty keleia’ay. Tea biby ka raho, le nainako ho fihinegne iaby o pisò ndra o amboao tamy tie raho mbe niajaja. Nanahelo raho naho fa nibey satria nahatrea ndaty nampijale biby. Nilitse tamy ty fikambanagne raike, miaro ty zo o bibio raho naho fa tafara tatoy, sady nifankatrea tamy ty ndaty tea biby manahake ahy.

Nazoto nanao fihetseketsehagne hitakeagne ty zo o bibio zahay, le nitaogne ndaty hilahatse agnarabey ey satria tsy neké’ay ty famarotagne ty holy ze biby tamo o laboaratoarao agne. Nizara fagnazavagne miomba izay ka zahay. Mateteke zahay nifamale tamo o manam-pahefàgneo satria losotse loatse ty raha natao’ay. Mateteke tsinepake raho sady niakatse fitsaràgne.

Tsy ty miomba o bibio avao ty nampinekoneko ahy, fa ty miomba o ndatio ka. Nilitse tamy ty fikambanagne maromaro raho naho fa tafara tatoy. Agnisa izay ty fikambanagne miaro ty zo o ndatio naho ty fikambanagne iraisam-pirenena miaro ty tontolo iaignagne. Tena nanohagne o fikambanagne reo raho. Nialy tamy ty fahantragne naho ty hakeregne ka raho.

Faie tsapako naho fa tafara tatoy, fa tsy afake magnova ty tontolo toy raho. Nivoavaha i fikambanagne rey avao aloha ze olagne madinedineke, fa ze olagne lahibey ro vao mainke nitombo. Le hoe raha nisy hery raty nanimba aze ty tontolo toy, faie tsy nisy nidare. Tsapako fa tsisy raha azoko natao raho.

Nanahelo raho satria tsy nisy raha niazoko natao, le nanjare nieretseretse miomba an’Andrianagnahare naho ty Baiboly raho. Fa nianatse Baiboly tamy ty Vavolombelo i Jehovah raho tie taloha. Hitako tie tena soa fagnahy naho nipay ze hahasoa ahy iareo tamy izay, faie iraho ro tsy vognogne hiova. Faie tena hafa ty fihetseham-poko tamy toy.

Nalaeko i Baibolikoy, le nivakieko. Tena nampahery ahy ty raha nitreako tao. Misy andinin-teny maromaro ty ao, mirehake fa tsy toko’e hampijale biby tikagne. Mirehake ohatse ty Ohabolana 12:10 tie: “Miaro ty fiay ty biby hare’e ty maregne.” Nanjare fantako ka fa tsy Andrianagnahare ty mahavy ty olagne misy magneran-tane, fa avy amo o ndatio avao. Vao mainke miharaty aza ty fiaignagne satria tsy magnorike ty tari-dala’e ty ankamaroa o ndatio. Tena fale raho naho fa nahafantatse tie bey hatea naho manam-paharetagne ty Jehovah.​—Salamo 103:8-14.

Nahatrea taratasy fangatahagne ty boke Inogne Vata’e ty Raha Ampianare ty Baiboly? raho tamy izay. Nifenoeko i taratasỳ, le nalefako. Nisy mpivaly Vavolombelo i Jehovah niavy ty tamako tao tsy ela tafara igne. Nanasa ahy hianatse Baiboly iareo, le nagneke raho. Nivory niarake tamy iareo tamy i Anjomba i Fanjakagney agne ka raho. Nanjare teako ty raha nianarako tamy Baiboly ao.

Niova bey raho naho fa nianatse Baiboly. Tsy nifoke sasa raho sady tsy ninogne toake maro. Nihasoaeko ty poziko naho ty fomba firehako. Tsy nikomy tamo o manam-pahefagneo sasa ka raho. (Romanina 13:1) Tsy nahafehe tegna tamy ty findesam-batagne raho faie nivitako ty niova.

Faie tena sarotse tamako ty nagneke tie toko’e hiala amo o fikambanagne mpiaro ty zo o ndatio naho o bibio raho. Nihevetse raho tamy ty voaloha’e tie mivalike amy iareo naho manao izay. Faie nanjare fantako fa ty Fanjakàn’Andrianagnahare avao ro mahavoavaha ty olagne magneran-tane. Tapa-kevetse areke raho fa hanao ze fara heriko, mba hanohagnagne o Fanjakagne iohoe naho hagnampe ty hafa hahafantatse aze.​—Matio 6:33.

Nihevetse raho tamy iraho mbe mpitokogney fa naho tsy soa ty ndaty raike le raty. Sady nivognogne avao raho mba hialy tamy ze raha nihevereko fa raty. Faie tsy nalaigne ndaty sasa raho naho fa nianatse Baiboly. Mikezake ho tea ze karaza o ndaty iaby raho. (Matio 5:44) Mitory ty talily soa i Fanjakagney zao ohatse raho, mba hampisehoako izay. Fale raho mahatrea tie mandrisike o ndatio ho tea filongoagne o asa an-tsitrapo iohoe, sady mahavy o ndatio hitamà fahasambaragne.

Miantehetse mafe amy i Jehovah raho hinane zao, le manjare milamigne ty saiko. Resy lahatse raho fa tsy henga i Mpamorogney hijale nainai’e o ndatio naho o bibio. Tsy henga’e ho poteke ka ty tanentikagne soasoa toy. Tsy ho ela reke, le hagnaregne ze raha tsy mete iaby, amy ty alala i Fanjakà’ey. (Isaia 11:1-9) Tena fale raho satria mahafantatse izay iaby sady magnampe ty hafa hatoky izay ka. Tsy mieretseretse hagnova ty tontolo toy sasa raho.