Magnova Ndaty ty Baiboly

TREA ty lahilahy raike fa misy raha mbe mahasoa mandikoatse ty managne raharaham-barotse mandeha soa. Nisy lahilahy hafa ka niraty findesam-batagne sady nifoke rongony, faie niala tamy izay. Mpinon-toake ka ty lahilahy raike hafa, faie niafake tamy izay ka reke.

“Hoe raha soa zay ty fiaignako!”​—JOHN RICKETTS

TERAKE TAMY: 1958

FIRENENA NIAVIA’E: EKOSY

FIAIGNA’E TALOHA: MPANAO RAHARAHAM-BAROTSE

TY FIAIGNAKO TALOHA: Tena nieragneragne raho tamy iraho mbe nikede. Manamboninahitse tamy ty tafike britanike ty baba’ay, le nifindrafindra avao zahay. Fa nipetrake ta Ekosy, Angletera, Kenia, Malezia, Irlandy, naho Sipra tagne zahay. Nianatse tamy ty lakilasy kilasimandry ta Ekosy agne raho, nanomboke tamy iraho nivalo taogne. Nahazo diploma tamy ty oniverisite i Cambridge raho tafara tatoy.

Niasa tamy ty orinasa mpivarotse gazoaly raho tamy iraho ni-20 taogney. Niasa valo taogne tao raho. Tan’Amerika Atimo agne raho ty niasa voaloha’e, le naho fa niavy eo ta Afrika agne, sady ta Ostralia Ahandrefagne agne ty fara’e. Nagnoregne orinasa raho naho fa ta Ostralia agne, faie naviliko naho fa tafara tatoy.

Nahazo vola bey raho tamy izay, le vaho ni-40 taogne raho, le fa tsy niasa sasa fa nandeha nitete tane avao. Fa nahavita nandeha motò nagnodidigne i Ostralia indroe raho, sady nandehandeha magneran-tane. Hoe raha tena nisoa zay ty fiaignako.

TY NAGNOVÀ TY BAIBOLY TY FIAIGNAKO: Tamy iraho mbe niasay, le fa nipay fomba hisaorako an’Andrianagnahare satria nahafinaritse ahy ty fiaignako. Nandeha tamo o Eglizy Anglikanao agne raho, satria tagne zahay ty nivavake tamy iraho mbe nikede. Faie tsy tena nampianatse Baiboly ty tagne. Nianatse tamo o Mormons-ao indraike raho faie mbe nitovy avao.

Nisy Vavolombelo i Jehovah zay niavy tamako tao indraike andro. Le avy le nitreako fa boake amy Baiboly ao ze raha nampianare iareo. Nirehafe’e tamako ohatse ty 1 Timoty 2:3, 4 manao tihoe: “Zoton’arofon’andrianagnahare ty hamonjeagne ze karaza o ndaty iaby naho ty hahafantara iareo soa ty hamarenagne.” Gaga raho fa nihamafese iareo tie tsy fahafantaragne avao ty ilaegne, fa fahafantaragne maregne soa mifagnarake amy ty Baiboly.

Nanjare nanagne ze fahafantaragne maregne soa zay raho naho fa nianatse Baiboly niarake tamy iareo. Nanjare fantako ohatse tie sambe hafa ty Andrianagnahare naho i Jesosy, sady tsy agnisa ty Andrianagnahare telo miharo raike iareo. (Jaona 14:28; 1 Korintianina 11:3) Tena fale raho nahafantatse izay, faie niboseke ka satria kay raha diso naho tsy ombia ho azo ty nianarako taloha.

Nivory tamo o Vavolombelo i Jehovah-o agne raho, tafara kede izay. Tena nieke raho satria soa fagnahy iareo sady miambake ty fitsipike orihe’e. Tena mifankatea ka iareo le nagneke raho fa ty fivavaha’e ro maregne.​—Jaona 13:35.

TY SOA NIRAMBESEKO: Natao badisa raho, le nifankatrea tamy i Diane tafara izay. Ana o Vavolombelo i Jehovah-o reke, sady tena mahafinaritse ro soa toetse. Nifanambaly zahay naho fa tafara tatoy. Tena nitahie i Jehovah raho satria nahazo i Diane tena tea naho magnampe ahy.

Tena te hifindra amy ty toeragne mipay mpitory maro zahay le nifindra ta Belize, Amerika Agnivo atoy tamy 2010. Mitory amy ty ndaty tea i Jehovah sady te hahafantatse ty raha rehafe ty Baiboly zahay atoy.

Manjare milamin-tsaigne raho satria mahafantatse an’Andrianagnahare naho ty Saontsi’e. Mpitory marain-tsy hariva ka raho, le afake magnampe ndaty maro hianatse Baiboly. Tena mahafale ty mahatrea o ndatio miova naho fa mahafantatse ty raha rehafe ty Baiboly, manahake ty niseho tamako. Nahatrea fomba hisaoragne an’Andrianagnahare avao raho tamy ty fara’e.

“Nisoa fagnahy tamako iareo.”​—MAURÍCIO ARAÚJO

TERAKE TAMY: 1967

FIRENENA NIAVIA’E: BREZILY

FIAIGNA’E TALOHA: TENA NIRATY FINDESAM-BATAGNE

TY FIAIGNAKO TALOHA: Ta Avaré, tanàgne kedekede milamindamigne a São Paulo agne zahay ty nipetrake tamy iraho mbe nikede. Antognontogno’e ty fiaigna ty ndaty agne.

Nimate ty baba’ay tamy i rene’ay nivesatse ahikey. Hoe raha nisare ampela zay raho tamy iraho mbe nikede. Nagnisiako ohatse ty akanjo i rene’ay naho fa tsy tan-tragno tao reke. Nanjare hoe feon’ampela ty feoko naho ty fihetseko, le nirehafe o ndatio raho fa sare ampela. Nila lahilahy ka raho naho fa tafara tatoy, ndra tanora zay ndra ndaty fa antetse.

Mbe tsy ampe 20 taogne raho, le nipay ndaty hifampila amako avao ndra lahilahy zay ndra ampela. Nandeha tamy ze toeragne va’e hahatreavako raho, ndra tamo o barao agne zay ndra tamo o boateo agne, ndra tamo o fiangonagneo agne aza. Naho fa avy i fete atao tihoe karnavalỳ, le nanao akanjon’ampela raho, sady nilahatse niarake tamo o mpandihy marò. Tena nalaza raho tamy izay.

Nanagne namagne sare ampela, makorely vaho mpifoke rongony raho. Nandrisike ahy hagnandragne rongony atao tihoe kokainy iareo, le tsy ela avao raho le fa nizatse nifoke. Misy fotoagne aza zahay agnate i halegne raikey mifoke avao. Faie nisy fotoagne ka raho nitokagne irery sady nifoke tagnate i androy. Nanjare tena nahia raho, le nirehafe o ndatio fa voa ty SIDA.

TY NAGNOVÀ TY BAIBOLY TY FIAIGNAKO: Nifankatrea tamy ty Vavolombelo i Jehovah raho. Tena nisoa fagnahy tamako iareo. Agnisa ty nivakie iareo tamako ty Romanina 10:13 manao tihoe: “Ze mitoka ty tahina i Jehovah ro hovonjegne.” Nieke raho fa tena ilaegne ty nampiasa ty tahina i Jehovah. Naho fa boake nifoke kokainy raho tagnate i halegney, le mateteke nihalale tamy i Jehovah mba hampea’e. Nisokafeko i lafinetekoy, le niandra mbamy i lagnitsey mbeo raho sady nitomagny ro nivavake.

Nivali-doha ty rene’ay nahavazoho ahy nanimba tegna tamo o rongonio. Natahotse raho le tapa-kevetse ty tsy hifoke sasa. Nagneke hianatse Baiboly tamy ty Vavolombelo i Jehovah raho tafara izay. Nirehake iareo fa vao mainke tsy te hifoke raho naho mianatse, le izay vata’e ty raha niseho.

Nanjare tsapako fa toko’e hiova raho naho fa nitohy i fianaragney. Tena sarotse i rahay satria raho fa nisare ampela avao hatrake amy izay. Faie nivitako avao zay satria tsy niarake tamy i namako taloha rey sasa raho, sady tsy nandeha tamo o barao agne naho o amo o boateo agne sasa.

Ndra tie tsy mora aza ty niova, le nampahery ahy ty nahafantatse fa tea ahy ty Jehovah sady taka’e soa ty aly mafe ataoko. (1 Jaona 3:19, 20) Niala tamy ze kila raha nataoko tamy iraho mbe nisare ampelay raho nanomboke tamy 2002, le natao badisa raho sady nanjare Vavolombelo i Jehovah.

TY SOA NIRAMBESEKO: Tena nigaga ty rene’ay nahavazoho ahy niova, le nanjare nianatse Baiboly ka reke. Faie nampalahelo fa nanjare tapake lalan-dra reke. Faie mbe tea i Jehovah naho ty hamarenagne amy Baiboly ao avao reke.

Fa valo taogne zay raho ty nimpitory marain-tsy hariva, le magnampe o ndatio hianatse Baiboly avao. Ekeko fa kindraike raho le mbe managne fagnirian-draty avao. Faie magnampe ahy ty mieretseretse fa mampifale i Jehovah raho naho tsy manao i rahay.

Nahatsiaro tegna ho tsy misy dika’e raho tie taloha. Faie manjare tsy mahatsapa izay sasa raho, satria mifandrambe soa amy i Jehovah sady mampifale aze. Tena sambatse raho!

“Nao zao hoe barìka tsy mete feno zao raho.”​—LUKA ŠUC

TERAKE TAMY: 1975

FIRENENA NIAVIA’E: SLOVENIA

FIAIGNA’E TALOHA: MPINON-TOAKE BEY

TY FIAIGNAKO TALOHA: Naterake ta Ljubljana, rova i Slovenia raho. Nahafinaritse ty fiaignako hatrake amy iraho niefatse taogne. Faie nampalahelo fa namono tegna ty baba’ay naho fa niavy eo. Tsy maintsy niasa mafe areke ty nene mba hamelomagne ahy naho i zokeko lahilahỳ.

Nifindra tamy i bebeiko agne raho, tamy iraho ni-15 taogne. Teako zay satria narine tegne iaby ty nipetraha i namako rey. Tsy le nivoafehefehe bey manahake ty tan-tragno’ay tagne ka raho. Ninamagne tamy ty ndaty mpinon-toake raho, tamy iraho ni-16 taogne. Ninogne avao iareo isake tie sabotsy lahady. Nanjare narengerenge raho sady trea tamy ty poziko zay. Nagnalava volo raho sady nanjare nifoke ka.

Fa nagnandragne rongony sambe karaza’e raho. Faie toake ty tena teako, le nanjare nizatse ninogne raho. Divay feno vera tsiampeampe ty finomeko tamy ty voaloha’e, faie nanjare tavoangy raike mahery naho fa tafara tatoy. Nanjare tena haiko ty nagnetake tie mamo raho. Ty fofogne tamy i vavakoy egne avao ty nahafantaragne tie boake ninogne raho. Divay ndra labiera dime litatse teo ho eo aza ty nilaniko kindraike, faie tsy mbe nisy nahafantatse. Mbe ninogne vodka ka aza raho tamy izay.

Naho fa boake ninogne tamo o boateo agne zahay, le iraho avao ty nagnampe i namakoy tsy ho tonta naho fa noly. Ie amy izao ty toake nilaniko mbe indroe amy ty ahy iareo. Nisy namako nitsiko ahy indraike andro zay tie hoe barìka tsy mete feno zao raho. Izay ty fomba fireha o Slovenianao naho fa mitsikike ndaty mahavita minon-toake maro naho oharegne amy ty hafa. Niboseke raho naho fa sendra naharey izay.

Nanomboke nandineke ty fiaignako raho, le nanjare tsapako tie hoe tsy misy ilagne aze. Hoe raha tsy misy dika’e iaby zay ze raha nataoko.

TY NAGNOVÀ TY BAIBOLY TY FIAIGNAKO: Nivoamareko fa tena niova bey ty mpiara-mianatse tamako raike. Nanjare nihasoa ty toetse’e. Nampiavieko tamy ze hotely raike zay reke, le nagnonteneako. Nirehake reke fa mianatse Baiboly amy ty Vavolombelo i Jehovah. Nitantarae’e tamako ty raha ila’e nianara’e. Faie tena nivaovao tamako iaby i rahay, satria tsy mba tineza tamy ty fivavahagne zao raho. Nanomboke nianatse Baiboly naho niarake nivory tamy ty Vavolombelo i Jehovah areke raho.

Nanjare nahafantatse raha maro raho, le tena nandrisike ahy hiova zay. Nanjare fantako ohatse, fa miaigne amy ty “andro fara’e” tikagne, habaibain’Andrianagnahare o ndaty ratio, sady hiaigne nainai’e amy Paradisay ao ty ndaty maregne. (Salamo 37:29; 2 Timoty 3:1-5) Tena te hiova raho satria te ho agnisa ze ndaty maregne zay.

Nirehafeko tamy ty namako ty raha nianarako. Faie nitsikike ahy ty ankamaroa iareo, le vao mainke tsapako tie tsy namagne soa iareo. Treako tie tsy ho ombia ho afake amo o toakeo raho naho mbe minamagne amy iareo. Fa tsy ligne iareo ty hiavia i sabotsy lahadỳ mba hinomagne toake maro.

Tsy ninamagne tamy iareo sasa raho, fa niarake tamo o Vavolombelo i Jehovah-o. Tena nagnampe ahy iareo, satria tena tea an’Andrianagnahare sady mikezake mankatò ty fitsipi’e. Tsy ninon-toake bey sasa raho naho fa nandeha ty fotoagne.

TY SOA NIRAMBESEKO: Misaotse i Jehovah raho satria fa tsy mipay toake sasa vaho izay ho fale. Tsy haiko sasa tie ho nanao akore ty niafaràko naho mbe nagnorike ty fahazarako taloha raho. Tena soa ty fiaignako tie amy izao!

Fito taogne zay ty niasàko tamy ty birò ty sampa ty Vavolombelo i Jehovah a Slovenia eto. Manjare tena misy dika’e ty fiaignako satria mahafantatse i Jehovah naho manompo aze raho.