Magnova Ndaty ty Baiboly

INO ty nahavy i rastày hanapake i volo’ey, naho tsy hagnavakavake o ndaty fotio sasa? Ino ka ty nampiova i ajalahy raike mpiarotegney, i mpitake ty vola o mpivarotse rongonioy? Dineho ty raha nirehafe iareo.

“Vitako iaby aza ty tsy nagnavakavake.”​—HAFENI NGHAMA

TAOGNE: 34

FIRENENA NIAVIA’E: ZAMBIA

FIAIGNA’E TALOHA: RASTA

TY FIAIGNAKO TALOHA: Terake tamy ty tobe ty mpitsoam-ponenagne ta Zambia eto raho. Nilay boake a Namibia agne ty reneko tamy i alỳ, le nizilike tamy ty fikambana ty Mpone i Afrika Atimoahandrefagne agne (SWAPO). Nialy tamy ty fitondra i Afrika Atimo nitondra i Namibia tamy izaỳ o fikambanagne iohoe.

Nifindrafindra tobe raho, hatrake amy ty faha-15 taoko. Nampiofagnegne handrisike o ndatio hitake fahafahagne ty tanora tamy ty tobe i SWAPO agne. Izay ty nalenteke tan-tsai’ay ao, sady nampianaregne halaigne o ndaty fotio zahay.

Te hivavake amy i fiangonagne amy tobey ao raho tamy iraho ni-11 taogne. Nifangaro tao ty finoagne katolika, loteriana, anglikana, naho ty hafa. Faie nagnakivy ahy i pasitera nirehafako ze fagniriako zay, le nanjare tsy nino an’Andrianagnahare sasa raho. Tea hira reggae raho sady te hagnafoagne ty tsy rare’e tamy ty Afrikana mainte, le nanjare niarake amy ty antoko Rastà, tamy iraho ni-15 taogne. Nihalavaeko sady nirandraneko i volokoy, nifoke rongony raho, nifaly hena, sady nitake fahafahagne hoahy ty ndaty mainte. Mbe nirehake raty naho naloto findesam-batagne vaho nagnente filma nisy mpiarotegne ka raho.

TY NAGNOVÀ TY BAIBOLY TY FIAIGNAKO: Nanomboke nieretseretse bey ze raha toko’e hataoko amy ty fiaignagne raho tamy 1995, tamy iraho ni-20 taogne teo ho eo. Nianarako iaby ze boke o Rastào. Nangalake rehake boake amy Baiboly ao ty boke ila’e, faie hafahafa tamako ty fagnazava’e. Ndra aleoko areke namaky Baiboly rerike avao.

Nisy Rastà namako nagnomey ahy boke fianaragne Baiboly naboa o Vavolombelo i Jehovah-o. Nianarako i rahay sady nampiasa Baiboly raho. Nifankatrea tamy ty Vavolombelo i Jehovah raho naho fa tafara tatoy, sady nianatse Baiboly niarake tamy iareo.

Tsy ninon-toake ndra nifoke rongony sasa raho ndra tie tsy mora aza zay. (2 Korintianina 7:1) Novako ty fiakanjoko, tinapako i volokoy, sady tsy nirehake raty ndra nagnente sare vetaveta naho filma misy hampiarotegne sasa raho. (Efesianina 5:3, 4) Vitako iaby aza ty tsy nagnavakavake naho fa tafara tatoy. (Asan’ny Apostoly 10:34, 35) Akore ty nahavitako ireo? Tsy nitsanogne mozike magnasongadigne o fagnavakavahagneo sasa raho, sady tena niala tamo o namako nitarike ahy hiheregne tamy ty fomba fiaignako taloha reo.

Nipay ty Anjomba fivoria ty Vavolombelo i Jehovah raho naho fa nahavita o fiovagne reo, sady nangatake mba ho agnisa iareo. Tsy fale o keleiakò naho fa nanapa-kevetse ty hatao badisa sady hanjare Vavolombelo i Jehovah raho. Nisaontsy ty reneko fa tsy mampagninogne aze ze fivavahagne “kristiana” filieko, naho fa tsy Vavolombelo i Jehovah. Ndaty ambone tamo o fitondragneo ty longo’ay ila’e, sady ninjé iareo avao raho satria niarake tamo o Vavolombelogneo.

Faie nianarako ty fomba nifandrambesa i Jesosy tamo o ndatio sady nampihareko zay. Nahavita niaretse fanoheragne naho tsikike areke raho. Nieke raho fa maregne ty fivavaha o Vavolombelo i Jehovah-o, naho fa nampitahaeko tamy ty raha rehafe ty Baiboly ty fampianara’e. Mankatò i lily ty Baiboly mba hitorỳ ohatse iareo. (Matio 28:19, 20; Asan’ny Apostoly 15:14) Tsy manao politike ka iareo.​—Salamo 146:3, 4; Jaona 15:17, 18.

TY SOA NIRAMBESEKO: Maro ty soa nirambeseko noho iraho nagnorike ty raha rehafe ty Baiboly. Niala tamo o rongonio ohatse raho, le tsy nilany vola an-jato’e dolara isam-bolagne sasa, tsy mahatrea raha hafahafa sasa, sady mihasalama ty vatako naho ty saiko.

Haiko hinane zao ty fomba hindesagne ty fiaignako. Fa amparake ty naha ajaja ahy raho ty nagniry hahafantatse izay. Ambone izay iaby, le tsapako fa afake miharine an’Andrianagnahare raho.​—Jakoba 4:8.

“Nanjare nahafehe ty habosehako raho.”​—MARTINO PEDRETTI

TAOGNE: 43

FIRENENA: OSTRALIA

FIAIGNA’E TALOHA: MPIVAROTSE RONGONY

TY FIAIGNAKO TALOHA: Nifindrafindra monegne zahay tamy iraho mbe nikedey. Fa nipetrake tamy ty tanàgne kedekede zahay, tan-drova agne, sady nisy fotoagne tambanevolo agne niarake tamy ty misionera mpivavake. Nahafinaritse ahy i fotoagne rey iaby. Niarake tamy ty longo’ay zahay, nanjono sady namandrike biby, vaho nanao asa sokitse sambe hafa.

Mpanao aly mifampikomondro ty babako, sady mbe kede raho le fa nampianare’e hialy. Nanjare mpiarotegne raho. Tsy ampe 20 taogne raho, le fa nandany andro ninogne toake tamo o barao agne. Nipay aly ama o ndaty avao zahay amy i namakoy. Mesa naho hatae fihisagne base-ball ty niente’ay nialy tamy ty ndaty 20 ndra mahery izay.

Mpivarotse rongony naho entagne nangalare o mpiasa amo o figaràn-tsambo eio ty nataoko. Mpitake ty vola o mpivarotse rongonio ka raho, nampiasa basy mba hampitahoragne ze ndaty nitakeagne trosa. Te hanjare mpamono ndaty raho. Izao ty rehake fataoko: Ndra mate ndra mahafate.

TY NAGNOVÀ TY BAIBOLY TY FIAIGNAKO: Fa naharey ty miomba o Vavolombelo i Jehovah-o raho. Nagnontane i Nene raho, tamy iraho ni-20 taogne mahery kede, kera mba vazoho’e ty misy iareo. Tsiaroko fa nampikonkogne tama’ay tao i Vavolombelogne atao tihoe Dixon zay, roe andro tafara izay. Nirehake elaela zahay, le nirisihe’e hagnatreke ty fivoria ty Vavolombelo i Jehovah raho. Nandeha raho, sady fa 20 taogne mahery ty nagnatrehako irey. Voavale i Vavolombelogne rey iaby boake amy Baiboly ao ze fagnonteneako.

Fale raho mahafantatse fa mikarakara ty ndaty tsikiraidraike ty Jehovah, ie, ndra o ndaty raty fagnahio aza. (2 Petera 3:9) Treako fa Baba bey hatea reke, sady mikarakara ahy ndra tie naho fa tsy misy midare aza raho. Azoko ka ty fiaiko naho fa fantako fa hagnenga ty hadisoako reke naho miova raho. Nisy voka’e bey tamako ty Efesianina 4:22-24. Nandrisike ahy ‘hagnafake ty toetseko taloha’ naho ‘hiakanjo toetse vaovao finorogne mifagnarake amy ty zoton’Andrianagnahare’ o andine’e reo.

Ela bey raho vaho izay nahavita niova. Mahavita tsy mikasike o rongonio ohatse raho agnate ty heregnandro, faie rese naho fa sabotsy lahady le miarake amo o namakò. Treako fa tena nila nisintake o namakò raho naho te hanagne fomba fiaignagne malio. Nanapa-kevetse ty hifindra toeragne areke raho. Te hiarake amako ty namako ila’e, le nekeko. Nifoke rongony ty ila’e amy iareo naho fa tan-dalagne ey sady nagnomey ahy. Nirehafeko iareo tie fa nialako ty fahazarako taloha, le nisarake zahay naho fa niavy tamy i sisin-taney eo. Fantako naho fa tafara izay fa namaky banke i namako rey, sady nampiasa basy.

TY SOA NIRAMBESEKO: Tena nimora tamako ty niova naho fa nisarake tamy i namako rey raho. Nanjare Vavolombelo i Jehovah vita badisa raho tamy 1989. Nanompo i Jehovah ka i rahavavekoy naho o rae aman-drenekò naho fa tafara tatoy.

Fa 17 taogne zay ty nanambaliako sady managne anake telo mahafinaritse zahay. Voafeheko ty habosehako ndra tie misy raha mahaboseke ahy aza. Nianatse nitea ndaty boake amy ty kolontsaigne naho ‘foko vaho firehake’ iaby ka raho. (Apokalypsy 7:9) Tsapako fa tena maregne ty reha i Jesosy toy: “Naho magnorike ty rehako nareo le tena mpianako vata’e, sady ho fanta’areo ty maregne, le ty maregne ro hamotsotse anareo.”

[Rehake nalaegne]

Mba hahafahako hiova, le tsy nitsanogne mozike magnasongadigne o fagnavakavahagneo sasa raho

[Rehake nalaegne]

Nipay aly ama o ndaty avao zahay amy i namakoy. Mesa naho hatae fihisagne base-ball ty niente’ay nialy tamy ty ndaty 20 ndra mahery izay