Va’e Tsy Fantantikagne o Andrianagnahare Inoantikagneo

NDATY roe agnate ty telo ty mino an’Andrianagnahare an’Alemaigne agne. Faie naho fa nampirehafegne ty mombamomba i Andrianagnahare inoa’ey ty arivo mahery amy iareo, le sambe hafa ty fagnazava’e. “Sambe managne ty heve’e miomba an’Andrianagnahare ty Alemà tsikiraidraike’, hoe ty gazeteboke alemà FOCUS. Soa ty mino an’Andrianagnahare. Faie tsy mampalahelo vao ty mino Andrianagnahare tsy fantatse?

Tsy o Alemào avao ty tsy mahafantatse ty mombamomba an’Andrianagnahare, fa hoe izay ka ty ndaty ila’e a Eropa agne. Misy fagnadihadiagne natao ohatse ty ta Otrisy naho ta Grande-Bretaigne vaho ta Holandy agne. Naseho io fa ndaty maro ty mihevetse tie “hery fara’e ambone ndra raha mietake tsy hay fantaregne” o Andrianagnahare zao. O tanorao ty tena mihevetse fa tsy taka ty saigne ty miomba aze. Mihevetse hoe izay ka ndra ty tanora mino aze aza.

Fanta’o soa vao ty Andrianagnahare?

Tsy mitovy tihoe mahafantatse ndaty raike naho tihoe tena mahafantatse aze soa. Tihoe mahafantatse ndaty, sahala hoe mpanjaka raike ndra atleta fara’e mahay ndra mpihisa sare mihetseke malaza, le midika tie magneke fa misy reke. Faie laleke tihoe mahafantatse soa ty ndaty raike. Tafilitse amy izay tihoe mahafantatse soa ty toetse’e, ty findesam-bata’e, ty fihetseham-po’e, ty raha tea’e naho ty raha tsy tea’e vaho ty fikasa’e. Afake mifandrambe marine amy ty ndaty raike tikagne naho mahafantatse aze soa.

Ndaty an-ketse’e ty magnatsoake hevetse fa tsy ampe ty managne hevetse manjavozavo miomba an’Andrianagnahare ndra tie mahafantatse aza tie misy reke. Mahasoa iareo vao zay? Misy lahilahy zay atao tihoe Paul, mipetrake amy ty faritse avara i Alemaigne agne. Mino an’Andrianagnahare avao reke tie taloha, faie nanapa-kevetse reke mba hahafantatse aze soa. Magnazava reke tie: “Maregne fa mitake fotoagne naho kezake ty fahafantaragne soa an’Andrianagnahare faie tena minday vokatse soa zay. Manjare mahafinaritse ty fiaigna’o andavanandro naho fa mifandrambe marine amy i Mpamorogney rehe.”

Mahasoa vao ty manokagne fotoagne naho mikezake hamantatse soa an’Andrianagnahare? Vakio ajafady ty lahatsoratse magnarake.

[Hevetse Lahibey]

Tsy mitovy tihoe mahafantatse ndaty raike naho tihoe mahafantatse aze soa