Va’e hahatrea torohevetse maro hagnampe azo hizaka ty haorea’o rehe. Faie tsy voatere ho tomombagne iaby rey. Sambe managne ty fomba hiatreha’e haoreagne o ndatio. Va’e tsy handaitse ama’o ty torohevetse ila’e ndra tie mete amy ty hafa aza.

Faie misy avao ty torohevetse mete amy ty ankamaroa o ndatio. Mateteke ampiasae o manam-pahaiagneo i raha rey sady mifagnarake amy ty toro lalagne amy Baiboly ao.

• Tena hagnampe azo hizaka ty alahelo’o zay arake ty rehafe ty manam-pahaiagne ila’e. Faie misy fotoagne rehe te ho irerike. Va’e ho boseke aza rehe naho misy ndaty te hagnampe azo. Tadidio fa ara-dalàna zay.

• Tsy voatere hiarake amo o ndatio avao rehe. Faie ko ahifikifike ty hafa naho te hagnampe azo. Mbe hipay iareo avao rehe naho fa afara agne. Rehafo avao iareo naho ohatse rehe mba te hitokagne ndra mila namagne.

• Mahaia manahatsahatse naho fa hanapa-kevetse tie ombia rehe ro mba te ho irerike, le ombia rehe ro mba te hiarake amy ty hafa.

TORO LALAGNE: “Soa ty roe naho oharegne amy ty raike ... Naho tonta ty raike, le afake magnaregne aze i nama’ey.”​—Mpitoriteny 4:9, 10.

• Tsy hivali-doha loatse rehe naho homagne hanegne mahasalama. Mikezaha hihinagne voan-katae, legima, sady ko mihinagne hanegne mahavondrake loatse.

• Minoma rano maro.

• Naho tsy mazoto homagne rehe, le homana kedekede avao isake tie homagne, faie anò mateteke. Agnonteneo ka o dokoterao kera rehe toko’e hihinagne fagnampen-kanegne, ohatse vitaminy. *

• Mikezaha handeha malaky ndra manao karazam-pagnatanjahan-tegna hafa amy izay rehe tsy halahelo bey loatse. Magnaligno i alahelo’ey ty ndaty ila’e naho fa manao fagnatanjahan-tegna. Ty ila’e ka afake misaintsaigne ze fiovagne amy ty fiaigna’e.

TORO LALAGNE: “Tsy misy ndaty malaigne ty nofo’e, kanao mamelogne aze naho tea aze.”​—Efesianina 5:29.

• O ndaty azon-kaoreagneo ro toko’e ho ampe roro soa satria va’e ho rerake reke noho i haoreagney.

• Faie va’e tsy ho azon-droro soa ka reke naho minon-kafé maro ndra minon-toake.

TORO LALAGNE: “Aleo fitofagne tagnan-draike, toy izay asa mafe tagnan-droe faie hoe mitsepake tioke avao.”​—Mpitoriteny 4:6.

• Sambe managne ze fomba iatreha’e haoreagne o ndatio. Fantaro areke tie ino ty mete ama’o.

• Ty ila’e tea’e ty mamorake ty fihetseham-po’e. Ty ila’e ka tsy le tea manao izay. Ndra o manam-pahaiagneo aza sambe managne ty heve’e tie ilaegne vao zay sa tsy ilaegne. Ino ty azo’o atao naho te hamorake ty fihetseham-po’o rehe faie misalasala? Anò tsikede zay. Ze nama’o maifitse azo hey ro irehafo aze.

• Mahavita miatreke ty haorea’e ty ndaty ila’e ndra tie tsy le tomagny aza. Ty ila’e ka mahatsiaro ho maivamaivagne naho fa boake nitagny.

TORO LALAGNE: “Ty fo o ndatio ro mahatsapa ty alahelo agnate’e ao.”​—Ohabolana 14:10.

• Manjare minon-toake maro ndra mifoke jamala ty ndaty ila’e mba hagnalignova’e i haorea’ey. Faie manimba tegna ze ndaty manao izay. Va’e ho haligno’e i haorea’ey amy i fotoagne ignehoe faie hisy voka’e raty ama’e zay naho fa avy eo. Tsy aleo vao raha mahasoa ro atao.

TORO LALAGNE: “Toko’e hagnalio ty vatantikagne amy ze kila raha mandoto ty nofotse tikagne.”​—2 Korintianina 7:1.

• Ko miferenaigne loatse fa mipaliava raha hatao mba hagnalignovagne i haorea’oy.

• Mipaliava namagne vaovao ndra mikezaha hifandrambe soa amy ty nama’o. Azo’o atao ka ty mianatse raha vaovao ndra mihisa.

• Tsy le hifantoke loatse amy i haorea’oy rehe naho fa mandeha ty fotoagne, satria tondregne manao raha hafa rehe.

TORO LALAGNE: “Sambe managne ty andro tinondro ho aze iaby ze kila raha ... Misy fotoagne itagniagne sady misy fotoagne iheheagne, misy fotoagne angoihoiagne sady misy fotoagne itsinjahagne.”​—Mpitoriteny 3:1, 4.

• Tohizo avao ty fahazaragne soa nanagna’o taloha.

• Hiheregne amy ty nisy aze avao ty fiaigna’o naho tsy ovaova’o ty lera firoroa’o, ty fotoagne iasa’o, ndra ty fotoagne anoa’o raha hafa.

• Tsy le halahelo bey sasa ka rehe naho tondregne manao raha soa.

TORO LALAGNE: “Kisendra reke vaho mahatsiaro ty androm-piaigna’e, satria ataon’Andrianagnahare tondregne amy ty raha mahafale ty fo’e reke.”​—Mpitoriteny 5:20.

• Hanegnegne rehe naho meke handrambe fanapahan-kevetse lahibey.

• Ko meke hifindra tragno, hiova asa, hivarotse ndra hizara ty fanagna i ndaty nimatey.

TORO LALAGNE: “Ahazoagne tombo’e ty fandaminagne mialoha anoe ty mazoto fa ze memeke le ho rarake.”​—Ohabolana 21:5.

• Manao raha ty ndaty ila’e amy izay tsy ho haligno’e i ndaty nimatey. Trea tie tena mahasoa zay.

• Azo atao ohatse ty mamory ty sare’e ndra ty raha hafa ahatsiarova’o i ndatỳ. Azo’o sorategne agnate karine ndra diary ze raha niseho tea’o ho tadidiegne.

• Naho mbe tsy vita’o ty magnente i raha ahatsiarovagne aze rey, le ahajao soa avao hey.

TORO LALAGNE: “Tiahivo i andro talohay.”​—Deoteronomia 32:7.

• Azo atao ohatse ty mandeha manao vakansy.

• Naho tsy mete ama’o ty manao vakansy ela loatse, le manoa raha tsotsotra agnate ty andro raike ndra roe andro. Ohatse, mandeha mitsangatsangagne, mitilike toeragne misy biby, ndra mangalake tiotioke ambanevohitse agne.

• Mahasoa azo ty miala kedekede amy ty mahazatse ndra tie tsiela avao zay.

TORO LALAGNE: “Andao hivìke hipay tane bangigne, le mitofà heike.” ​—Marka 6:31.

• Ho falefale rehe isake tie magnampe ty hafa.

• Tsy irehe irery avao ty malahelo i ndaty nimatey, fa eo ka ty longo’o ndra ty nama’o. Afake magnampe iareo rehe satria mahatakatse ty fihetseham-po’e. Afake magnampe ndaty hafa ka rehe naho fa afara agne.

• Tsy tihoe falefale avao rehe naho fa magnampe ty hafa fa hahatsapa tie mbe ilaegne.

TORO LALAGNE: “Mahasambatse vata’e ty magnomey ty amy tie mandrae.”​—Asan’ny Apostoly 20:35.

• Va’e hagnampe azo hahatrea ze toko’e ho lahibey amy ty fiaigna’o ty raha mahazo azo.

• Dineho tie ino ty raha tena andania’o ty fotoa’o.

• Manoa fagnovagne naho ilaegne zay.

TORO LALAGNE: “Aleo mandeha amo o tragno misy fisaognagneo agne, toe izay mandeha amo o tragno misy feteo agne satria fate ty iafarà o ndatio iaby, le hisaintsaigne izay ze velogne.”​—Mpitoriteny 7:2.

Tsy tihoe tie tsy halahelo sasa rehe naho mampihatse ireo. Faie maro ty mahatrea tie manjare maivagne i haorea’ey naho manao raha reke mba hiatrehagne aze. Fa nagnorike ty torohevetse ila’e nirehafegne tamy ty lahatsoratse toy ato iareo. Tsy voarehake ato iaby ze raha azo atao mba hampaivagne o haoreagneo. Faie va’e handrambe soa rehe naho magnandragne ty ila’e amy i raha rey.