Ino ty Ianarantikagne Boake amo o Raha Finorogneo?

“Faie agnonteneo o biby haregneo, le hampianatse azo reke, naho o vorogne mitiligne an-dagnitse eio, le hirehake ama’o reke. Dineho o taneo, le hampianatse azo reke. Sady horehafe o fiagne an-driake eio ama’o zay.”—JOBA 12:7, 8.

NIANA-DRAHA maro boake amo o raha mitirio naho o bibio o mpahay siansao naho o ezegnerao, tato ho ato. Dinehe iareo soa ty firafy o raha finorogne sambe karaza’eo, le tahafe iareo rey mba hamorognagne raha vaovao, ndra hagnasoagne ty raha vita ty fitaovagne ila’e. Andao tikagne hagnente raha finorogne tsiampeampe. Naho fa mamaky ty miomba iareo rehe, le eretsereto zao: ‘Ia ty fagneva ty ho deraegne noho ty firafy i raha rey?’

Ino ty azo ianaragne boake amy ty vombo o trozogneo?

Ino ty azo o mpamboatse rapolanio ianaragne boake amo o trozogne misy trafo’eo? Maro. Roa amby folo metatse ty halava o trozogne iohoe, sady 30 tony eo ho eo ty kilo’e naho fa bey reke. Mitovy amy ty lanja ty kamio feno entagne zay. Somare gangagne ty vata o trozogne iohoe, sady managne vombo’e bey hoe elatse reke. Patsa sambe karaza’e ndra fiagne ty hane’e. Tena malaky ty fitsoria’e agnate rano ao. Naho fa mahatalake patsa ndra fiagne ambone’ey reke, le miakatse malaky sady mitioke tioke magnodidigne iareo. Feno baloma kedekede ty magnodidigne i fiagne rey noho i tiokey, le hoe voa fefe agnate ty raha bontolitoly iareo. Metatse raike naho sasa’e avao ty elagnela i fefe agnate ty raha bontolitolỳ. Hane i trozogney malaky o hanegne navori’e rehoe.

Itoy ty raha nahaveregne o mpikarokeo: Akore ty ahavità o biby iohoe mihodikodigne mba hamboatse ze raha bontolitoly kedekede zay, ie amy izao bey ty vata’e? Trea iareo fa ty pozipozy i vombo’ey ty magnampe aze. Tsy malama manahake ty ela o rapolanio ty aloha i vombo’ey eo, fa misy nifenife’e naho raha miboenatse milahatse soa.

Naho fa milagno i trozogney, le magnampe aze hiakatse malaky naho hahatohetse o ranò, i raha miboenatse rey. Ino ty anto’e? Hazavae ty gazete Tantara ty Raha Finorogne (anglisy) fa mizarazara soa agnelagnela iareo ey o ranò sady mitsile. Afake mitsoriake areke i trozogney ndra tie mitsoriake magnambone aza. Naho malamalama ka ty aloha i vombo’ey eo, le tsy ho afake hihodikodigne sady hitsoriake hoe izay reke. Ty anto’e mihodikodigne bey i ranoy, le ho sahiragne reke naho fa hitsoriake magnambone.

Ino ty raha soa va’e ho azo boake amo o raha trea o mpikarokeo zay? Naho hampitoviegne amy i vombo trozogney io ty ela o rapolanio, le azo antoke fa ho tsy ampe ty fitaovagne ilaegne hapetrake ama’eo, mba hagnovaovaogne ty fandeha i tiokey. Ho azo antoke soa naho ho mora kojakojaegne ty elatse hoe izay. Mino ty manam-pahaiagne miomba ty fiasa o vatagneo atao tihoe John Long, fa tsy ho ela le “va’e hisy raha miboenatse manahake ty trea amy ty vombo o trozogne misy trafo’eo, ty amy ty ela o rapolanio iaby.”

Tsikombegne ty ela o varevakeo (vorogne an-driakey)

Maregne fa nalaegne tahake boake amy ty ela o vorogneo ty ela o rapolanio. Faie nihasoae o ezegnerao zay tato ho ato. Hoe ty gazete Mpahay Siansa Vaovao (anglisy): ‘Nisy rapolany modely vaovao namboare ty mpikaroke amy ty Oniversite i Floride agne. Mahay mijanogne amo o rahogneo ey sady mahay mitiligne naho mitsoriake malaky manahake o varevakeo io, sady tsy mipay soafera fa komandiegne boake etoy avao. Antsasa-metatse mahery ty halava’e.’

Naho fa amy i rahogney ey i varevakey, le akare’e i ela’e roe rey, sady somare afore’e ty agnivo’eo, le izay ty ahavita’e fihetseke mahaveregne. Natao mora miforetse hoe izay ka ty ela i rapolanỳ hoe ty asa i gazete taloha teoy. ‘Vigne maromaro komandie ty motera kede raike ro magnetseke i elatse rey.’ Tena soa ty namboaragne ty ela i rapolany kedekede rey, le mahavita mijanogne antegnantegne i tragno abo bey rey ey reke, sady mahay mitiligne naho mitsoriake malaky. Tsy ligne o maramila amerikanao ty hahavitagne rapolany tena mora entegne hoe izay, mba hipaliavagne fitaovagne fialiagne simika ndra misy aretegne, ty an-drova bey ey.

Ty tombo o tsatsakeo

Miana-draha maro boake amy ty biby an-tane etoy ka o ndatio. Mahay milaly amy ty rindrigne naho mijanogne ambone plafò ey ohatse, o tsatsakeo. Fa tamy ty fotoagne nanoratagne o Baibolio ro nalaza o biby iohoe noho ze fahaia’e mahaveregne zay. (Ohabolana 30:28) Nagnino ro tsy mipoke o tsatsakeo naho fa mandeha ambone plafò rey ndra tie eo aza ty fisintona o taneo?

Feno volo madinedineke kedekede ty amy ty tombo’e, le izay ty mahavy aze ho afake hipiteke ndra tie amy ty raha malama manahake o fitaratseo aza. Faie tsy mamoake liten-draha o tombo’eo. Misy hery fara’e kedekede atao tihoe hery ty van der Waals magnampe o tombo’eo hipiteke ndra amy ty raha hafa. Mora rese ty sinto o taneo o hery iohoe, le izay ty mahavy o ndatio tsy ho afake hanganike rindrigne amy ty tagna’e. Faie tsy mipoke o tsatsakeo, satria vao mainke mampitombo i hery rey i volo madinedineke agnarivo’e mameno i tombo’ey rey. I reke ka toe maivagne.

Ino ty soa va’e ho azo amy i raha nitrea o mpikarokeo zay? Va’e ho azo alaegne tahake i volo amy i tombo o tsatsakeo rey mba hamboaragne raha mitovy amy ty hilin-draha mifampipiteke atao tihoe Velcro. Nalaegne tahake tamo o raha finorogneo io. * Rehafe ty Gazete Toe-karena (anglisy) fa nisy mpikaroke nirehake tie va’e hahasoa amy ty fitsaboagne, i ‘lamba famognosagne fere nalaegne tahake boake amo o volo rehoe.’ Lohotsie naho fa “tsy afake mampiasa lamba ndra raha mipitepiteke hafa famognosagne fere o dokoterao.”

Ia ty fagneva hoderaegne?

Mamboatse masìna managne tomboke valo afake mandehandeha manahake o kalengò ka ty Sampan-draharaha Amerikana Miandraikitse ty Sambon-dagnitse naho ty Ambone Tsy Taka-maso agne (NASA) ty amy izao. Fa nahavita karaza traktera bey manan-tomboke enegne hoe biby kedekede ka ty ezegnera a Failandy agne. Mahay mamokogne raha abo bey o raha iohoe. Ty mpikaroke hafa ka mieretseretse hamorogne raven-damba misy lafinete kidikidy, afake misokake naho mirindrigne mitovy amy ty voa ty hatae sapin. Misy ka ty mpamboatse rapolany mamboatse tomabile nalaegne tahake boake amy ty karazan-piagne mitsoriake malaky naho milagno. Fa am-pandinehagne ty anto’e mahavy ty karaza akoran-driake ila’e tsy ho mora vaky ka ty mpikaroke hafa, mba hamboaragne akanjo tsy laim-basy mahaaro naho maivagne.

Nahatrea hevetse soa agn’arivo’e o mpikarokeo noho ty fandineha’e ty firafitse o raha finorogneo. Atao iareo lisitse ze raha zay, sady tamirie iareo agnate ty ordinatera. Afake magnente ao o mpahay siansao naho fa “sahiran-tsaigne amy ty raha amboare’e” hoe i gazete Toe-karenay. Atao tihoe “zo ty raha finorogne” o hevetse amo o lisitse rehoe ao reo. Sahala hoe ndaty ndra orinasa nahatrea hevetse vaovao ndra namorogne fitaovagne vaovao o raha finorogneo, le manan-jò ara-dalàna ho tompo izay. Mirehake areke i gazete Toe-karenay, fa tena mete ty nanoa o mpikarokeo o hevetse mahaveregne niazo boake amy ty raha finorogne rehoe atao tihoe “zo ty raha finorogne.”

Boake aia i hevetse mahaveregne iaby niazo boake amy i raha finorogney rey? Maro ty mpikaroke mirehake fa evolisiona ty nampisy o raha finorogneo. Ty atao tihoe evolisiona, le fiovagne erike tamy ty raha tsy managne aigne, agnate ty an-tapetrisa’e taogne, le nahavy aze hanjare raha managne aigne. Faie tsy mitovy hevetse amy izay ty mpikaroke hafa. Hoe ty manam-pahaiagne miomba ty raha managne aigne kinikini’e, atao tihoe Michael Behe, tamy ty Gazete New York (anglisy), tamy 2005: ‘Tsy maintsy magneke tika fa nisy namboatse ty tragno vaovao raike, naho fa tsy mahatrea porofo hanoheragne izay tikagne. Hoe izay ka fa tsy maintsy magneke tika fa nisy namorogne ze kila raha, satria maro ty porofo ahatreavagne fa nieretseretegne mialoha amy ty fomba namorognagne aze sady tsy misy porofo azo anoheragne izay.’ Hoe areke ty Behe: “Naho fa mibaribary fa nisy namorogne ty raha raike, le tsy toko’e hatao sare tsy trea zay.”

Maregne aloha fa fagneva ty hoderaegne ty ezegnera mamorogne ty ela ty rapolany fara’e fanjaka naho tena azo antoke. Hoe izay ze ndaty mamorogne lamba ndra raha hafa azo amognosagne fere sambe karaza’e, ndra raven-damba mete amy ze ilagne aze, ndra tomabile fara’e fanjaka. Faie azo rehafegne tie, mpangalatse ze mangala-tahake ty raha niforogne o ndaty hafa, faie tsy magnomey voninahitse i ndatỳ ndra tsy magneke tie misy reke.

Mangala-tahake amo o raha finorogneo, ty mpikaroke tena mahay naho fa sahiragne amy ty raha amboare’e. Faie mirehake ty ila’e amy iareo tie, tsy misy mpamorogne tena mahira-tsaigne namboatse o raha finorogneo, fa ty evolisiona ty nampisy aze. Eké ty sai’o vao ze fampianaragne zay? I raha nalaegne tahake boake amo o raha finorogneo aza, le nila manam-pahaiagne tena mahay vaho izay nahavita aze, somandrake fa o raha finorogneo? Ia ty toko’e homeagne voninahitse? I mpamorogne fara’e mahaỳ vao sa i ndaty mikezake mangala-tahake o raha namboare’eo?

Fagnatsoahan-kevetse mete soa

Maro ty ndaty mandineke soa naho nisy namorogne vata’e ze kila raha ndra tsy nisy, le nanjare niharo hevetse tamy i mpanao salamoy. Hoe reke: “O Jehovah, tena maro vata’e ty raha nivita’o! Taman-kilala ty nanoa’o aze iaby. Feno ty raha natao’o ty tane toy iaby.” (Salamo 104:24) Mitovy hevetse amy izay ka ty Paoly, mpanoratse Baiboly. Hoe reke: “Ty toetoe i tsy trea masoy trea mibaribary amparake ty namboara’e ty tontolo toy, le ty maha Andrianagnahare aze naho ty heri’e nainai’e, satria trea amy ty raha namboare’e. Izay ty mahavy iareo tsy votsotse.”—Romanina 1:19, 20.

Faie ndaty tso-po maro magnaja o Baibolio naho mino an’Andrianagnahare ty mirehake fa, va’e Andrianagnahare ty nanao o evolisionao, mba hamorognagne ze kila raha mahaveregne. Izay vata’e vao ty ampianare ty Baiboly?

[Fagnamarehagne ambane peje]

[Hevetse Lahibey]

Boake aia i hevetse mahaveregne niazo amo o raha finorogneo rey?

[Hevetse Lahibey]

Ia ty manan-jò hoderaegne noho ty firafy o raha finorogneo?

[Efajoro/Sare]

O raha nalaegne tahake boake amy ty raha finorogneo aza, mila manam-pahaiagne tena mahay vaho izay mahavita izay, somondrake fa o raha finorogneo!

Nalaegne tahake boake amy ty ela o varevakeo, ty ela ty rapolany tena mora entegne toy

Magnandragne mangala-tahake ty tombo o tsatsakeo o mpikarokeo. Tsy mete maloto ndra misy lia tombo’e i raha rey, mahavita mipiteke amy ze kila raha ankoatse ty “Téflon” (raha simika tsy mampipitike”, sady mora mipitike naho mora miafake

Tomabile mandeha malaky. O fiagne amboneo io ro nangalagne tahake aze

[Soratse Magnazava i Sarey]

Rapolany: Kristen Bartlett/University of Florida; tombo o tsatsakeo: Breck P. Kent; fiagne naho tomabile: Mercedes-Benz USA

[Efajoro/Sare]

MANAGNE FAHENDREAGNE VOAJAGNAHARE

Managne ‘fahendreagne’ voajagnahare o bibio, le mahatrea ty lalagne toko’e homba’e. (Ohabolana 30:24, 25) Dineho ohatse ty biby roe retoagne.

◼ Nagnino o vitikeo ro tsy diso lalagne? Akore ty ahatreava o vitikeo ty lalagne moly naho fa boake nipay hanegne reke? Trea ty mpikaroke ta Royaume-Uni agne, fa mienga raha simika misy fofogne amy ty lalagne omba’e ty vitike ila’e. Tsy izay avao fa mamboatse lalagne mora trea ka reke. Rehafe ty gazete Mpahay Siansa Vaovao ohatse, fa mamboatse lalagne ty vitika mavogne, le atao’e misampagne roe i lalagney, le fara’e fohe ty raike ama’e. Ino ty tena mampiambake o lalagne iohoe? Naho fa holy i vitikey, sady avy amy i sampan-dalagney eo, le avy le magnorike i fara’e fohey reke, sady tsy maintsy avy amy i tragno’ey agne o lalagne iohoe. “Magnamora ty fiherenkere o vitikeo amy ty lalagne maro mifampizilijilike, ty fomba nizarà’e i lalagne rey”, hoe avao i gazetey, “lohotsie naho mionjogne ty vitike ila’e fa ty ila’e miheregne. Tsy rokake ka iareo satria tsy diso lalagne.”

◼ Managne tondroavaratse vao o vorogneo? Mahafantatse soa ty toeragne toko’e homba’e o vorogne mpifindra monegneo, ndra tie fara’e lavitse aza i toeragney, sady ndra soa ndra raty i toetsan’androy. Ino ty anto’e? Trea o mpikarokeo fa hoe misy tondroavaratse ty agnate’e ao, le fanta’e ty avaratse. Faie rehafe ty gazete Siansa (anglisy) fa tsy tena manondro ty avaratse i tondroavaratsey amy ty toeragne ila’e. Nagnino areke o vorogne mpifindra monegneo ro tsy diso lalagne? Magnente i masoandro tsofotsey iareo isan-kariva, le ahitsi’e mifagnarake soa amy izay i tondroavaratse agnate’e aoy. Faie rehafe i gazete Siansay ka fa miovaova ty toeragne itsofora i masoandroy arakarake i taney naho i fizaràn-taogney. Mihevetse areke o mpikarokeo fa tsy misy fomba voajagnahare ahafantara o vorogneo o fizaràn-taogneo.

Ia ty nampianatse o vitikeo hahay hizara lalagne? Ia ty nagnomey tondroavaratse naho betro o vorogneo mba ahafantara’e i fizaràn-taogney? Vokatse ty evolisiona vao zay? Sa nisy Mpamorogne mahira-tsaigne namboatse aze?

[Soratse Magnazava i Sarey]

© E.J.H. Robinson 2004