Nampianatse o ndatio mba hilongo amy ty hafa ty Jesosy. Faie izao ty raha nirehafe’e tamy i apostoli’e rey tie indraike: “Ko mieretseretse tie avy hinday filongoagne an-tane etoy raho. Tsy avy hinday filongoagne raho fa hinday mesabey. Fa avy raho mba hampisarake ty ana-dahy naho ty rae’e, ty anak’ampela naho ty rene’e, ty vinanto ampela amy ty rafoza’e ampela.” (Mat. 10:34, 35) Inogne ty tea i Jesosy horehafegne amy ireo?

Tsy tihoe tea i Jesosy ho sarahegne o keleiagneo. Faie nihai’e tie hahavy o keleiagneo tsy hitovy hevetse ty fampianara’e. Izay ty mahavy ze ndaty magniry ty hanjare mpiana i Kristy naho te hatao badisa mila mamantatse ty ho voka ty fanapahan-kevetse rambese’e. Naho ohatse iareo enjehe ty vali’e ndra ty keleia’e, le va’e ho sarotse amy iareo ty hagnorike avao ty fampianara i Kristy.

Risihe ty Baiboly ty Kristiana mba ‘hilongo amy ty ndaty iaby.’ (Rom. 12:18) Faie manahake o mesabeio ty fampianara i Jesosy amy ty keleiagne ila’e. Miseho zay naho magneke ty fampianara i Jesosy ty raike amo o keleiagneo, le ty ila’e tsy magneke ndra manohetse i fampianaragne rey. Naho izay ty raha misy, le manjare “fahavalo” i raike mianatse ty hamarenagney o keleia’e rehoe.​—Mat. 10:36.

Kindraike o mpiana i Kristy managne keleiagne tsy mitovy fivavahagne amy iareò, le miatreke raha mitsapa ty hatea iareo i Jehovah naho i Jesosy. Va’e ho foresé o longo’eo hanao fete ara-pivavahagne miarake amy iareo ohatse iareo. Naho fa miseho ty raha hoe izay, le tsy maintsy manapa-kevetse iareo tie ia ty hampifalé iareo? Hoe ty Jesosy: “Ze tea rae naho rene mihoatse ty hatea’e ahy le tsy magneva ahy.” (Mat. 10:37) Tsy te hirehake ty Jesosy tie eo tie naho te hanjare ho mpiana’e o ndaty mianatse ty hamarenagneo, le mila malaigne ty rae aman-drene’e. Te hampiseho avao reke tie mila apetrake amy ty pilasy toko’e hisy aze ty raha iaby. Naho misy amy ty keleiantikagne areke mandrara antika tsy hanompo i Jehovah, le toko’e hikezake ho tea iareo avao tika, faie i Jehovah ro tena toko’e ho teantikagne voaloha’e.

Azo antoke fa tena malahelo tika naho fa manohetse antika o keleiantikagneo. Faie tsy maintsy tadidie ty mpiana i Jesosy avao ty reha’e toy: “Ze tsy magneke hinday ty oren-katae’e, sady tsy magnorike ahy, le tsy magneva ahy.” (Mat. 10:38) Naho atao amy ty rehake hafa, le agnisa ty fijaleagne fa ampoize ty mpiana i Kristy fa tsy maintsy hiareta’e ty fagnenjeha ty keleia’e aze. Faie mitamà iareo tie mbe hiova hevetse avao i keleia iareo rey, le hagniry hianatse ty hamarenagne naho fa mahatrea ty findesam-batagne soa anagna iareo.​—1 Pet. 3:1, 2.