FA NISY fotoagne vao rehe niatreke irery ty olagne nahazo azo? Miaigne amy ty “fotoan-tsarotse tsy mora atrehegne” tika, le kivy naho mahatsiaro ho irerike. (2 Tim. 3:1) Faie tsy voatere hiatreke raike ty raha sarotse amy ty fiaignagne tika. Asongady ty Baiboly ty maha sarobily ty fanagnagne ty tena namagne amy ty “fotoan-tsarotse.”​—Ohab. 17:17.

Nandrambe soa boake tamy i nama’e niarake nanao lia misionera tama’e rey ty apostoly Paoly. (Kol. 4:7-11) Tsy afake nanao ty raha ila’e ty Paoly naho fa nigadra ta Roma tagne le iareo ty nanao aze. Ninday ze raha nilae’e boake amo o rahalahy naho o rahavave ta Filipy agne reo ohatse ty Epafrodito. (Fil. 4:18) Ninday i taratasy i Paoly rey ho amy ty fiangonagne sambe hafa ka ty Tykiko. Noho ty fanohagna o nama’e reo areke, le niafake nanao ty fanompoa’e avao ty Paoly ndra tie tsy nengagne hiakatse an-tragno ao ndra tam-porozò ao aza. Akore ty hahavy azo ho tena namagne tie amy izao?

Trea amy ty ohatse amy ty ndaty amy izao ty hasarobily ty tena namagne. Mpisava lalagne manokagne a Espaigne agne ty Elisabet. Nihazavae’e tie akore ty fomba nagnampea ty rahavave raike tena nama’e aze naho fa tagnate ty raha sarotse reke. Naho fa nivoa ty kansera tsy mete sitragne sasa ty rene’e, le nandefa andinin-teny maro i rahavavey mba hampaherezagne aze. Hoe ty Elisabet: “Nagnomey hery ahike mba hahafahako hiatreke ty andro tsikiraidraike naho nagnampe ahy tsy hahatsapa ho irerike i mesaze’e rey.”​—Ohab. 18:24.

Vao mainke hinamagne maifitse amo o rahalahy naho o rahavaveo tika naho manohagne iareo amy ty asa atao amo o fiangonagneo eo. Afake minday rahalahy ndra rahavave bey taogne hivory ndra hanompo vao ohatse rehe? Naho manao izay rehe, le hifampahery nareo. (Rom. 1:12) Faie tsy afake miboake ty tragno’e ty Kristiana ila’e. Akore ty azontika anoroagne tie tena namagne hoahy iareo tikagne?

Tsy afake mivory mivantagne ty mpiara-manompo ila’e noho ireke marare ndra noho ty raha ila’e iaigna’e. Dineho ohatse ty raha nanjo i David. Nivoa ty kansera reke. Nagnorike fitsaboagne avao reke tagnate ty enem-bolagne mahery. Nagnorike fivoriagne tan-tragno iareo agne avao iareo amy i Lidia vali’e tagnate ze fitsaboagne zay.

Ino ty natao ty nama iareo amy fiangonagne eo mba hanohagnagne iareo? Isake tie vita i fivoriagney, le mikezake mafe ty ila’e amy ty ndaty amy i Anjomba i Fanjakagney ao mba hifampirehake amy iareo mirovaly amy ty alala ty vidéoconference.  Naho fa magnomey toin-drehake ka iareo, le mahazo mesaze mampahery boake amo o mpiara-manompò. Ino ty voka’e? Tsy nahatsiaro ho irerike ty David naho i Lidia.

Afake miarake manompo amy ze tsy afake miboake ty tragno’e ka vao rehe? Afake manao fagnovagne kede tika mba hahafahagne miara-miasa amy iareo. Izay ty fomba ampisehoantika amy iareo tie tsy halignontika iareo ndra tie voafetra avao aza ty vita’e. (Ohab. 3:27) Magnino naho manao fandaharagne, le mitory an-taratasy ndra an-telefony miarake amy iareo? Va’e ho afake hagnatreke fivoriagne aloha ty fanompoagne amy ty alala ty vidéoconference ka ze tsy afake miboake ty tragno’e. Tena nankasitrake o fandaharagne iohoe ty David naho i Lidia. Nagnazava hoe izao ty David: “Nampahery anay ty fiharoagne midineke kedekede miarake amy i andiam-pitori’aỳ naho i vavakey.” Va’e ho azo’o indesegne an-tragno iareo agne ka ty ndaty ampianare’o Baiboly mba hahafaha’o hiarake mampianatse amy iareo, naho ohatse tsy atahoragne hagnoho-doza ty ama’areo agne.

Vao mainke hifandrambe maifitse amo o rahalahy naho o rahavave tsy afake miboake ty tragno’eo tikagne naho miarake manompo amy iareo sady mifantoke amy ty toetse soa iareo. Naho fa miarake manompo amy iareo ohatse rehe sady mandineke ty fahaia iareo mampiasa ty Saontsin’Agnahare, le vao mainke hagnaja aze. Naho magnampe o mpiara-manompò amy ty lafi’e ara-pagnahy areke rehe, le hahazo namagne vaovao.​—2 Kor. 6:13.

Nahazo fampionognagne ty Paoly naho fa niarake tama’e ty Titosy nama’e. (2 Kor. 7:5-7) Maniahy antika o tantara iohoe tie, tsy ty rehake aman-kasoa fagnahy rehafentika avao ty mampionogne ze toko’e hanoagne izay, fa ty fiarahagne naho ty kezake mafe ataontika mba hanohagnagne iareo ka.​—1 Jaona 3:18.

Mifanohagne soa o rahalahy naho o rahavave a Rosia agne reo. Tena ohatse fanjaka ho antikagne iareo. Dineho ohatse ty tantara i Sergey naho i Tatyana vali’e. Nindesegne natao ankety iareo naho fa boake sinava i polisy rey i tragno iareoy. I Tatyana ty nivotsotse voaloha’e, le noly an-tragno iareo agne. Hoe ty Sergey: “Tsindraike niavy tan-tragno agne reke [Tatyana], le nisy rahavave raike bey herim-po zay nitilike aze. Maro ty nama’ay niavy naho nagnampe anay nagnambigne i tragno’ay boake nisavaegney.”

Hoe indraike ty Sergey: “Tena teako ty Ohabolana 17:17. Hoe reke ao: ‘Tea amy ty fotoagne iaby ty tena namagne, sady rahalahy natao hagnampe amy ty fotoan-tsarotse.’ Tena mipay ty fagnampea i namako rey raho amo ze o fotoagne isia ty fagnenjehagne zao, le tena nisy dika’e bey tamako o rehake rehoe. Nimea i Jehovah namagne nampahery naho nanohagne ahike raho.” a

Mila namagne hanohagne tika naho fa miatreke fotoan-tsarotse. Vao mainke hipay iareo tika naho fa amy i haoreagne lahibeỳ agne. Lonike areke tikagne hikezake mafe mba ho tena namagne tie amy izao!​—1 Pet. 4:7, 8.