1. Ino ty raha nirehafe Isaia tamo o Israelitao?

 NIREHAKE ty Isaia mpaminany fa “Andrianagnahare ty hamarenagne” ty Jehovah. Ty rehake tihoe hamarenagne, le midika ara-bakiteny tihoe “amena.” (Isaia 65:16, fap.) Tihoe “amena”, le midika tihoe “lonike abey” ndra “azo antoke.” Naho fa mampiasa ty rehake tihoe “amena” ty Baiboly sady ty miomba i Jehovah naho i Jesosy ty rehafe’e, le midika io tie azo antoke ze raha saontsie iareo. Izao areke ty tea Isaia horehafegne tamo o Israelitao tie: Azo antoke ze raha saontsie i Jehovah satria mitagne avao ze raha nampitamae’e reke.

2. Nagnino tika ro afake matoky ty fampitamà i Jehovah, le ino ty fagnonteneagne hodinehentikagne?

² Afake matoky ty raha ampitamae i Jehovah miomba ty hoavy ka vao tika? Kele tsy ho 800 taogne tafara ty andro Isaia, le nagnazava ty apostoly Paoly tie nagnino ty fampitamàn’Andrianagnahare ro azo itokisagne. Hoe reke: “Tsy hain’Andrianagnahare ty mandagnitse.” (Heb. 6:18) O mangao zao, le tsy afake hamokatse manga ro sady hamokatse bageda. Le hoe izay ka fa tsy mahay mandagnitse ty Jehovah, i Foto ty hamarenagney. Naho izay areke, le afake matoky tanterake ty fampitamà i Jehovah tika, agnisa izay ty fampitamagne iaby miomba ty hoavintika. Amy ty lahatsoratse toy tika, le handineke ty fagnonteneagne retoa: Ino ty raha nampitamà i Jehovah  miomba ty hoavy? Le ino ty antoke nimey i Jehovah fa hotanterake ty fampitamà’e amy ty hoavy?

3. a) Ino ty fampitamagne tena tea o vahoa i Jehovah-o? (Apokalypsy 21:3, 4) b) Ino ty rehafe o ndatio naho fa vakientika amy iareo o fampitamagne iohoe?

³ Tena tea ty mpanompo i Jehovah magneran-tane ty fampitamagne hodinehentika toy. (Vakio ty Apokalypsy 21:3, 4.) Nampitamà ty Jehovah fa “tsy hisy sasa ty fate, ty alahelo ndra ty toreo ndra ty fanaintaignagne.” Maro amantika ty mampiasa o andine’e iohoe naho fa hirehake miomba ty Paradisa amy ty hafa. Faie manao akore ty fihetse o ndatio naho fa rehafentika amy iareo ze fampitamagne zay? Va’e hirehake iareo tie: “Tsy mampino ze raha zay satria hoe soa loatse.”

4. a) Ino ty raha fa nihay i Jehovah mialoha fa hiseho amo o androntika hinane zao? b) Ankoatse i fampitamagne nisaontsie’ey, ino ka ty raha hafa natao i Jehovah?

⁴ Mazava ho aze fa naho fa nampanoratse i Jaona io ty Jehovah, le nioni’e fa hirehake o fanantenagne iohoe amy ty ndaty hafa tika naho fa mitory i talily soay. Fa nihay i Jehovah mialoha ka fa ho maro ty ndaty hihevetse tie “raha vaovao” sarotse inoagne zay. (Isaia 42:9; 60:2; 2 Kor. 4:3, 4) Akore areke ty hagnampeantika ty tegnantikagne naho ty ndaty hafa mba hatoky fa tena hotanterake i fitahiagne rehafegne amy Apokalypsy 21:3, 4 aoy? Tsy tihoe nagnomey o fampitamagne fanjaka io avao ty Jehovah, fa nisaontsie’e ka ty anto’e toko’e hatokisantikagne izay. Ino areke ty anto’e?

5. Ino ty anto’e mahavy antika matoky ty fampitamagne miomba i Paradisay, le aia ty ahatreavantika izay?

⁵ Hahatrea ty anto’e toko’e hatokisantika i fampitamà i Jehovah miomba i Paradisay tika amy ty andine’e magnarake. Izao ty vaki’e: “Le hoe i miambesatse amy sezan-droandriagney eoy: ‘Ataoko vaovao ze kila raha.’ Hoe ka reke: ‘Sorato fa azo antoke sady maregne o rehake rehoe.’ Le hoe ka reke tamako: ‘Fa tanterake zay! Iraho ro Alfa naho Omega, le ty fiatombohagne naho ty fiafaragne.’”​—Apok. 21:5, 6a.

6. Nagnino ty antoke amy Apokalypsy 21:5, 6 ao ro magnatanjake ty fatokisantika ty fampitamàn’Andrianagnahare?

⁶ Nagnino ro magnatanjake ty fatokisantika i fampitamagney o raha rehafe ty Baiboly iohoe? Magnazava miomba o andine’e iohoe ty boke Apokalypsy tie: “Manahake tihoe manao sonia antoke raike miomba o fitahiagne amy ty hoavy reo ty Jehovah.” b Trea amy Apokalypsy 21:3, 4 ao i fampitamagney. Faie amy ty andine’e 5 naho 6, ty ahatreavantika i sonia natao i Jehovah-y, zane hoe ty antoke magnomey toky antika fa hotanterake i fampitamà’e rey. Andao hodinehentika i antoke nimea i Jehovah rey.

7. Ino ty rehake mampilitse ty antoke nimean’Andrianagnahare, le nagnino zay ro tena lahibey?

⁷ Izao ty fanomboha i antoke nimean’Andrianagnaharey: “Le hoe i miambesatse amy sezan-droandriagney eoy.” (Apok. 21:5a) In-telo nisaontsy tamy i Jaona ty Jehovah amy ty boke i Apokalypsy ao. Faie ty raike amy iareo avao ro misy o rehake iohoe amy ty fanomboha’e. Tsy anjely mahery ndra i Jesosy areke ty nagnomey o antoke iohoe, fa le ty vatantegna i Jehovah! Izay ty mahavy i raha saontsie’e magnarakey ho azo antoke. Fa nagnino? Satria ty Jehovah “tsy mahay mandagnitse.” (Tit. 1:2) Izay ty mahavy ty raha rehafe ty Apokalypsy 21:5, 6 ho azo itokisagne.

8. Akore ty nampisehoa i Jehovah fa tena ho tanterake i fampitamà’ey? (Isaia 46:10)

⁸ Hoe ka ty Andrianagnahare: “Ataoko vaovao ze kila raha.” Mareho fa tsy nisaontsy ty Jehovah tie: “Hataoko vaovao ze kila raha.” Fa hoe reke: “Ataoko vaovao ze kila raha.” Maregne fa misaontsy miomba ty fiovagne amy ty hoavy ty Jehovah, faie matoky reke fa hotanterake i fampitama’e rey. Izay ty mahavy aze nampiasa voambolagne mirehake raha fa tanterake.​—Vakio ty Isaia 46:10.

9. a) Manondro raha roe hatao i Jehovah ty rehake tihoe “ataoko vaovao ze kila raha.” Ino iaby zay? b) Hatao akore ty “lagnitse” naho ty “tane” misy amy izao?

⁹ Andao hodinehentika i rehake tihoey: “Ataoko vaovao ze kila raha.” (Apok. 21:5) Amo o toko iohoe, le manondro ty raha roe hatao i Jehovah o rehake reo: Le ty fagnovàgne naho ty fagnavaozagne hatao’e. Voaloha’e, ino areke ty raha hovà i Jehovah? Hoe reke amy Apokalypsy 21:1 ao: “Fa tsy eo i lagnitse talohay naho i tane talohay.” Tihoe “lagnitse taloha”, le manondro fitondragne ara-politike ambane fahefà i Satana naho o demonia’e reo. (Mat. 4:8, 9; 1 Jaona 5:19) Amy Baiboly ao, le manondro ty ndaty mitoboke ambone tane etoy tihoe “tane.” (Gen. 11:1; Sal. 96:1) Atao tihoe “tane taloha” areke, ty ndaty raty fagnahy amy ty tontolo toy eto. Tsy tihoe hagnasoa ndra hagnavao “ty lagnitse” naho “ty tane” agn’ohatse amy zao reo ty Jehovah, fa hofoagna’e iaby reo sady hosoloa’e vaovao. Hova’e “lagnitse vaovao naho tane vaovao”, zane hoe fitondragne vaovao naho vahoake vaovao, o tane naho lagnitse amy zao reo.

10. Ino ty raha hatao i Jehovah vaovao?

¹⁰ Ino ka areke ty raha hafa hohavaoze i Jehovah? (Apok. 21:5). Hohavaoze i Jehovah ty tane toy sady hositragne’e o ndatio amy izay iareo ho voririke. Arake ty fa nirehafe Isaia mialoha, le ho fanjaka hanahake i tonda i Edenay ty tane toy iaby. Hatao i Jehovah vaovao ka tika, le hositragne’e ze kila aretegne iaby. Agnisa izay ty kepeke, ty goa naho ty moagne. Ndra ty ndaty nimate aza hovelome’e indraike.​—Isaia 25:8; 35:1-7.

11. Ino ty raha nandilia i Jehovah i Jaona, le ino ty anto’e?

¹¹ Ino ka ty antoke hafa nimea i Jehovah? Hoe reke tamy i Jaona: “Sorato fa azo antoke sady maregne o rehake rehoe.” (Apok. 21:5) Tsy tihoe nandily i Jaona mba “hanoratse” avao ty Jehovah, fa nisaontsie’e ka ty anto’e. Hoe reke: “Azo antoke sady maregne o rehake rehoe.” Ty dika izay, le maregne naho azo antoke ty Saontsin’Agnahare. Tena fale tikagne satria nankatò i lily tihoe ‘soratoy’ ty Jaona. Ty voka’e, afake mamaky naho misaintsaigne i Paradisay naho ty fitahiagne mandigne antikagne tika.

12. Nagnino ty Jehovah ro nisaontsy tie: “Fa tanterake zay!”?

¹² Ino ka ty nisaontsie’e magnarake? “Fa tanterake zay!” (Apok. 21:6) Trea amo o raha nisaontsie i Jehovah io, fa le hoe fa tanterake ze kila raha miomba i Paradisay. Afake nisaontsy izay reke, satria tsy misy afake mikalagne aze tsy hagnatanterake ty fikasà’e. Avy eo ty Jehovah nisaontsy raha hafa magnomey toky antika fa hotanterake vata’e i Paradisay. Inogne zay?

13. Nagnino ty Jehovah ro nisaontsy tie: “Iraho ro Alfa naho Omega”?

¹³ Arake ty nitreantika taloha teo, le in-telo nisaontsy tamy i Jaona ty Jehovah tamy i fahitagney ao. (Apok. 1:8; 21:5, 6; 22:13) Amy  ty tsikiraidraike amo saontsi’e reo, le hoe reke tie: “Iraho ro Alfa naho Omega.” Alfa ty fanomboha ty abody Grike, le omega ty fifaragna’e. Naho fa nisaontsy areke ty Jehovah tie ireke ro “Alfa naho Omega”, le tea’e hotakantika tie naho fa nanao raha raike reke, le tsy maintsy vita’e hatrake amy ty fara’e zay.

14. a) Hazavao tie ombia ty Jehovah ro hoe nisaontsy tie “Alfa”, le ombia ka reke ro hisaontsy tie “Omega.” b) Ino ty antoke treantika amy Genesisy 2:1-3 ao?

¹⁴ Tafara ty namorogna i Jehovah i Adama naho i Eva, le nisaontsy ty raha safirie’e hoahy o ndatio naho ty tane toy reke. Hoe ty Baiboly tie: “Le nitsodrano iareo ty Andrianagnahare, sady nanao tihoe: ‘Managna taranake, sady mihamaroa le mamenoa ty tane toy.’” (Gen. 1:28) Tamy izay, le hoe nisaontsy tihoe “Alfa” ty Jehovah. Nanomboke areke i fikasà’e tihoey tie: Hisy ndaty voririke naho mankatò an’Andrianagnahare ty ambone tane etoa sady hameno ty tane toy ty tarira i Adama naho i Eva, le hagnitatse i paradisay. Amy ty hoavy, le hoe hisaontsy ka reke tie “Omega.” Naho fa nahavita namorogne ty “lagnitse naho ty tane vaho ze kila raha iaby” ty Jehovah, le nisy raha nisaontsie’e magnomey antoke antika. Treantika amy Genesisy 2:1-3 ao zay. (Vakio.) Nisaontsy reke tie masigne ty andro fahafito. Ino ty dika izay? Midika zay fa natoka’e mba hagnatanterahagne ty fikasà’e miomba ty tane toy naho o ndatio ty andro fahafito. Naho fa nihamasigne’e areke ty andro fahafito, le hoe nisaontsy reke tie hotanterake ty fikasà’e amy ty fara i andro fahafitoy.

15. Nagnino ty Satana ro va’e nieretseretse tie vita’e ty nikalagne i Jehovah tsy hagnantanterake ty fikasà’e?

¹⁵ Tafara ty tsy nankatoava i Adama naho i Eva, le nanjare tsy voririke iareo sady namindra ota naho fate tamy ty tarira’e. (Rom. 5:12) Va’e nieretseretse areke ty Satana tie  nivita’e ty nikalagne i fikasà i Jehovah tihoey tie ho feno ndaty voririke naho mankatò ty tane toy. Va’e nieretseretse ka reke tie tsy ho afake hisaontsy tihoe “Omega” ty Jehovah. Nihevetse reke fa tsy misy azo i Jehovah atao mba hagnatanteraha’e i fikasà’ey. Ty azo i Jehovah atao hoe reke le ty mamono i Adama naho i Eva, le hamorogne mpivaly vaovao indraike. Faie naho nanao izay ty Andrianagnahare, le afake nagnaraty aze ty Satana tie mpavande ty Jehovah. Ino ty anto’e? Satria amy Genesisy 1:28 ao, le nisaontsy tamy i Adama naho i Eva ty Jehovah tie hameno ty tane toy ty tarira iareo.

16. Nagnino ty Satana ro va’e nieretseretse fa afake magnaraty i Jehovah reke tie tsy vita’e ty magnatanterake ty fampitamà’e?

¹⁶ Ino ka ty raha hafa va’e nieretserete i Satana tie hatao i Jehovah? Va’e nieretseretse reke tie henga i Jehovah hiterake ty Adama naho i Eva faie tsy ombia ho voririke ty tarira iareo. (Mpito. 7:20, Rom. 3:23) Naho izay le ho niafake nagnaraty i Jehovah ty Satana tie tsy vita’e ty nagnatanterake i fikasà’ey. Ino ty anto’e? Satria tarira i Adama naho i Eva tsy voririke naho tsy mankatò ro ndra hameno ty tane toy.

17. Akore ty nandamina i Jehovah ty olagne naboa i Satana naho i ndaty voaloha’e rey, le ino ty ho voka izay amy ty hoavy? (Henteo i sarey.)

¹⁷ Tena nitampoke i Satana ty raha natao i Jehovah. Nahatrea vahaolagne tena soa ty Jehovah mba hagnatanterahagne i fikasà’ey ndra tie nigoreve tama’e aza ty Satana vaho i Adama naho i Eva. (Sal. 92:5) Naho fa nenga i Jehovah hiterake ty Adama naho i Eva, le nagnaporofo zay tie maregne ty raha saontsie’e sady tsy mandagnitse reke. Natoro i Jehovah tie tsy misy afake mikalagne aze tsy hagnatanterake ze raha tea’e hatao. Natao i Jehovah azo antoke tie tsy maintsy hotanterake ty fikasà’e, le nagnomey “taranake” afake magnavotse ze tarana i Adama naho i Eva mankatò reke. (Gen. 3:15; 22:18) O taranake iohoe ro hagnomey ty fiai’e ho solovoigne mba hagnavotagne o ndatio. Tena nitampoke i Satana zay. Nagnino? Satria hatea ty nahavy i Jehovah nagnomey o solovoigne iohoe. (Mat. 20:28; Jaona 3:16) Tsy managne ze hatea zay ty Satana. Ino ty raha hisy amy ty hoavy noho o solovoigne iohoe? Amy ty fara i Arivo Taogney, le ho feno ndaty voririke naho mankatò boake amy ty tarana i Adama naho i Eva hitoboke amy i paradisa an-tane etoỳ, arake ty fa nisafirie i Jehovah taloha tagne.  Amy ze fotoagne zay le hoe hisaontsy ty Jehovah tie “Omega.”

18. Ino ty antoke telo nimea i Jehovah antika? (Henteo ty efajoro tihoe “ Anto’e Telo Mahavy Antika Matoky ty Fampitamà i Jehovah.”)

¹⁸ Nitreantika tato tie ino ty antoke mahavy antika matoky fa tena hanjare ho Paradisa ty tane toy. Ty voaloha’e, le tihoe ty vatantegna i Jehovah ro nagnomey i fampitamagney. Hoe ty boke i Apokalypsy: “Le hoe i miambesatse amy sezan-droandriagney eoy: ‘Ataoko vaovao ze kila raha.’” Managne fahendreagne naho hery vaho fagniriagne hagnatanterahagne ty fampitama’e reke. Faharoe, ony i Jehovah fa ze raha nisaontsie’e le tsy maintsy ho tanterake. Izay ty nahavy aze nisaontsy tie: “Azo antoke sady maregne o rehake rehoe ... Fa tanterake zay!” Fahatelo, tsy misy afake mikalagne i Jehovah tsy hamita ze raha natao’e. Izay ka ty nahavy aze nisaontsy tie: “Iraho ro Alfa naho Omega.” Niporofoe i Jehovah fa mpavande ty Satana sady tsy mahavita mikalagne ty fikasà’e reke.

19. Ino ty azo’o atao naho fa misalasala miomba i Paradisay o ndatio?

¹⁹ Tadidio fa isake tie mirehake o antoke rehoe amy ty ndaty amy i fanompoagney ey rehe, le vao mainke hihamafe ty fatokisa’o ty fampitamà i Jehovah. Naho fa mamaky i fampitamagne fanjaka miomba ty Paradisa, amy Apokalypsy 21:4 aoy amo o ndatio areke rehe, le mirehake iareo tie: “Tsy mampino ze raha zay satria hoe soa loatse”, le akore ty hatao’o? Nagnino naho vakiegne ama’e ty andine’e 5 naho 6? Atorò aze ty antoke ndra ty sonia natao i Jehovah amo andine’e reo ao miomba ty fampitamà’e.​—Isaia 65:16.