Andao tikagne hianatse miomba ty anak’ajalahy raike nagnavotse ty renelahi’e. I Paoly ty agnara ty renelahi’e. Tsy fantantikagne ty agnara i ajajay faie fantantikagne fa tsy natahotse reke. Tea’o ho fantatse vao ty raha nanoe’e?...

Nigadra ta Jerosalema agne ty Paoly tamy izay fa nagnambara ty miomba i Jesosy. Nisy ndaty raty nalaigne i Paoly namboatse hevetse hamonoagne aze. Nanao sare te hahafantatse ty raha hitsaragne i Paoly iareo. ‘Le nirehake tamy i lahibey maramilay hagnirake o maramila’eo hinday i Paoly mbamy i zizý mbeo. Le avy le handeha hietake amy ze lalagne hindesagne aze zahay hamono aze!’

Nirey i ana-drahavave i Paoliy i tsere-draty iareo zay. Inogne ty raha nanoe’e naho fa naharey izay? Nandeha mbamy i Paoly am-pigadragne agne reke hirehake izay. Le avy le nampirehafe i Paoly aze tamy i lahibey maramilay ty tsere-draty i ndaty rey. Nimora tamy i ajajay vao ty nirehake izay tamy i lahibey maramilay?... Aha’a, nisarotse ama’e ty nirehake izay fa manamboninahitse o ndaty iohoeke. Faie le nirehake tama’e avao reke.

Nahatrea hevetse i lahibey maramilay. Nagnirake maramila 500 lahy reke hiambegne i Paoly. Nampindese’e i maramila rey a Kaisaria agne tamy halegney avao ty Paoly. Niavy agne soa avao hao ty Paoly?... Eka. Tsy misy amy izay ty hamonoa i ndaty raty rey i Paoly. Tsy nahavoa ty heve i ndaty rey sady tsy mate ty Paoly.

Inogne ty raha ianara’o boake amo tantara iohoeke?... Toko’e hanahake i ana-drahavave i Paoliy ka rehe, le tsy hatahotahotse. Tsy toko’e hatahotse rehe naho fa mirehake ty miomba i Jehovah. Tsy hatahotse vao rehe fa hirehake ty miomba i Jehovah avao?... Hagnavotse ty fiay o ndatio tsy ho mate rehe naho manao izay.