Talily Soa Nisorate i Matio 22:1-46
22 Nirehake fagnoharagne hafa tamy iareo ka ty Jesosy, le hoe reke:
2 “I Fanjakà i lagnitseỳ, le mitovy amy ty mpanjaka raike mikarakara fete bey amy ty mariaze ty ana-dahi’e.
3 Nirahe’e i mpanompo’e rey mba hangalake i ndaty nasaegne amy i fetey rey, faie tsy nite hagnatreke i ndaty rey.
4 Nagnirake mpanompo hafa ho mbamy iareo mbeo indraike reke, le hoe reke tamy iareo: ‘Rehafo i ndaty nasaegne rey tie: “Fa nagnomagne hanem-bey ho anareo raho. Fa linenta iaby ka i agnombey naho i biby nivondrahegney. Fa voaomagne iaby ze kila raha. Mba miavia nareo amo o fete bey iohoe.”’
5 Faie tsy nidarea iareo i fanasagney, fa ndra nandeha an-teteke agne ty raike, le ty raike nandeha namarotse,
6 fa ty ila’e nitsepake i mpanompo i mpanjakay rey, le nagnompa naho nijera vaho namono iareo.
7 “Niboseke vata’e areke i mpanjakay, le nagnirake tafike mba hamonovono i ndaty mpamono ndaty rey naho hagnoro i tanà iareoy.
8 Tafara izay, le hoe i mpanjakay tamy i mpanompo’e rey: ‘Fa vita omagne iaby ze kila raha, faie i ndaty nasaegne rey ro tsy fagneva i fetey.
9 Akia areke nareo mandehana agnarabey ey, le taono’areo hagnatreke i fetey iaby ze ndaty trea’areo ey.’
10 Le nandeha agnarabey ey i mpanompo rey, le navory iareo iaby ze ndaty nitrea iareo tey, ndra ndaty soa ndra ndaty raty. Ie naho fa niavy eo, le nifeno ndaty i efetse bey nanoagne i mariazeỳ.
11 “Naho fa nizilike an-tragno ao i mpanjakay mba hagnente i ndaty nasaegne rey, le nitrea’e tie, nisy lahilahy raike tsy nagnisy i akanjo fagnisiagne amy i mariazeỳ.
12 Le hoe i mpanjakay tama’e: ‘Inao hey, ino ty nahatafilitse azo ato, ie amy izao rehe tsy magnisy i akanjo fagnisiagne amy i mariazeỳ?’ Tsy nahatrea havale i ndatỳ.
13 Le hoe i mpanjakay tamy i mpanompo’e rey: ‘Rohizo’areo ty tombo’e naho ty tagna’e, le atoraho’areo amy i iegne ambalike agney reke. Agne reke ro hangoihoy ty tagny naho ho romotse.’*
14 “Maro areke ty nasaegne faie tsy ampe avao ty jinobogne.”
15 Nandeha o Fariseò naho fa niavy eo, le nipay hevetse mba hamandrihagne i Jesosy amy ty raha rehafe’e.
16 Nirahe iareo mbamy i Jesosy mbeo areke i mpiana iareo rey naho i ndaty mpanohagne i Heroda rey. Le nirehake iareo tie: “O Mpagnanatse, fanta’ay fa mirehake ty maregne lognandro rehe sady mampianatse ty maregne miomba an’Andrianagnahare. Fanta’ay ka fa tsy mipay sitrake ndra amy ia ndra amy ia rehe, sady tsy mifily volo o ndaty.
17 Rehafo ama’ay areke ty heve’o, azo atao vao sa tsy azo atao ty mandoa hetra amy i Kaisara?”
18 Faie nihay i Jesosy i anto’e raty mandrisike iareo hagnontane azey, le hoe reke: “O ry mpanao soa miatreke, nagnino inareo ie mitsapa hevetse ahio?
19 Omeo’areo vola denaria raike atoy raho.” Le nimea iareo vola denaria raike reke.
20 Hoe reke tamy iareo: “Sare ia io, le agnara ia o misoratse eò?”
21 Le hoe ty navale iareo aze: “I Kaisara.” Le hoe ty Jesosy tamy iareo: “Aloao amy i Kaisara areke ze ahy i Kaisara, fa aman’Andrianagnahare ze an’Andrianagnahare.”
22 Tena nilatsa iareo naho fa naharey izay, hafarà iareo nandeha.
23 Tamy i andro ignehoe avao, le nimbamy i Jesosy mbeo o Sadoseò. Tsy mino ty famelomagne amy ty mate iareo. Le nagnontenea iareo ty Jesosy tie:
24 “O Mpagnanatse, nirehafe i Mosesy tie: ‘Naho misy lahilahy raike manambaly faie nimate tsy niterake, le tsy maintsy valie ty rahalahi’e i valy nenga’ey, mba hagnomey taranake i rahalahi’e fa nimatey.’
25 A nisy fito mirahalahy zay anio ty tama’ay tetoagne! Nanambaly i raike voaloha’ey, le nimate tsy niterake, le nivalie i rahalahi’ey amy izay i vali’ey.
26 Nimate tsy niterake ka i rahalahi’e faharoey naho i rahalahi’e fahateloy hatrake amy i rahalahi’e fahafitoy.
27 Nimate ka i ampelay tamy ty fara’e.
28 Naho fa ho avy amy izay areke ty famelomagne indraike iareo fito mirahalahy, ia amy iareo ty hovaly i ampelay, satria iareo fa sambe nivali’e iaby?”
29 Le hoe ty navale i Jesosy iareo: “Diso hevetse nareo, satria sambe tsy hai’areo ndra ty Soratse Masigne ndra ty herin’Andrianagnahare.
30 Naho fa hovelomegne o ndaty nimateo, le tsy hisy lahilahy hagnengavao ndra ampela hengaem-bao. Hanahake o anjely an-dagnitse agneo iareo.
31 Miomba ze famelomagne ty ndaty nimate zay, mbe tsy nivakie’areo vao i nisaontsien’Andrianagnahare tihoey tie:
32 ‘Iraho le Andrianagnahare i Abrahama naho Andrianagnahare i Isaka vaho Andrianagnahare i Jakoba’? Tsy Andrianagnahare ty mate areke reke fa Andrianagnahare ty velogne.”
33 Naho fa naharey izay i vahoakey, le tena nilatsa amy ty fampianara’e.
34 Naho fa nirey o Fariseò tie tsy nahatrea havale i Jesosy sasa o Sadoseò, le niharo raike iareo sady nandeha mbamy i Jesosy mbeo.
35 Nahay lalàna ty raike amy iareo. Mba hitsapa’e hevetse i Jesosy, le nagnontane aze reke tie:
36 “O Mpagnanatse, inogne ty lily fara’e lahibey amy i lalànay ao?”
37 Le hoe ty navale’e aze: “‘Teavo amy ty fo’o iaby naho amy ty tegna’o iaby vaho amy ty sai’o iaby ty Jehovah Andrianagnahare’o.’
38 Io ty lily fara’e lahibey sady voaloha’e.
39 Manahake izay avao ka ty faharoe le tihoe: ‘Teavo manahake ty vata’o ty nama’o.’
40 Boake amo o lily roe reo ty nifotora o lalànao naho ty raha nisorate o mpaminanio.”
41 Tamo o Fariseò mbe nivorivory teoy, le nagnontane iareo ty Jesosy tie:
42 “Akore ty heve’areo miomba i Kristy? Ana ia irekeo?” Le hoe iareo: “Ana i Davida.”
43 Le nagnontane iareo reke tie: “Akore ty hahamete izay, ie amy izao naho fa nahazo fagnahy masigne ty Davida, le nitoka aze tihoe Tompo? Izao ohatse ty nirehafe’e:
44 ‘Hoe ty Jehovah tamy i Tompokoy: “Mitoboha an-kavanako eo amparake ty anoako o fahavalò ambane tombo’o eo.”’
45 Akore areke ty maha ana i Davida aze, ie amy izao ty Davida nitoka aze tihoe Tompo?”
46 Tsy nisy nahavale i fagnontenea’ey ndra raike i ndaty teo rey. Nanomboke tamy izay ka, le tsy nisy nahavany nagnontane aze sasa.
Fagnamarehagne ambane peje
^ Abt: “hagnily vazagne.”
